ބިދޭސީ އެކޮމޮޑޭޝަންގެ މަސައްކަތް ރާއްޖޭގެ ކުންފުނިތަކަށް ކުރެވޭނެ، އެ ފައިސާ ރާއްޖެއިން ބޭރުވާނަމަ ކަންބޮޑުވޭ - އާޒިމް
18 ޖުލައި 2024 | ބުރާސްފަތި 09:36އެ މަސައްކަތް އޮތީ ނެގޯސިއޭޝަންގެ މަރުހަލާގައި ކަމަށް އިހުސާން ވަނީ ވިދާޅުވެފަ
ބިދޭސީން އަނބުރާ ގައުމަށް ފޮނުވާލަން ކުރި މަސައްކަތްތަކުގެ ތެރެއިން
މެލޭޝިއާ ކުންފުންޏަކަށް ބިދޭސީ އެކޮމޮޑޭޝަންތަކުގެ މަސައްކަތް ދިނުމުގެ ބަދަލުގައި ސަރުކާރުން ރާއްޖޭގެ ކުންފުންޏަކަށް އެ މަސައްކަތް ދިން ނަމަ މާރަނގަޅު ވާނެ ކަމަށް މާލެ ސިޓީ ކައުންސިލްގެ މޭޔަރ އާދަމް އާޒިމް ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ،
1 މާރޗް 2024ގައި ހޯމް މިނިސްޓްރީ އަށް މެލޭޝިއާގެ އަލްޓައިޒް ކިޔާ ކުންފުންޏަކުން ރާއްޖޭގައި ޑޯމެޓަރީސް އެޅުމާއި ގުޅޭ ޕްރޮޕޯޒަލް އެއް އިސްވެ ހުށަހަޅާފައިވާކަން ހޯމް މިނިސްޓްރީން ހާމަކުރީ ނިމިދިޔަ ހަފްތާގެ ތެރޭގައެވެ. ސަރުކާރުން ހާމަކޮށްފައިވާ ގޮތުން އެ ކުންފުނިން ހުށަހެޅީ ނޭޝަނަލް މައިގްރެންޓް ވޯކަރސް ޑޯމެޓަރީސް އެޅުމުގެ ޕްރޮޖެކްޓެއް ކުރިއަށް ގެންގޮސްދިނުމަށެވެ. އެ ހުށަހެޅުމުގައި އެ ޕްރޮޖެކްޓަށް އެއްކޮށް ފަންޑުކުރާނީ އެ ކުންފުނިން ކަމަށް ސަރުކާރުން ބުނެއެވެ. އަދި ރާއްޖޭގައި މާލެ ސަރަހައްދުގައި ލައްކަ އެއްހާ ބިދޭސީން އުޅޭކަމަށް އެ ކުންފުނީގެ ދިރާސާއިން އެނގޭތީ އެ ކުންފުނިން ހުށަހަޅާފައިވަނީ ލައްކައެއްހާ މިހުންނަށް ތިބެވޭ އެކޮމޮޑޭޝަންތަކެއް ޤާއިމްކުރުމަށް ކަމަށް ސަރުކާރުން ބުނެއެވެ.
އެކަން ހާމަކޮށްދެއްވީ ސަރުކާރުން ބޭއްވި ނޫސްވެރިންގެ ބައްދަލުވުމެއްގައި ހޯމް މިނިސްޓަރ އަލީ އިހުސާންއެވެ. އެކަން ކުރާނީ ސަރުކާރުން ނަގާ ބިމެއްގައި ކަމަށް ވެސް އެ ޕްރޮޕޯޒަލްގައިވެއެވެ. ފުރަތަމަ ޕްރޮޕޯޒްކުރީ 120 ޑޮލަރު މަހެއްގެ މައްޗަށް ބޮލަކަށް ނަގަން ކަމަށް އިހުސާން ވިދާޅުވިއެވެ. ފަހުން އެދަދަދު 100 ޑޮލަރަށް ތިރިކުރަން ވާހަކަ ދެކެވިފައިވާ ކަމަށް އިހުސާން ވިދާޅުވިއެވެ. އަދި މިހާރުވެސް އެކޮމޮޑޭޝަންގެ ގޮތުގައި އެވްރެޖްކޮށް 1500 ރުފިޔާ އާއި 2000 ރުފިޔާގެ އަަދަދެއް ދޭ ކަމަށާއި ޕްރޮޕޯޒަލްގެ ބޭސްލައިނަކީ ވެސް އެއީ ކަމަށް އިހުސާން ވިދާޅުވިއެވެ. އެ ޚިދުމަތް ދޭއިރުގަ އެތަނުގައި ތިބި މީހުންނާއި، އެ ތަނުގައި ތިބި މީހުން އުޅެނީ ޤަވާއިދާއި އެއްގޮތަށްކަން އެނގޭނެ ފަދަ ސިސްޓަމެއް ޤާއިމްކޮށްދިނުމަށް ވެސް ހުށަހަޅާފައިވާ ކަމަށް އިހުސާން ވިދާޅުވިއެވެ. އަދި އެ ނިޒާމްގެ ތެރެއިން މީހުން އަންނަ ގަޑި އާއި ދާ ގަޑިވެސް އެނގޭނެ ކަމަށް އިހުސާން ވިދާޅުވިއެވެ.
