ޔޫރޯ ސްކޮޑުން ބާކީވުމުން ވަރަށް ބޮޑަށް ހިތްދަތިވި ކަމަށާއި, އެއީ ކެރިއަރުގެ އެންމެ އުނދަގޫ ވަގުތު ކަމަށް އިނގިރޭސި ފޯވާޑް ޖެކް ގްރީލިޝް ބުނެފިއެވެ.
މެންޗެސްޓަރ ސިޓީގެ ޕްރީ ސީޒަން ޓުއަރގެ ތެރެއިން މީޑިއާ އާ ވާހަކަ ދައްކަމުން ގްރީލިޝް ބުނީ އޭނާގެ މުޅި ފުޓްބޯޅަ ކެރިއަރުގައިވެސް ކުރިމަތިލާން ޖެހުނު އެންމެ އުނދަގޫ ވަގުތަކީ އަދި އުނދަގޫ ކަމަކީ އެއީ ކަމަށެވެ. 28 އަހަރުގެ ފޯވާޑް ބުނީ އެތަޖުރިބާއިން ހިތްވަރު ހޯދައިގެން ކުރިއަށް އޮތް ސީޒަން ރަނގަޅު ކުރަން އަމާޒު ހިފާފައިވާ ކަމަށެވެ.
ޔޫރޯ ފުޓްބޯޅަ މުބާރާތުގެ ދުވަސްވަރު ޗުއްޓީގައި ހުރި ނަމަވެސް ފޯނު ނުވަތަ ޓީވީ ހުޅުވާލާ ކޮންމެ ފަހަރަކު ފެންނަނީ ޔޫރޯގެ ކޮންމެވެސް ވާހަކައެއް ކަން ފާހަގަކޮށް ގްރީލިޝް ބުނީ ނުބަލާ ހުރުމަކީވެސް އުނދަގޫ ކަމެއް ކަމަށެވެ. އިނގިރޭސި ސްކޮޑުން ގްރީލިޝް ބާކީ ކުރީ ފަހު ވަގުތުއެވެ. މުބާރާތަށް ތައްޔާރުވާން އެންމެ ފަހުން ބޮސްނިޔާއާ ދެކޮޅަށް ކުޅުނު މެޗުގައިވެސް ބަދަލަކަށް އޭނާއަށް ފުރުޞަތު ދިނެވެ. އެކަމަކު ސައުތްގޭޓް އެކުލަވާލި 26 ކުޅުންތެރިންގެ ސްކޮޑުން ޖާގައެއް ނުލިބުނެވެ.
އިނގިރޭސި ރެކޯޑް އަގެއްގައި އެސްޓަންވިލާ ދޫކޮށް ގްރީލިޝް މެންޗެސްޓަރ ސިޓީއާ ގުޅުނީ 2021 ވަނަ އަހަރު އެވެ. އޭގެ މަސް ދުވަސް ކުރިން އޭނާ އިޓަލީއާ ދެކޮޅަށް ޔޫރޯ ފައިނަލްގައި ކުޅުނެވެ.
