ގާޑިއޯލާ އަދި ލިވަޕޫލާ ދެކޮޅަށް ޔުއެފާއިން ފިޔަވަޅު އަޅަނީ

މެންޗެސްޓާ ސިޓީގެ ކޯޗު ޕެޕް ގާޑިއޯލާ އަދި އިނގިރޭސިވިލާތުގެ ލިވަޕޫލާ ދެކޮޅަށް ފިޔަވަޅު އެޅުމަށް ޔޫރަޕުގެ ފުޓްބޯޅައިގެ މައި އިދާރާ ޔުއެފާއިން ނިންމައިފިއެވެ.

ގާޑިއޯލާއާ ދެކޮޅަށް ފިޔަވަޅު އެޅުމަށް ޔުއެފާއިން ނިންމާފައިވަނީ ލިވަޕޫލާ ދެކޮޅަށް އެ ޓީމު އަމިއްލަ ދަނޑުގައި ކުޅުނު ދެވަނަ ލެގުގެ މެޗުގައި ބެންޗުން ފޮނުވާލުމުން ވެސް ކުޅުންތެރިންނަށް އިރުޝާދު ދިނުމާއި ގުޅިގެންނެވެ. އަންނަ މޭ މަހުގެ 31 ވަނަ ދުވަހު މި މައްސަލައާ ގުޅޭގޮތުން ގޮތެއް ނިންމުމަށް ޔުއެފާއިން ކަނޑައަޅާފައިވާއިރު އެ އިދާރާގެ ޑިސިޕްލިނަރީ ގަވާއިދުގެ 69 މާއްދާގައި ވަނީ ބެންޗުން ފޮނުވާލެވޭ އެއްވެސް ކުޅުންތެރިޔަކަށް ނުވަތަ ކޯޗަކަށް ޓީމުގެ ބެންޗުގައި ތިބޭ އެހެން ކުޅުންތެރިންނާއި އޮފިޝަލުންނާއި ވާހަކަ ނުދެއްކޭނެ ކަމަށެވެ.

މި މެޗުގައި ގާޑިއޯލާ ބެންޗުން ފޮނުވާލީ ލެރޯއީ ސާނޭ ޖެހި ލަނޑެއް އޮފްސައިޑްގެ ލަނޑެއްގެ ގޮތުގައި ނިންމުމާއެކު އެ މެޗުގައި ރެފްރީކަންކުރި ސްޕެއިންގެ މަޓެއޯ ލާހޯޒްއާ ޒުވާބު ކުރުމާއި ގުޅިގެންނެވެ. ރިޕްލޭތަކުން ފެންނަ ގޮތުގައި ސާނޭ ހުރީ އޮފްސައިޑް މަގާމެއްގައެއް ނޫނެވެ. ގާޑިއޯލާ ސިޓީ އެ މެޗުން ވެސް ބަލިވިއިރު އެ ޓީމަށް ސެމީގެ ޖާގައެއް ގެއްލުނީ 5-1 ގެ އެގްރިގޭޓް ނަތީޖާއަކުން ލިވަޕޫލް އަތުން ބަލިވުމާއެކުއެވެ.

ލިވަޕޫލާ ދެކޮޅަށް ފިޔަވަޅު އެޅުމަށް ޔުއެފާއިން ނިންމާފައިވަނީ ސިޓީއާ ދެކޮޅަށް އެ ޓީމުގެ އަމިއްލަ ދަނޑުގައި އެޕްރީލް މަހުގެ ފަސްވަނަ ދުވަހު ކުޅުނު މެޗުގައި ސިޓީގެ ކުޅުންތެރިން ދަތުރުކުރި ބަހަށް ހަމަލާ ދިނުމާއި ގުޅިގެންނެވެ. ލިވަޕޫލްގެ ސަޕޯޓަރުން ވަނީ ސިޓީގެ ކުޅުންތެރިން ދަތުރުކުރި ބަހާއި އަމާޒުކޮށް ފުޅިއާއި ފްލެއަރ ފަދަ އެއްޗެހި އުކާފައެވެ. މި ހަމަލާގެ ސަބަބުން ސިޓީގެ ކުޅުންތެރިން ދަތުރުކުރި ބަހުގެ ބިއްލޫރިގަނޑު ތަޅައިގެންގޮސް އެ ކުޅުންތެރިން އެހެން ބަހަކަށް ބަދަލުވާން ވެސް މަޖުބޫރުވިއެވެ. މި ހަމަލާގައި އެއްވެސް ކުޅުންތެރިޔަކަށް އަނިޔާ ނުވި ނަމަވެސް ސެކިއުރިޓީ ބެލެހެއްޓުމަށް ހަރަކާތްތެރިވި ދެ ފުލުސް އޮފިސަރަކަށް އަނިޔާވެ ހޮސްޕިޓަލުގައި ފަރުވާ ދީފައިވެއެވެ.

މި ދެ މައްސަލިގައި ވެސް ގޮތެއް ނިންމާނީ ޗެމްޕިއަންސް ލީގުގެ ފައިނަލް ކުޅޭތާ ފަސް ދުވަސް ފަހުންނެވެ. ބެލެވޭ ގޮތުގައި ގާޑިއޯލާއަށް ތިން މެޗުގެ ސަސްޕެންޝަނެއް އައުން އެކަށީގެންވެއެވެ. ހަމައެހެންމެ ލިވަޕޫލް ވެސް ބޮޑު އަދަދަކުން ޔުއޭފާއިން ޖޫރިމަނާ ކުރާނެ ކަމަށް ފުޓްބޯޅަ ދިރާސާކުރާ ފަރާތްތަކުން ދެކެއެވެ.