ރެއާލްގެ ޓްވިޓާ އެކައުންޓް ވެސް ހެކްކޮށްފި، މެސީ އެ ކްލަބަށް ބަދަލުވެއްޖެ ކަމަށް ޓްވީޓުކޮށްފި

ރެއާލް މެޑްރިޑުގެ ޓްވިޓާ އެކައުންޓް ހެކްކުރުމަށް ފަހު، ބާސެލޯނާގެ ތަރި ލިއޮނެލް މެސީ އެ ޓީމަށް ބަދަލުވެއްޖެ ކަމަށް ޓްވީޓް ކޮށްފިއެވެ.

ރެއާލްގެ ވެރިފައިޑް ޓްވިޓާ އެކައުންޓުން ކުރި ޓްވީޓްގައި ވަނީ މެސީ އެ ޓީމަށް ބަދަލުވެފައިވާ ކަމަށެވެ. އަދި އެ ޓްވީޓާ އެކު މިދިޔަ ސީޒަނުގައި ރެއާލްގެ ދަނޑުގައި ބާސާ އަތުން އެ ޓީމު ބަލިވި މެޗުގެ ފަހު ވަގުތުގައި މެސީ ކާމިޔާބު ކުރި ލަނޑުގެ ވީޑޯއެއް ވަނީ އެޓޭޗް ކުރެވިފައެވެ. މި ޓްވީޓަށް 45 މިނުޓުގެ ތެރޭގައި 27 ހާސް ރީޓްވީޓް ވަނީ ލިބިފައެވެ.

ހަމަ އެހެންމެ މި ޓްވީޓްގެ އިތުރުން އެ ކްލަބުގެ ފޯވާޑް ކަރީމް ބެންޒީމާ ވިއްކާލި ކަމަށާއި ސަޕޯޓަރުން އިތުރު ކުޅުންތެރިޔެއް ގަންނަން ބޭނުން ނަމަ އެ ޓްވީޓަށް ރިޕްލައި ކުރުމަށް ވެސް ވަނީ ޓްވީޓް ކޮށްފައެވެ.

ރެއާލްގެ ޓްވިޓާ އެކައުންޓު ހެކްކޮށްފައި ވަނީ "އަވާ މައިން" ނަމަކަށް ކިޔާ ސެކިއުރިޓީ ހެކާ ގްރޫޕަކުންނެވެ. މި ގްރޫޕުން ވަނީ މިދިޔަ ބުދަ ދުވަހުގެ ހެނދުނުގެ ވަގުތުގައި ބާސާގެ ޓްވިޓާ އެކައުންޓް ހެކްކޮށް ޕީއެސްޖީގެ ފޯވާޑް ޑިމަރިއާ ސޮއިކޮށްފި ކަމަށް ޓްވީޓް ކޮށްފައެވެ.

ރެއާލްގެ ރަސްމީ ޓްވިޓާ އެކައުންޓް އަދި ފޭސްބުކް އެކައުންޓްގައި ކުރި މި ޕޯސްޓުތައް ވަނީ މިހާރު ޑިލީޓް ކުރެވިފައެވެ. މިކަމާ ގުޅޭ ގޮތުން އަދި އެ ކްލަބުން އެއްވެސް ބަހެއް ބުނެފައެއް ނުވެއެވެ.