މެންޗެސްޓަރ ސިޓީއާއެކު އެއްބަސްވުން އޮތް ނަމަވެސް ކުރިމަގުގެ ނިންމުން ސާފްނުވާ ކަމަށް ދޭހަވާ މޭރުމުން ފޯވާޑް ހޫލިއަން އަލްވަރޭޒް ވާހަކަ ދައްކައިފި އެވެ.
އާޖެންޓީނާއާއެކު އޮލިމްޕިކްސްގައި ވާދަކުރަން ޕެރިހުގައި ހުރި ފޯވާޑް ބުނީ ގޮތެއް ނިންމާނީ އަދި ވިސްނާނީ ވެސް އޮލިމްޕިކްސް އަށް ފަހު ކަމަށެވެ. މިވަގުތު ވިސްނުން ހުރީ އޮލިމްޕިކްސްއަށް ކަމަށް 24 އަހަރުގެ ފޯވާޑް ބުންޏެވެ. އެކަމަކު ސިޓީއާމެދު ހިތްހަމަ ޖެހޭ ކަމަށާއި, ކުޅެން ގިނަ ވަގުތު ލިބުންކަންވެސް އޭނާ ފާހަގަ ކުރިއެވެ. ކްލަބް ބަދަލުކުރުމުގެ ވިސްނުންތަކެއް އަލްވަރޭޒް ގެން ގުޅެނީ އަދިވެސް ކުޅުމުގެ ވަގުތު އިތުރުކުރަން ބޭނުންވުމާއި, ޚާއްޞަކޮށް ބޮޑަތި މެޗުތަކުގައި ދަނޑުމަތީގައި ގިނަ ވަގުތު ހޭދަކުރަން ބޭނުންވާތީ އެވެ. އެކަން ކޯޗު ޕެޕް ގާޑިއޯލާއަށްވެސް އިނގެއެވެ.
ގާޑިއޯލާ ބުނީ އަލްވަރޭޒް ކުރިމަގާމެދު ވިސްނުންތަކެއް ގެންގުޅޭކަން އެނގިފައިވާ ކަމަށެވެ. އެކަމަކު އަލްްވަރޭޒްއަށް އެކަށީގެންވާ ވަގުތު ކުޅެން ފުރުޞަތު ދިންކަން ފާހަގަކޮށް ބުނީ އެވަގުތު އިތުރުކުރަން އަލްވަރޭޒްގެ އިތުރުން އެހެން ކުޅުންތެރިންވެސް ބޭނުންވާ ކަމަށެވެ. އަލްވަރޭޒް ސިޓީއާއެކު އޮތް އެއްބަސްވުން ހަމަވާނީ 2028 ވަނަ އަހަރުގެ ނިޔަލަށެވެ. މިދިޔަ އަހަރު އޭނާ ވަނީ އެއްބަސްވުން އާކޮށްފައެވެ.
