މި ސަރުކާރު ބޯހިޔާވަހިކަމުގެ ރަން 5 އަހަރަށް ވާނެ އެއްވެސް ގޮތެއް ނެތް، ރައްޔިތުން ކުރަނީ ބިކަ: މުޒާހަރާގެ ބައިވެރިން
ކުރީ ސަރުކާރުން ދޫކޮށްފައިވާ ފްލެޓުތައް ލަސްނުކޮށް ދޫކުރަންޖެހޭ
ހުކުރު ދުވަހުގެ ރޭ ކުރިއަށް ގެންދިޔަ މުޒާހަރާގެ ތެރެއިން
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ މިސަރުކާރު، ބޯހިޔާވަހިކަމުގެ ރަން 5 އަހަރަށް ވާނެ އެއްވެސް ގޮތެއް ނެތް ކަމަށް މުޒަހާރާގެ ބައިވެރިން ބުނެފިއެވެ.
ހުކުރު ދުވަހުގެ ރޭ 8:45 ގައި ލޮނުޒިޔާރަތްކޮޅުގައި ވަނީ ފުލެޓާއި ގޯތި މައްސަލައިގައި ސުލްހަވެރި މުޒާހަރާއެއް ކުރިއަށް ގެންގޮސްފައެވެ. މި މުޒާހަރާގައި ގިނަ އަދަދެއްގެ އާއްމު ރައްޔިތުން ބައިވެރިވެފައިވެއެވެ. މުޒާހަރާގެ ބައިވެރިން ތިބީ އެކިއެކި ޝުއޫރުތައް ލިޔެފައިވާ ބެނަރތަކާއި ޕޯސްޓަރުތައް ހިފައިގެންނެވެ.
މުޒަހާރާގެ ބައިވެރިން ބުނެފައިވަނީ ކުރީ ސަރުކާރުން ދޫކޮށްފައިވާ ފްލެޓުތައް ލަސްނުކޮށް ދޫކުރަންޖެހޭ ކަމަށާއި، ފްލެޓު ލިބުނު ކަމަށް ދޫކޮށްފައި އޮތީ ސައްހަ ލިޔުމެއް ކަމަށެވެ. އެ އެއްބަސްވުމަށް މިސަރުކާރުން އިހުތިރާމް ކުރަންޖެހޭ ކަމަށާއި، ފްލެޓު ނުލިބި ލަސްވާ ކޮންމެ ދުވަހަކީ ހައްގުތައް ގެއްލި، ހާލަތު ވަރަށް ބޮޑަށް ބަދަލުވެގެންދާ ދުވަހެއް ކަމަށެވެ. އަދި މާލޭގައި ދިރިއުޅެމުންދަނީ ވަރަށް ދަތިހާލުގައި ބޮޑު ކުލި ދައްކައިގެން ކަމަށް އެމީހުން ބުނެފައިވެއެވެ.
ރައްޔިތުންގެ ބޯހިޔާވަހިކަން މިސަރުކާރުން އަޅުވެތިކޮށްފައިވާކަން ފާހަގަކޮށް އެމީހުން ބުނެފައިވަނީ މިސަރުކާރުން އެއްވެސް ވަރަކަށް ރައްޔިތުންނަށް އިހުތިރާމް ނުކުރާ ކަމަށާއި، ރައްޔިތުން ބައިތިއްބަނީ ވާނުވާ ގައި ކަމަށެވެ. އަދި ކުރީ ސަރުކާރުގައި ގޯތި ދޫކޮށްފައިވާ ބިންތައް ނުހިއްކައި، އެހެން ޕްރޮޖެކްޓްތައް ފެށުމަކީ ބަލައިގަނެވޭނެ ކަމެއް ނޫން ކަަމަށް އެމީހުން ބުނެފައިވެއެވެ.
މުޒާހަރާގެ ބައިވެރިން ވަނީ ފްލެޓުގެ ކޮމެޓީގެ މަސައްކަތް ގޮސްފައިވާ ހިސާބު ރައްޔިތުންނަށް ހާމަކޮށްދިނުމަށް ގޮވާލާފައެވެ. މިމައްސަލައާ ގުޅިގެން ރައީސް އޮފީސް އަދި ހައުސިން މިނިސްޓްރީއަށް މައްސަލައިގެ ކަންބޮޑުވުން ފާޅުކޮށް ސިޓީ ހުށަހެޅި ނަމަވެސް ސިޓީއަށް ޖަވާބު ދީފައިނުވާ ކަމަށް އެމީހުން ބުނެއެވެ.
މި މުޒަހާރާގައި މާލެ ރަށްވެހިންގެ ޖަމިއްޔާއިން ވެސް ވަނީ ބައިވެރިވެފައެވެ.
އެ ޖަމިއްޔާއިން ބުނެފައިވަނީ މިމައްސަލައަށް ހައްލު ލިބެންދެން މުޒާހަރާ ކުރާނެ ކަމަށާއި، މިސަރުކާރުން ކަންކަން ކުރިއަށް ގެންދަނީ އަޑި ނޭނގޭ ގޮތްގޮތަށް ކަމަށެވެ. ފެލެޓާއި ގޯތި މައްސަލާގައި މިހާތަނަށް އައިރު ފެނުނީ މިސަރުކާރުގެ އިހުލާސްތެރިކަން ނެތް މަންޒަރު ކަމަށް އެޖަމިއްޔާއިން ބުނެއެވެ. އަދި ގުޅީފަޅުން ގޯތި ލިބިފައިވާ މީހުންނަށް އެމަސައްކަތުގެ ޓައިމްލައިނެއް ދިނުމަށް އެދުނު ނަމަވެސް އެކަން ވެސް މިސަރުކާރަށް ނުވި ކަމަށް ބުނެފައިވެއެވެ.
ފްލެޓުތައް އަވަހަށް ހަވާލުކޮށްދިނުމަށާއި، ވޯޓުގެ ނާޖާއިޒު ފާއިދާ ނުނެގުމަށް މުޒާހަރާގެ ބައިވެރިން ގޮވާލާފައިވާއިރު، ރައީސް ޑރ.މުހައްމަދު މުއިއްޒު އާ ބައްދަލުކުރުމަށް ވެސް އެމީހުން ވަނީ އެދިފައެވެ. މިސަރުކާރަށް 8 މަސް ވެގެންދިޔައިރު ވެސް އެ ކަމަށް ވެސް އެއްވެސް އިޖާބައެއް ދީފައިނުވާކަމަށް މުޒަހާރާގެ ބައިވެރިން ބުނެފައިވެއެވެ.
