ނޫނޭވާ ސާބަހެވެ. ވެރިކަމަށް އައީ ކުރީގެ ސަރުކާރުން ކަންކަން ސާފުކޮށް ނުދޭތީއެވެ. ކަންކަން ސިއްރު ކުރާތީއެވެ. ބައެއް ޑިޕްލޮމެޓިކް އެއްބަސްވުންތައް ހާމަ ނުކޮށްގެން ހީވީ ބޮލަށް އުޑު ވެއްޓިގެން އުޅޭހެންނެވެ. ބުނަމުން ދިޔައީ ތިމަންމެންގެ ސަރުކާރެއްގައި ރައްޔިތުންނަށް ފޮރުވަންޖެހޭނެ އެއްވެސް އެއްޗެއް ނޯންނާނެ ކަމަށެވެ. ހާމަ ނުކޮށް ސިއްރު ކުރާނެ ސަރުކާރުގެ އެއްވެސް ލިޔެކިޔުމެއް ނުބާއްވާނެ ކަމަށެވެ. މައުލޫމާތެއް ހޯދާކަށް ނޫސްވެރިއަކުވިއަސް އަދި އެހެން މީހަކުވިއަސް ކޮންމެހެން އާރުޓީއައި (ރައިޓް ޓު އިންފޮމޭޝަން) ލާކަށްވެސް ނުޖެހޭނެ ކަމަށެވެ. އެއަށްވުރެ ކުރިން އެއެއްޗެއް ސާފުކޮށް ހާމަކުރާނެ ކަމަށެވެ.

އެކަމަކު ކީހާ ޅެން މިވީ ފަރިއްސަށެވެ. އިންތިޚާބުގެ ކެންޕޭނުގައި ދެއްކިހާ ހުވަފެން މިވީ ބިލާހަކަށެވެ. ކެނޑިހާފޮނި މިވީ ބޮޑެތި ފެންނެތް ބޮޑެތި ކާށިތަކަކަށެވެ. މައުލޫމާތު ފޯރުކޮށްދޭނެކަމަށްވީ ވައުދު މިވީ ރުކަށް އެރިމީހާގެ ނަދުރާ އެއްފަދަ އެއްޗަކަށެވެ.

އާރުޓީއައި ފޮނުވަން ނުޖެހޭނެ ކަމަށް ބުނީކީ ކެންޕޭން ކުރަން އުޅުނު އާދައިގެ ރޮނގާލިފައްޗެއް ނޫނޭވެ. ސީދާ މިހާރުގެ ރައީސުލް ޖުމްހޫރިއްޔާއެވެ. އޭރުގެ އިދިކޮޅު ލީޑަރު ޑރ މުހައްމަދު މުއިއްޒެވެ. އެވިދާޅުވި ފޮނި ބައިސާތަކަށް ހެއްލިގެން ރައްޔިތުން ދިން ވޯޓުން އިންތިޚާބުވިތާ އަދި މިއުޅެނީ އަހަރެއްވެސް ހަމަނުވެއެވެ. ހުރިހާކަމެއް މުޅިން އެފުށް މިފުށަށް ޖެހުނީއެވެ. ކުރީގެ ސަރުކާރުން މައުލޫމާތު ހާމަކުރިވަރާ ގާތައްވެސް އެއްޗެއް ހާމަ ނުކުރަނީއެވެ. ހުރިހާ ކަމެއް ސިއްރެވެ. ކުޑަމިނުން ސަރުކާރުގެ ސިޔާސީ މަގާމްތަކުގެ އަދަދު ވެސް އުޅުއްވަނީ ގަންނާ ކުރައްވާ ބިރުން ސިއްރު ކުރައްވައިގެންނެވެ. ދޭދޭ ގައުމުތަކުގެ މެދުގައި ދެކެވޭ ވާހަކަތަކާއި ވެވޭ އެއްބަސްވުންތައް އޭރު ހާމަ ނުކުރީމާ ނުކުތް މިހާރުގެ ރައީސް މީހާއަށް އެހުރިހާ އެއްޗިއްސަކީވެސް ގައުމީ ބޮޑެތި ސިއްރެވެ. ގައުމީ ސަލާމަތަށް ކޮންމެހެން ހިފަހައްޓަން ޖެހޭ ބޮޑު ސިއްރުތަކެވެ. އޭރު ދެއްކެވި ވާހަކަތައް ކެންސަލްވީއެވެ. ކުރިން ބުނި އެތި ހަމަ ރަނގަޅަށްވެސް ކެންސަލްވީއެވެ.

