ލަންކާގެ ރިޔާސީ އިންތިޚާބު ސެޕްޓެމްބަރ 21 ގައި

ސްރީ ލަންކާގެ ރިޔާސީ އިންތިޚާބު އަންނަ ސެޕްޓެމްބަރު މަހުގެ 21 ގައި ބާއްވާން ނިންމާ އެކަން އެ ގައުމުގެ އިލެކްޝަންސް ކޮމިޝަނުން އިއުލާން ކޮށްފިއެވެ.

އިގްތިސާދީ ފުން ވަޅުގަނޑަކުން އަރައިގަތުމަށް މަސައްކަތް ކުރަމުންދާ ސްރީލަންކާގެ ރިޔާސީ އިންތިޚާބުގެ ތާރީޚް ހުކުރު ދުވަހު އިއުލާން ކުރުމާއެކު، ކެންޑިޑޭޓެއްގެ ގޮތުގައި އެންމެ ފުރަތަމަ ރެޖިސްޓްރީވި ފަރާތަކީ މިހާރުގެ ރައީސް ރަނިލް ވިކްރަމަސިންހަ އެވެ.

އިންތިޚާބުގައި ވާދަ ކުރާ ފަރާތްތަކުން ނަން ހުށަހެޅުމުގެ އެންމެ ފަހު ތާރީޚެއް ކަމަށް ކަނޑައަޅާފައިވަނީ އޮގަސްޓް މަހުގެ 15 ވަނަ ދުވަހެވެ.

އުމުރުފުޅުން 75 އަހަރުގެ ރަނިލް ވިކްރަމަސިންހަ ލަންކާގެ ރައީސް ކަމުގެ މަގާމަށް ހަވާލުވެވަޑައިގަތީ 2022 ވަނަ އަހަރުގެ ޖުލައި މަހު އޭރު ވެރިކަމުގައި ހުންނެވި ގޮތަބަޔާ ރާޖަޕަކްސާ ފިއްލަވައިގެން ގައުމު ދޫކުރައްވާ ވަޑައިގަތުމަށް ފަހު މަގާމުން އިސްތިއުފާ ދެއްވުމުންނެވެ. އޭނާ އިސްތިއުފާ ދެއްވަން މަޖުބޫރުވީ، ފަހުގެ ތާރީޚެއްގައި ލަންކާ އަށް ކުރިމަތިވި އެންމެ ބޮޑު އިގްތިސާދީ ހީނަރު ކަމާއެކު ރައްޔިތުން މަގުމައްޗަށް ނުކުމެ ސަރުކާރާ ދެކޮޅަށް ބާއްވަން ފެށި މުޒާހަރާތަކާ ގުޅިގެން ގައުމުގެ ހާލަތު ގޯސްވުމުންނެވެ.

ގޮތަބަޔާ އިސްތިއުފާ ދެއްވުމުން 2019 ވަނަ އަހަރު ފެށުނު އޭނާގެ ދައުރުގެ ބާކީ ބައި ފުރިހަމަ ކުރުމަށް ރަނިލް ވިކްރަމަސިންހަ ރައީސް ކަމުގެ މަގާމަށް އައްޔަން ކުރުމަށް ލަންކާގެ ގާނޫނު ހަދާ މަޖިލީހުން ފާސްކުރިއެވެ.

ލަންކާގެ އިލެކްޝަންސް ކޮމިޝަނުން ބުނެފައިވަނީ ކުރިއަށް އޮތް ރިޔާސީ އިންތިޚާބުގައި އެގައުމުގެ 22 މިލިއަން މީހުންގެ އާބަދީ އިން ގާތްގަނޑަކަށް 17 މިލިއަން މީހުންނަށް ވޯޓު ލުމުގެ ހައްގު ލިބިފައިވާ ކަމުގައެވެ.

އިންތިޚާބުގެ މައިގަނޑު މައުޟޫއެއްގެ ގޮތުގައި އިގްތިސާދު އޮންނާނެ ކަމަށް ބެލިވިފައިވާއިރު، 2022 ވަނަ އަހަރުގެ އޭޕްރީލް މަހު ލަންކާ ބަނގުރޫޓު ވިކަން އިއުލާން ކުރި އިރު 83 ބިލިއަން ޑޮލަރަށް ވުރެ ބޮޑު އަދަދެއް ދަރަނީގެ ގޮތުގައި ދައްކަން އޮތްކަމަށް ރިޕޯޓްތައް ބުނެއެވެ. މީގެ ތެރެއިން ދެބައިކުޅަ އެއްބަޔަށް ވުރެ ގިނަ ފައިސާ އަކީ ބޭރުގެ ފަރާތްތަކަށް ދައްކަން ޖެހޭ ދަރަންޏެވެ.

ދަރަނިން އަރައިގަނެ އިގްތިސާދު ހަމަ މަގަށް އެޅުވުމަށް، ހުސްވި އަހަރު ލަންކާ އިން ވަނީ އިންޓަރނޭޝަނަލް މަނިޓަރީ ފަންޑު (އައިއެމްއެފް) އިން 2.9 ބިލިއަން ޑޮލަރުގެ އެޙީ އެއް ހޯދާފައެވެ. އައިއެމްއެފް ގެ ބެއިލްއައުޓު އެހީތެރިކަމާއެކު ސެޕްޓެމްބަރު 2022 ގައި 70 އިންސައްތައިގައި ހުރި އިންފްލޭޝަން މިއަހަރުގެ ޖޫން މަހާ ހަމައަށް 1.7 އިން ސައްތަ އަށް ވަނީ ތިރިވެފައެވެ.

މިއަހަރު ލަންކާގެ އިގްތިސާދުގެ ދުވެލި 3 އިން ސައްތައިގައި ހުންނާނެ ކަމަށް ވަނީ ލަފާކުރެވިފައެވެ.

ކުރިއަށް އޮތް އިންތިޚާބުގައި މިހާރުގެ ރައީސްގެ އިތުރުން ވާދަ ކުރާ ފަރާތްތަކުގެ ތެރޭގައި އިދިކޮޅު ލީޑަރު ސަޖިތް ޕްރަމަދާސާ ހިމެނޭނެ ކަމަށް މީޑިއާ ރިޕޯޓްތައް ބުނެއެވެ.