ބްރެޒިލްގެ ޒުވާން ފޯވާޑް އެންޑްރިކް 16 ނަމްބަރު ޖަރޒީގައި ރެއާލް މެޑްރިޑްގެ ކުޅުންތެރިއެއްގެ ގޮތުގައި ތަޢާރަފް ކޮށްފިއެވެ.

16 އަހަރުގައި ރެއާލް މެޑްރިޑަށް ސޮއިކުރި އެންޑްރިކް ރެއާލްގެ ކުޅުންތެރިއެއްގެ ގޮތުގައި ތަޢާރަފްކުރީ ސޮއިކުރިތާ ދެ އަހަރެއްހާ ދުވަސް ފަހުންނެވެ. އޭނާ ރެއާލް އަށް ސޮއިކުރީ 2022 ވަނަ އަހަރުގެ ޑިސެމްބަރު މަހުއެވެ. ބްރެޒިލް ގައުމީ ޓީމަށް އެންޑްރިކް ކުޅުނީވެސް ރެއާލް މެޑްރިޑަށް ސޮއިކުރި ފަހުންނެވެ. 18 އަހަރު ފުރުނީ މި ޖުލައި މަހުއެވެ. 18 އަހަރު ފުރުމާއެކު ކުރިއަށް އޮތް ސީޒަންގައި ރެއާލްގެ ޖަރޒީގައި އޭނާ ފެންނާނެއެވެ. ރެއާލް މެޑްރިޑްގެ ތަމްރީނު ތަކުގައިވެސް އެންޑްރިކް މިހާރު ވަނީ ބައިވެރިވާން ފަށާފައެވެ.

އެންޑްރިކް އަކީ ކުރިއަށް އޮތް ސީޒަންގައި ކޯޗު ކާލޯ އެންޗެލޮޓީގެ ޕްލޭންގައި މުހިއްމު ކުޅުންތެރިއެކެވެ. ކުރިއަށް ކުޅޭ ކުޅުންތެރިން ގިނަ ނަމަވެސް އެންޑްރިކް އަށް މުހިއްމު ދައުރެއް ދޭނެކަމުގެ އިބާރާތެއް ކޯޗު އެންޗެލޮޓީ ވަނީ ދީފައެވެ. އެމްބާޕޭ ވެސް ރެއާލްއާ ގުޅުމުން ޓީމްގެ ކުރީގެ ވާދަވެރިކަން ބޮޑެވެ. ރެއާލްގެ ކުރިއަށް ކުޅެން ތިބި ކުޅުންތެރިންނަށް ބަލާއިރު ވިނީޝިއުސް ޖޫނިއަރ, ރޮޑްރީގޯ, ބެލިންގހަމް, ގުލާ, އެމްބާޕޭ, އެންޑްރިކް ހިމެނެއެވެ.