މިހާރު މި ހިނގަމުންދާ 20 ވަނަ ރައްޔިތުންގެ މަޖިލިސްގެ ހިންގާ ގަވައިދު ފާސްކޮށްފިއެވެ.
މި ޤަވައިދު އާންމު ކޮމިޓީން ނިންމި ގޮތަށް ފާސްކޮށްފައިވަނީ ބުދަ ދުވަހުގެ މަޖިލިސް ޖަލްސާގައި ބައިވެރިވެވަޑައިގެންނެވި 64 މެމްބަރުންގެ ވޯޓާއެކުއެވެ.
20 ވަނަ ރައްޔިތުންގެ މަޖިލިސް ހިންގާ ގަވައިދެއް އެކުލަވާލެވެންދެން 19 ވަނަ މަޖިލީހުގެ ގަވައިދަށް ޢަމަލުކުރުމަށް މަޖިލީހުގެ ފުރަތަމަ ޖަލްސާގައި ވަނީ ފާސްކޮށްފައެވެ. އެގޮތުގެ މަތިން އާންމު ކޮމިޓީން ވަނީ ޤަވައިދު އެކުލަވާލުމުގެ މަސައްކަތް ކުރިއަށް ގެންގޮސްފައެވެ.
19 ވަނަ މަޖިލީހުގެ ހިންގާ ގަވައިދަށް އަމަލުކުރުމަށް އޭރު ހުށަހެޅުއްވީ ޕީއެންސީގެ ޕާލަމެންޓަރީ ގްރޫޕުގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހެވެ.
އޭނާ ހުށަހަޅުއްވާފައި ވަނީ މަޖިލީހުގެ މަސައްކަތްތައް މެދުކެނޑުމެއް ނެތި ކުރިއަށް ގެންދިއުމަށްޓަކައި 19 ވަނަ މަޖިލީހުގެ ގަވައިދާ އެއްގޮތަށް އާ މަޖިލީހުގެ މަސައްކަތްތައް ކުރިއަށް ގެންދިއުމަށެވެ.