ނޫސްވެރިންނަށް ފިއްލަވާން މުޅިން އެހެން މަޅިއެއްވެސް ޖެއްސެވިއެވެ. ޚުދު ރައީސް މީހާއެވެ. ނިމިދިޔަ ރައްޔިތުންގެ މަޖިލީހުގެ ކެންޕޭނަށް ޖެއްސެވި ކަޑައެއްގެ ގޮތުގައެވެ. ވީޑިއޯ މެސެޖަކުން ނުވަތަ ކޯލަކުން މީހުންނަށް މައުލޫމާތު ހިއްސާ ކުރެއްވުމެވެ. ދުރާލާ ރޭވިގެން ސުވާލުތައް ދެވިގެން ވަޒީރުން ލައްވާވެސް މައުލޫމާތު ހާމަކުރުމުގެ ޑްރާމާއެއްވެސް ކުޅުއްވިއެވެ. އެވެސް އިންތިޚާބާއެކު އޮބާލީއެވެ.

މައުލޫމާތު ހޯދަން ނޫސްވެރިން ކެނޑިނޭޅި އާދޭސް ކުރަމުންދަނީއެވެ. އެކަމަކު ސަރުކާރަކާ ސަރުކާރެކެވެ. ކަހާތަން ހިރުވާވެސް ނުލައެވެ. ތަށަށް ކިޔަނީ މަރިޔަބުހޭވެސް އަހާނުލައެވެ. މައުލޫމާތު ހާމަކުރަންޖެހޭނެކަމަށް ލާޒިމްކޮށް ހަދާފައިވާ ޤާނޫނުގެ ދަށުން ނޫސްވެރިންނާއި އާއްމުން މައުލޫމާތު ހޯދުމަށް ފޮނުވި އާރުޓީއައިތައް އިންތިހާގައެވެ. އެއަށް ޖަވާބު ދިނުން ހަތްހަރާމުން ހަރާމެވެ.

ނަތީޖާއެއްގެ ގޮތުން އެގާނޫނުގެ ދަށުނ އަެކަން ބަލަހައްޓަން ހަވާލުކޮށްފައިވާ ދައުލަތުގެ މުއައްސަސާއިން އެވަނީ ގާނޫނު ނަގަހައްޓަން އޮތް އެންމެ އިސްފަރާތް ސަރުކާރު ގާނޫނަށް ތަބާ ނުވެގެން ފިޔަވަޅު އަޅައިދިނުމަށް ޕްރޮސެކިއުޓަރ ޖެނެރަލްގެ އޮފީހަށް ހުށަހަޅާފައެވެ.

މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން ހޯދަން އެދޭ މައުލޫމާތު ދިނުމަށް، އިންފޮމޭޝަން ކޮމިޝަނަރުގެ އޮފީސް (އައިކޮމް) އިން އެންގުމުންވެސް ރައީސް އޮފީހުން އެންގުމަށް ތަބާނުވާތީ ފިޔަވަޅު އަޅައިދިނުމަށް އެދި މައްސަލަ އެވަނީ ހުށަހަޅާފައެވެ.

އައިކޮމް އިން މި މައްސަލަ ހުށަހެޅީ ޕްރޮސެކިއުޓާ ޖެނެރަލް (ޕީޖީ) ގެ އޮފީހަށެވެ. މިކަމާ ގުޅިގެން އިންފޮމޭޝަން ކޮމިޝަނަރު އަހުމަދު އާހިދު ރަޝީދު ބައެއް މީޑިއާތަކަށް ވިދާޅުވީ މައްސަލަ ހުށަހަޅަން ނިންމީ ރައީސް އޮފީހުން މައުލޫމާތު ދޭން އެންގި އެންގުމަށް އަމަލު ނުކުރުމުން ކަމަށެވެ.

