ޕެހެލާޖް ނިހަލާނީ ވަކިކޮށް ޕްރަސޫން ޖޯޝީ ސެންސަރު ބޯޑަށް އައްޔަންކޮށްފި
ނިހަލާނީ ސެންސަރުބޯޑުގެ ޗެއާމަނަކަށް އައްޔަންކޮށްފައިވަނީ 2015 ވަނަ އަހަރުގައި
ޕެހެލާޖް ނިހަލާނީ
އިންޑިއާގެ ސެންޓްރަލް ބޯޑް އޮފް ފިލްމް ސަޓިފިކޭޝަން (ސީބީއެފްސީ) ގެ ޗެއާމަން ޕެހެލާޖް ނިހަލާނީ ވަކިކޮށް ޕްރަސޫން ޖޯޝީ ސެންސަރު ބޯޑަށް އައްޔަންކޮށްފިއެވެ.
ޕެހެލާޖް ނިހަލާނީ ސެންސަރު ބޯޑުން ވަކިކޮށްފައި ވަނީ އިންޑިއާގެ ފިލްމުތައް ސެންސަރުކުރުމުގައި އޭނާ ގެންގުޅޭ ހަރުކަށި އުސޫލުތަކަށް އެތަކެއް ބައެއްގެ ފާޑުކިއުން އަމާޒުވެފައި ވަނިކޮށެވެ. އިންޑިއާގެ ފިލްމީ ދާއިރާގެ މީހުން ގަބޫލު ކުރާގޮތުގައި ޕެހެލާޖް ނިހަލާނީ ސެންސަރު ބޯޑުން ވަކިކޮށް ޕްރަސޫން ޖޯޝީ އައްޔަންކުރުމުން ފިލްމުތައް ސެންސަރުކޮށް ނެރުން ފަސޭހަވެގެންދާނެއެވެ.
ނިހަލާނީ ސެންސަރުބޯޑުގެ ޗެއާމަނަކަށް އައްޔަން ކޮށްފައިވަނީ 2015 ވަނަ އަހަރުގައެވެ.
ނިހަލާނީ ވަނީ މީގެ ކުރިން ހިންދީ ފިލްމުތައް ވެސް އުފައްދާފައެވެ. އޭގެ ތެރޭގައި ޝޯލާ އޯރް ޝަބްނަމް އާއި "އާންކޭ" ހިމެނެއެވެ.
އޭނާ ސެމްސަރުބޯޑުން ވަކިކުރުމުން ބުނެފައި ވަނީ އޭނާގެ ޗެއާމަންކަމުގައި މަސައްކަތް ކޮށްފައި ވާނީ ހަމަހަމަކަމާއެކު ރަނގަޅަށް ކަމަށާއި ފިލްމުތައް އާންމުންނާއި ހަމައަށް ގެނެސްދޭއިރު އެއީ އާންމުންނަށް ބަލަން ހެޔޮވާވަރުގެ ފިލްމުތައް ހެދުމަށް ކަމަށެވެ. އަދި އޭނާ ސެންސަރު ބޯޑުގެ ޗެއާމަނަކަށް އައްޔަން ކުރި އިރު އެ ބޯޑަކީ ވަރަށް ކޮރަޕްޓް ތަނެއް ކަމަށްވުމުން އެކި ގޮންޖެހުންތަކާއި ދިމާވި ކަމަށް އޭނާ ބުންޏެވެ.
ނިހަލާނީ ބުނީ ޗެއާމަން ކަމުން އޭނާ ވަކިކުރިކަމުގައި ވިއަސް އިންޑިއާގެ ފިލްމީދާއިރާއިން އޭނާ ނުގެއްލޭނެ ކަމަށެވެ. އެހެންކަމުން އޭނާ ފިލްމު ހެދުމުގެ ކަންތައްތަކާއިގެން ކުރިއަށްދާން ނިންމާފައިވާ ކަމަށާއި ވަރަށް އަވަހަށް އެމަސައްކަތް ކުރިއަށް ގެންދާނޭ ކަމަށެވެ.
