ފްރާންސްގެ ވެރިރަށް ޕެރިހުގައި މިހާރު ކުރިއަށްދާ އޮލިމްޕިކްސްގައި ދެ ކޮރެޔާ އޮޅުވާލުމުން، އެ މައްސަލަ ހޫނުވެ އެންމެ ފަހުން އިންޓަނޭޝަނަލް އޮލިމްޕިކް ކޮމިޓީން މައާފަށް އެދެފި އެވެ.

މުބާރާތް ހުޅުވުމުގެ ރަސްމިއްޔާތުގައި ފްރާންސްގެ ސެން ކޯރުގައި ހަތަރު ގަޑިއިރަށް ދެމިގެންދިޔަ ރަސްމިއްޔާތުގެ އެންމެ ހާއްސަ އައިޓަމަކީ އެތްލީޓުންގެ ޕެރޭޑެވެ. މި ބޭއްވި ޕްރޭޑްގައި އެތްލީޓުން ދަތުރުކުރަމުދިޔައީ ބޯޓުތަކުގަ އެވެ. އުތުރު ކޮރެޔާ އާއި ދެކުނު ކޮރެޔާގެ އެތްލީޓުން ތިބި ބޯޓު ރަސްމިއްޔާތުގެ މައި ރޮސްޓްރަމް ހުރަސްކުރި ވަގުތު އިއުލާނުކުރީ އެއީ ޑިމޮކްރެޓިކް ޕީޕަޕްސް ރިޕަބްލިކް އޮފް ކޮރެޔާގެ ނަމުންނެވެ. މިއީ އުތުރު ކޮރެޔާގެ ރަސްމީ ނަމެވެ. ދެކުނު ކޮރެޔާގެ ރަސްމީ ނަމަކީ ރިޕަބްލިކް އޮފް ކޮރެޔާ އެވެ. ހަތުރުވެރި ދެ ގައުމުގެ ތެރެއިން ދެ ކޮރެޔާ އަކީ ވެސް އެންމެ ކޮރެޔާއަކަށް ހެދުމުން ދެކުނު ކޮރެޔާގެ ސަރުކާރުން ވަނީ މިކަން ވަރަށް ބޮޑަށް ކުށްވެރިކޮށް ބަޔާން ވެސް ނެރެފަ އެވެ.  

މިކަމާ ގުޅިގެން ދެކުނު ކޮރެޔާ ޓީމުން ބުނީ މުބާރާތުގެ ރަސްމީ ޕެރޭޑްގައި އެ ގައުމަކީ އުތުރު ކޮރެޔާ ކަމަށް އިއުލާނުކުރުމުން އެމީހުން ވަރަށް ދެރަވެއްޖެ ކަމަށެވެ.

މިކަމާ ގުޅިގެން ދެކުނު ކޮރެޔޭގެ ވައިސް ސްޕޯޓްސް މިނިސްޓަރ މިހާރު ވަނީ އޮލިމްޕިކް ކޮމިޓީއާއެކު ރަސްމީ ބައްދަލުވުމަކަށް އެދިވަޑައިގެންފަ އެވެ. އޭނާ ބޭނުންވަނީ މުބާރާތުގައި މިފަދަ ކަމެއް ތަކުރާރުނުވާނެ ކަމުގެ ޔަގީންކަން އޮލިމްޕިކް ކޮމިޓީން ދެކުނު ކޮރެޔާ އަށް ދިނުމަށެވެ.

އޮލިމްޕިކް ކޮމިޓީން ވަނީ މިކަމާ ދެކުނު ކޮރެޔާގެ ކިބައިން މައާފަށް އެދިފަ އެވެ. އެ ޖަމާއަތުގެ ސްޕޯކްސް ޕާސަން މާކް އާދަމްސް ވިދާޅުވީ ގައުމުތަކުގެ ނަން ގޮވުމުގައި ދެކުނު ކޮރެޔާގެ ނަން ނުގޮވައި ދިޔައީ އިންތިޒާމީ އޮޅުމަކުން ކަމަށެވެ.

އޮލިމްޕިކް ކޮމިޓީން ކޮރެޔާ ބަހުން މުއާމަލާތްކުރާ ރަސްމީ އެކައުންޓްތަކުން ވެސް ވަނީ މިކަމާމެދު މައާފަށް އެދިފަ އެވެ.