އައިކޮމް އިން ހުށަހެޅި މައްސަލައާ ގުޅިގެން މައުލޫމާތު ދެއްވަމުން މީޑިއާ އޮފިޝަލް އަހުމަދު ޝަފީއު ވިދާޅުވީ، އައިކޮމް އިން އެދިފައިވަނީ ޖިނާއީ ދައުވާއެއް ކުރުމަށް ކަަމަށް ވާތީ އެ މައްސަލަ މިހާރު ފުލުހުންނަށް ހުށަހަޅާފައިވާ ކަމަށެވެ.

"ތަހުގީގީ އިދާރާއަކުން ދެއްތޯ ޖިނާއީ ތަހުގީގެއް ހިންގަންޖެހޭނީ، ޕީޖީ އޮފީހުން ފުލުހުންގެ ކިބައިން އެދިފައިވާނީ މިކަމުގައި ޖިނާއީ ކުށުގެ އަމަލެއް ހިނގާފައިވޭތޯ ބަލާ އެކަން ހުށަހަޅަން،" ޝަފީއު ވިދާޅުވި އެވެ.

އާރުޓީއައި ގާނޫނުގައި ބުނަނީ، އައިކޮމްގެ ނިންމެއް އިސްތިއުނާފުނުކޮށް، އެ ނިންމުމަށް އަމަލު ނުކޮށް 45 ދުވަސް ފާއިތުވެއްޖެ ނަމަ، އަމުރަށް ނުކިޔަމަންތެރިވުމުގެ މައްސަލަ ޝަރުއީ ކޯޓަށް ފޮނުވުމަށް އެދި، ޕްރޮސިކިއުޓަ ޖެނެރަލްގެ އޮފީހަށް ހުށަހެޅޭނެ ކަމަށެވެ.

މިފަދަ މައްސަލައެއްގައި މިހާތަނަށް ދައުލަތުގެ އެއްވެސް އޮފީހަކާމެދު ފިޔަވަޅު އަޅައިފައެއް ނުވެ އެވެ.

ގާނޫނުގެ ދަށުން ހިފެހެއްޓެން ނެތް އެ މައުލޫމާތަށް އެދި ހުށަހެޅި ހުށަހެޅުމަށް އެއްވެސް ޖަވާބެއް ނުދޭއިރު، އެ މައްސަލަތަކުގެ އަޑުއެހުމެއްގައި ވެސް ރައީސް އޮފީހުން ބައިވެރިނުވެ އެވެ. އެކި މައްސަލަތަކުގައި މިފަހުން ބޭއްވި ހުރިހާ އަޑުއެހުމަކީ ވެސް އެކި ދުވަސް މަތިން ތާވަލުކުރުމަށް ފަހު ރައީސް އޮފީހުގެ އެދުމުގެ މަތިން ފަސްކުރުމަށް ފަހު، ގާނޫނުގައި ބުނާ މުއްދަތު ހަމަވާތީ އައިކޮމްއަށް މަޖުބޫރުވެގެން ބާއްވާފައިވާ އަޑުއެހުންތަކެވެ.

"ރައީސް އޮފީހަކީ ސަރުކާރުގެ އެންމެ އިސް އިދާރާއަށް ވެފަ، ރައީސް އޮފީހުން މިކަމަށް އެއްގޮތަކަށްވެސް އަޅާނުލާތަން ފެނުން އެއީ ހަގީގަތުގަ މި ހައްގު އެއްކޮށް ބަލިކަށި ކޮށްލެވިދާނެ ކަމެއް،" އިންފޮމޭޝަން ކޮމިޝަނަރު އާހިދު ވިދާޅުވެފައިވެ އެވެ.

ކިހާރީތި ހެއްޔެވެ. ގާނޫނު ނަގަހައްޓަން އަދި ގާނޫނަށް ރައްޔިތުން ބޯލަންބުވަން އޮތް ގާނޫނީ ސަރުކާރުން ގާނޫނާ ޚިލާފްވީއެވެ. މައުލޫމާތު ހާމަކުރަން އައި ފަރާތްތަކުގެ ވަތުބަތާނަ ކަޝްފުވެ ހަގީގީ ކުލަ ފެނުނީއެވެ. ދެންވެސް ސަރުކާރަށް ސަނާކިޔަން ފައިސާދީފައިތިބި ކުދިންކޮޅު ބާރަށް އަތްޖަހާށެވެ. ދެއަތް ފޫދަންދެން ހުއްޓާނުލައި އަތްޖަހާށެވެ. މަވާ ސަލާމެވެ.