ތ.ވޭމަންޑޫގައި ކުޑަ ދެކުއްޖެއްގެ ހަށިގަނޑުގައި އަތްލައިގެން ފާސްކުރި ކަމަށް ބުނާ ވާހަކަ ފުލުހުން ދޮގުކޮށްފި

ތ.ވޭމަންޑޫގައި ކުޑަ ދެކުއްޖެއްގެ ހަށިގަނޑުގައި އަތްލައިގެން ބަލާފާސްކޮށްފައިވާ ކަމަށް ބުނެ ފަތުރަމުންދާ ވާހަކަތައް ދިވެހި ފުލުހުންގެ އިދާރާއިން ދޮގުކޮށްފިއެވެ.

މީސްމީޑިއާގައި މުހައްމަދު ތަސްލީމް ކިޔާ މީހަކު ވަނީ ފުލުހުން ކޯޓު އަމުރު ތަންފީޒުކުރުމުގެ ނަމުގައި ޤާނޫނާއި ޚިލާފުވެފައިވާ ކަމަށް ތުހުމަތުކޮށްފައެވެ. އަދި ކުޑަކުދިންގެ ކަރާމާތް ނަގާލާ އަނިޔާ ދީފައިވާ ކަމަށާއި އެއީ ވަރަށް ދެރަވަރުކަމެއް ކަމަށް އޭނާ ވަނީ ބުނެފައެވެ. ހަމައެހެންމެ 5 އަހަރުގެ އަންހެން ކުއްޖަކާއި އެއް މަހުގެ ކުޑަ ކުއްޖަކު ހަށިގަނޑުގައި އަތްލައިގެން ބަލާފާސްކޮށްފައިވާ ކަމަށް ވަނީ ތުހުމަތުކޮށްފައެވެ.

މި މައުލޫމާތުތައް މީސްމީޑިއާގައި ހާމަކުރި މުހައްމަދު ތަސްލީމްގެ ޕްރޮފައިލްގައި ބުނެފައިވާ ގޮތުން އޭނާ އަކީ ފްރީލާންސް ލޯޔަރެކެވެ. އަދި އިޖުތިމާއީ ކަންކަމުގައި މަސައްކަތް ކުރާ މީހެއްވެސްމެއެވެ. ނަމަވެސް ތުހުމަތުކުރާ މައްސަލަ އާއި އޭނާ އާއި ހުރީ ކޮންގުޅުމެއްކަން އޭނާ ހާމަކޮށްފައެއް ނުވެއެވެ.

އޭނާ ވަނީ މީސްމީޑިއާގައި މި މައްސަލަ އާއި ގުޅޭ މައުލޫމާތު ހިމެނޭ ކޯޓު އަމުރެއް ވެސް ހިއްސާކޮށްފައެވެ. އެ ކޯޓު އަމުރަކީ ތަންތަނާއި ތަކެތި ބަލާ ފާސްކުރަން ދީފައިވާ އަމުރެކެވެ. އެ ކޯޓު އަމުރުން އެނގޭ ގޮތުން އެއީ މަސްތުވާތަކެތީގެ މައްސަލަ އަކާއި ގުޅިގެން ގެއާއި ތަކެތި ބަލާ ފާސްކުރަން ދީފައިވާ ކޯޓު އަމުރެކެވެ.

ތ.ވޭމަންޑޫގައި ކުޑަ ދެކުއްޖެއްގެ ހަށިގަނޑުގައި އަތްލައިގެން ފާސްކުރި ކަމަށް ބުނާ ވާހަކަ ފުލުހުން ވަނީ ދޮގުކޮށްފައެވެ. ރާއްޖެއެމްވީ އަށް މައުލޫމާތު ދެމުން ފުލުހުން ބުނީ މި މައްސަލައިގައި ބުނާ ކޯޓު އަމުރު ތަންފީޒުކުރުމުގައި އެއްވެސް ކުޑަކުއްޖެއްްގެ ގައިގައި އަތްލާފައި ނުވާނެ ކަމަށެވެ.

މިކަމާއި ގުޅޭ އިތުރު މައުލޫމާތު ހޯދުމަށް ފުލުހުންގެ ތަރުޖަމާން އަހުމަދު ޝިފާން އާއި ގުޅުމަށް ރާއްޖެ އެމްވީން ކުރި މަސައްކަތް ވަނީ ކާމިޔާބުވާގޮތް ނުވެފައެވެ.