‏ޑްރަގް މައްސަލައަކާއި ގުޅިގެން ހައްޔަރުކުރުމުގެ ތެރޭގައި އަޒްމީލަށް ލިބުނު އަނިޔާތަކަށް ފަރުވާދޭން ހޮސްޕިޓަލަށް ގެންދިޔައީ މާލޭގައި ހުންނަ ފުލުހުންގެ ކަސްޓޯޑިއަލްއަށް ގެންދިޔަތާ 16 މިނެޓް ފަހުން ކަމަށާއި، އެ މައްސަލަ އަވަހަށް ތަހުގީގުކުރުމުގެ މަސައްކަތް ކުރަމުން އަންނަ ކަމަށް ހިއުމަން ރައިޓްސް ކޮމިޝަނުން ބުނެފިއެވެ.

2024 ޖުލައި 15 ވަނަ ދުވަހު ޑްރަގް ކޯޓު އަމުރެއްގެ ދަށުން މުޙައްމަދު އަޒްމީލް ޖަލީލް ފުލުހުން ހައްޔަރުކުރުމަށް އެ ގެއަށް ގޮސް ހުއްޓާ އެ ގޭގެ ކުޑަދޮރަކުން ނިކުމެ ފިލަން އުޅުމުގެ ތެރޭގައި މަގުމައްޗަށް ވެއްޓި އަނިޔާތަކެއްވެ، ދަރުމަވަންތަ ހޮސްޕިޓަލުގައި ފަރުވާ ދެމުންދާކަމަށް ބުނާ ހާދިސާ ފުލުހުންގެ ފަރާތުން ކޮމިޝަނުގެ ސަމާލުކަމަށް ގެނައުމުން، މި މައްސަލަ އެންޓި-ޓޯޗަރ ގާނޫނުގެ ދަށުން ތަހުގީގު ކުރަމުންދާ ކަމަށް އެޗްއާރުސީއެމްއިން ބުނެއެވެ.

‏މި މައްސަލައާ ގުޅިގެން މިހާތަނަށް އާއިލާގެ ފަރާތުން މަޢުލޫމާތު ހޯދާ، ދިވެހި ފުލުހުންގެ ފަރާތުން މައުލޫމާތު ހޯދުމަށް އެދިފައިވެއެވެ. މީގެ އިތުރުން، ހާދިސާ ހިނގި ތަނަށް ޒިޔާރަތްކޮށް ސީ.ސީ.ޓީ.ވީ ފުޓޭޖް ހޯދުމަށް މަސައްކަތްކުރިނަމަވެސް، އެ ސަރަޙައްދުގައި ހުރި ސީ.ސީ.ޓީ.ވީ ކެމެރާ ހަލާކުވެފައި ހުރުމުން ލިބޭގޮތްނުވާ ކަމަށް އެޗްއާރުސީއެމްއިން ބުނެއެވެ.

މީގެ އިތުރުން މި ހާދިސާގައި މުހައްމަދު އަޒްމީލް ޖަލީލް ފުލުހުންގެ ބެލުމުގެ ދަށަށް މާލެ ކަސްޓަޑީއަށް ގެންދެވިފައިވާތީ، ކަސްޓަޑީގައި ހަރުކުރެވިފައިވާ ކެމެރާތަކުގެ ފުޓޭޖް ބަލާފައިވާނެއެވެ. އަދި މި ހާދިސާގައި ހަރަކާތްތެރިވި ފުލުހުން ބޮޑީވޯން ކެމެރާ ބޭނުންކޮށްފައިވާނަމަ އޭގެ ފުޓޭޖްއަށް އެދި ދިވެހި ފުލުހުންގެ ހިދުމަތުގައި އެދިފައިވެއެވެ.

‏މިހާތަނަށް ލިބިފައިވާ މައުލޫމާތުގައި މި ހާދިސާ ހިނގުމުން އާއިލާއިންވެސް މުހައްމަދު އަޒްމީލް ޖަލީލް ހޮސްޕިޓަލަށް ގެންދިޔުމަށް އެދިފައިވަނިކޮށް ހޮސްޕިޓަލަށް ނުގެންގޮސް ފުލުހުންގެ ބެލުމުގެ ދަށުން މުހައްމަދު އަޒްމީލް ޖަލީލް އެދުވަހުގެ މެންދުރު 02:45 ގައި މާލެ ކަސްޓަޑީއަށް ގެންދިޔުމަށްފަހު ހޮސްޕިޓަލަށް ގެންދިޔުމަށް ވެހިކަލްއަށް އަރުވާފައިވަނީ 03:01 ގައި ކަމަށް ފާހަގަކުރެވިފައިވާ ކަމަށް ފުލުހުން ބުނެއެވެ.

‏އަދި މި މައްސަލައިގެ ތަހުގީގު ވީހާވެސް އަވަހަކަށް ނިންމުމުގެ މަސައްކަތް ކުރަމުން އަންނަ ކަމަށް ކޮމިޝަނުން ބުނެއެވެ.