ޗައިނާއިން ނަގާފައިވާ ލޯނުތައް ކުރިއަށް އޮތް 5 އަހަރު ދައްކަން ނުޖެހޭނެ ކަމުގެ ފެހި ސިގްނަލް ވަނީ ލިބިފައި - ރައީސް
3.8 ބިލިއަން ރުފިޔާ ލޯނު ދެއްކުމަށް ހޭދަކޮށްފައިވާ ކަަމަށް އެ މަނިކުފާނު ވިދާޅުވި
ރައީސުލްޖުމްހޫރިއްޔާގެ ދެކަނބަލުން ޗައިނާއަށް ކުރެއްވި ދަތުރުފުޅުގެ ތެރެއިން
ޗައިނާގެ އެގްޒިމް ބޭންކުން ނަގާފައިވާ ލޯނުތައް ކުރިއަށް އޮތް 5 އަހަރު ދައްކަން ނުޖެހޭނެ ކަމުގެ ފެހި ސިގްނަލް ވަނީ ލިބިފައިކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.
އެ މަނިކުފާނު މިހެން ވިދާޅުވީ މިނިވަން ދުވަހުގެ ރަސްމީ ޖަލްސާގައި ވާހަކަފުޅުދައްކަވަމުންނެވެ. އެމަނިކުފާނު ވަނީ ގައުމު މިނިވަންކަމާއި އެކު ބޭއްވުމަށް ޚާރިޖީ ސިޔާސަތު ބައްޓަންކުރާ ގޮތް މުހިންމު ކަމަށް ފާހަގަކުރައްވާފައެވެ. އަދި އިގްތިސާދީ ގޮތުން ގައުމުތަކާއި އޮންނަ ގުޅުމާއި އިގްތިސާދީ ނިންމުންތަކަކީ މިނިވަންކަމާއި ގުޅިފައިވާ ކަމެއްކަމަށް އެ މަނިކުފާނު ވިދާޅުވިއެވެ.
ދަރަނި ދެއްކުމަށްޓަކާ، އެންމެ ބޮޑު އެހީއެއް ދެނީ އިންޑިއާ އާއި ޗައިނާ އިން ކަމަށް ރައީސް ވިދާޅުވިއެވެ. ރާއްޖޭގެ ދަރަނިދައްކަން އެ ދެ ޤައުމުން ވެސް ލުއި ގޮތްތަކެއް ހޯދާދެއްވާ ކަމަށް ރައީސް ވަނީ ވިދާޅުވެފައެވެ. އެހެންކަމުން އެކަމަށްޓަކާ އިންޑިއާ އާއި ޗައިނާ އަށް ރައީސް ވަނީ ޝުކުރު އަދާކުރައްވާފައެވެ. އިންޑިއާ ސަރުކާރުން ވަނީ ރާއްޖެއިން ދައްކަން ޖެހޭ 50 މިލިއަން ރޯލްއޯވަރކޮށް، ކާބޯތަކެތީގެ ކޯޓާ ވެސް ދެ އަހަރު ދުވަހަށް އިތުރުކޮށްދެއްވާފައި ކަމަށް އެމަނިކުފާނު ވިދާޅުވިއެވެ. އަދި އިންޑިއާ އިން ވަނީ ލައިންއޮފް ކްރެޑިޓްގައި ހުރި ފައިސާ ވެސް ބޭނުން ކުރެވޭނެ މަގުފަހިކޮށްދެއްވާފައި ކަމަށް ރައީސް ވިދާޅުވިއެވެ. ރައީސް ވަނީ ޔޫއޭއީ ސަރުކާރުން ވެސް އެ ގައުމަށް ދައްކަން ޖެހޭ ލޯނު ކުރިއަށް އޮތް 5 އަހަރު ދައްކަން ނުޖެހޭ ގޮތަށް ހަމަޖައްސަވާދެއްވާނެކަމަށް އެ ގައުމުން ވިދާޅުވެފައިވާކަން ހާމަކުރައްވާފައެވެ.
މި ސަރުކާރުން މަސައްކަތް ކުރަނީ ނަގާފައިވާ ލޯނުތައް ލުއިގޮތަކަށް ބަހާލައިގެން އިގްތިސާދީ ސިޔަސަތު ނެގެހެއްޓޭނެ ގޮތަކަށް މަސައްކަތް ކުރުމަށް ކަމަށް ރައީސް މުއިއްޒު ވިދާޅުވިއެވެ. އަދި އެއްވެސް ލޯނެއް ޑިފޯލްޓް ނުވެ، 3.8 ބިލިއަން ރުފިޔާ ލޯނު ދެއްކުމަށް ހޭދަކޮށްފައިވާ ކަަމަށް އެ މަނިކުފާނު ވިދާޅުވިއެވެ. ފަރުދީ ގޮތުން ފުދުންތެރިކަން އިހުސާސް ނުވާ ނަމަ ގައުމުގެ ރައްޔިތުންނަށް މިނިވަންކަން އިހުސާސް ނުވާނެ ކަމަށް އެ މަނިކުފާނު ވަނީ ވިދާޅުވެފައެވެ. އެކަން ކޮށްދިނުމަށް ސަރުކާރުން މަސައްކަތްކުރަމުންދާ ކަަމަށް ވެސް ރައީސް ވިދާޅުވިއެވެ. މީގެ އިތުރުން ގައުމުތަކާއި އެކު އެފްޓީއޭ އެއްބަސްވުންތައް އެކުލަވާލުމަށް މަސައްކަތްކުރަމުންދާ ކަމަށް އެމަނިކުފާނު ވިދާޅުވިއެވެ.
