ޔަމަން އަށް އިޒްރޭލުން ބޮން އަޅައިފި

ހުކުރު ދުވަހު އިޒްރޭލަށް ދިން ޑްރޯން ހަމަލާ ގެ ބަދަލު ހިފުމުގެ ގޮތުން ޔަމަން އަށް އިޒްރޭލުން ހޮނިހިރު ދުވަހު ބޮން އަޅައިފިއެވެ.

ބޮން އަޅާފައިވަނީ ޔަމަންގެ ޕޯޓް ސިޓީ ހުދެއިދާ އަށް ކަމަށް އިޒްރޭލުގެ އަސްކަރިއްޔާ އިން ބުނެފައިވެއެވެ.

ޔަމަންގެ އަލް މަސީރާ ޓީވީ އާ ހަވާލާ ދީ އަލް ޖަޒީރާ އިން ބުނެފައިވަނީ އިޒްރޭލުން ބޮން އެޅީ ތެޔޮ ރައްކާކުރާ ތަންތަނަށާއި އިންޖީނުގެ އަކަށް ކަމަށެވެ.

މަންޒަރުތަކުން ފެންނަ ގޮތުގައި އިމާރާތްތަކުގައި ރޯވެ މުޅި ސަރަހައްދަށް ވަނީ އަލިފާންގަނޑު ފެތުރިފައެވެ.

ހަމަލާގައި މީހުން މަރުވެފައިވާ ކަމަށާއި ޒަޚަމްވެފައިވާ ކަމަށްވެސް ސިއްހީ އޮފިޝަލުންނާ ހަވާލާދީ އަލް މަސީރާ ޓީވީން ބުނެފައިވާ ކަމަށް އަލްޖަޒީރާ އިން ބުނެއެވެ.

އިޒްރޭލުން ބުނެފައިވަނީ ހަމަލާ ދިނީ "އަސްކަރީ މަރުކަޒް ތަކަށް" ކަމަށެވެ.

ގާޒާ ގައި އިޒްރޭލުން ހިންގާ އަނިޔާވެރި ހަނގުރާމަ އަށް ބަދަލު ހިފުމުގެ ގޮތުން, ޔަމަންގެ ރަސްމީ އަސްކަރިއްޔާގެ ގޮތުގައި ތަމްސީލް ކުރާ ހޫތީ ޖަމާއަތުން ގެންދަނީ ރަތްކަނޑުން ދަތުރުކުރާ އިޒްރޭލާ ގުޅުން ހުރި ކަމަށް ބުނާ އާގު ބޯޓު ފަހަރަށް ހަމަލާ ދެމުންނެވެ.

އޭގެ އިތުރުން އިޒްރޭލަށް ޑްރޯން އާއި ބެލަސްޓިކް ރޮކެޓް ހަމަލާތައް ވެސް ހޫތީން ދީފައިވެއެވެ. އޭގެ ގިނަ ހަމަލާތައް ހުއްޓުވާފައިވާ ކަމަށް އިޒްރޭލުން ބުނެއެވެ.

އެހެން ނަމަވެސް ހުކުރު ދުވަހުގެ ހެނދުނު އިޒްރޭލުގެ ދިފާއީ ނިޒާމު ފޫއަޅުވާ ލުމަށްފަހު ތެލް އަވީވަށް ހޫތީންގެ ދިން ޑްރޯން ހަމަލާ ވެގެން ދިޔައީ އިޒްރޭލަށް ކުއްލި ސިހުމެއް ލިބިގެން ދިޔަ ކަމެއް ކަމަށް ޚަބަރުތައް ބުނެއެވެ.

އިޒްރޭލުން ބޮންއެޅުމުގެ ސަބަބުން މީހުން މަރުވެފައިވާ ކަމަށާއި ޒަޚަމްވެފައިވާ ކަމަށްވެސް ސިއްހީ އޮފިޝަލުންނާ ހަވާލާދީ އަލް މަސީރާ ޓީވީން ބުނެފައިވާ ކަމަށް އަލްޖަޒީރާ އިން ބުނެއެވެ. މަރުވި މީހުންގެ އަދަދެއް އަދި ޒަޚަމްވި މީހުންގެ އަދަދެއް އަދި ސާފެއް ނުވެއެވެ.

ޔަމަން އަށް ހަމަލާ ދިނުމުގައި 12 ހަނގުރާމަމަތީ ފައިޓަރޖެޓް ބައިވެރިވި ކަމަށާއި އޭގެ ތެރޭގައި އެންމެ ޒަމާނީ އެފް-35 ބޯޓު ފަހަރު ބައިވެރިވި ކަމަށް ތެހެރާން ޓައިމްސް އިން ބުނެފައިވެއެވެ.

އިޒްރޭލުގެ ހަމަލާ އާ ގުޅިގެން ޔަމަނުގެ އަންސަރުﷲ އިން ބުނެފައިވަނީ މަދަނީ ތަންތަނަށް އަމާޒުކޮށް އިޒްރޭލުން ދިން އަނިޔާވެރި ހަމަލާގެ މަގުސަދަކީ އާންމު ރައްޔިތުންނަށް އިތުރު ހިތްދަތިކަން ގެނުވާ، ޔަމަނުން ގާޒާ އަށް ކުރަމުންދާ ތާއީދު ހުއްޓުވާލުން ކަމަށެވެ.

"އެހެން ނަމަވެސް ﷲ އިރާދަ ކުރެއްވިއްޔާ އެ ހުވަފެން ދުވަހަކުވެސް ހަގީގަތަކަށް ނުވާނެ،" އަންސަރުﷲގެ ތަރުޖަމާނު މުހައްމަދު އަބްދުއްސަލާމް ސޯޝަލް މީޑިއާ ގައި ކޮށްފައިވާ ޕޯސްޓެއްގައި ވެއެވެ.

 އަބްދުއްސަލާމް ބުނެފައިވަނީ އިޒްރޭލުގެ އަނިޔާވެރި ކަމުގެ ސަބަބުން އެމީހުންގެ ހިތްވަރު އިތުރުވުން ނޫން ކަމެއް ނުވާނެ ކަމަށެވެ.