އެކަމާއި ގުޅޭގޮތުން އާޒިމް ވިދާޅުވީ އެ މަޝްރޫޢު ކުރިއަށް ގެންދަނީ ސަރުކާރުން ގެރެންޓީ ދޭގޮތަށް ކަމަށެވެ. އެ ގެރެންޓީ ދިވެހި ކުންފުންޏަކަށް ދޭ ނަމަ އެކަން ދިވެހި ކުންފުނިތަކުން ވެސް ކުރާނެކަމަށާއި އެ ޤާބިލްކަން ރާއްޖޭގެ ކުންފުނިތަކުގައި ހުންނާނެ ކަމަށް އާޒިމް ވިދާޅުވިއެވެ. ދިވެހި ކުންފުނިތަކަށް އެ ފުރުސަތު ދިނުން ވަރަށް މުހިންމު ކަމަށް ވެސް އޭނާ ވިދާޅުވިއެވެ. ޚާއްސަގޮތެއްގައި އިގްތިޞާދީގޮތުން ދަށް މި ހާލަތުގައި އެފަދަ މަސައްކަތްތައް ދޭން ޖެހޭނީ ރާއްޖޭގެ ކުންފުނިތަކަށް ކަމަށް އޭނާ ވިދާޅުވިއެވެ، ސަރުކާރުން ގެރެންޓީ ދޭ ނަމަ ރާއްޖޭގެ ބެންކުތަކުން އެ ފައިސާ ދޭނެ ކަމަށާއި އެ ފައިސާ ރާއްޖޭގައި ހިފެހެއްޓޭނެ ކަމަށް އާޒިމް ވިދާޅުވިއެވެ.
އެ މަސައްކަތް ނިމޭއިރު ހުޅުމާލެ ފޭސް 1ގައި 20،000 ބިދޭސީން، ފޭސް 2ގައި 20،000 ، މާލޭގައި 40،000 އަދި ތިލަފުށީގައި 20،000 މީހުން ތިބެނޭ ކަމަށް ބެލެވޭ ކަމަށް ސަރުކާރުން ބުނެއެވެ. އެ ޕްރޮޕޯޒަލް އިވަލުއޭޓްކުރުމަށް 13މޭ ގައި އިންވެސްޓް މޯލްޑިވްސް އަށް ފޮނުވުމުން ޖޫން 9ގައި ބިލް އިވަލުއޭޓްކުރުމަށް ފަހު އިންވެސްޓް މޯލްޑިވްސް އިން ފޮނުވާފައިވާ ކަމަށް ސަރުކާރުން ވަނީ ބުނެފައެވެ. އެއީ ކުރަން ރަނގަޅުކަމެއް ކަމަށް އިކޮނޮމިކް ކައުންސިލުން ނިންމި ނަމަވެސް އެއްވެސް ބަޔަކަށް ކޮމިޓްމެންޓެއް ދީފައި ނުވާ ކަމަށާއި ފައިނަލް އަދަދުތަކާއި ހިސާބަށް ވެސް ގޮސްފައި ނުވާ ކަމަށް ހޯމް މިނިސްޓަރ އިހުސާން ވަނީ ވިދާޅުވެފައެެވެ. އެ މަސައްކަތް އޮތީ ނެގޯސިއޭޝަންގެ މަރުހަލާގައި ކަމަށް އިހުސާން ވަނީ ވިދާޅުވެފައެވެ.
