މ.މުލީގައި ކަރަންޓު ނެތްތާ 24 ގަޑި އިރު
ޖަނަރޭޓަރގައި މައްސަލަ ޖެހުނީ އޭގެ ރޭޑިއޭޓަރ ސާފުނުކުރެވިގެން
މ.މުލި - ކަރަންޓުގެ މައްސަލަ އަށް ދާއިމީ ހައްލެއް ލިބޭނެ އިރެއް ބުނާކަށް ނޭނގޭ
މ.މުލީގައި ކަރަންޓު ނެތްތާ 24 ގަޑި އިރަށް ވުރެ ގިނަ ވެފައިވާތީ އާއްމުން ކަންބޮޑުވުން ފާޅުކުރަން ފަށައިފިއެވެ.
ރާއްޖެއެމްވީ އަށް މައުލޫމާތުދެމުން އެ ރަށު އާއްމު މީހަކު ބުނެފައި ވަނީ އެ ރަށުން ކަރަންޓު ކެނޑިފައި ވަނީ އިއްޔެ ހެނދުނު 08:15 ހާއިރު ކަމަށެވެ.
އަދި މިއަދުގެ ވަގުތެއްގައި އެކި ހިސާބުތަކަށް ބަހާލައިގެން 30 މިނެޓަށް ކަރަންޓް ދެމުންދާ ކަމަށް އޭނާ ވަނީ ބުނެފައެވެ.
އެހެންނަމަވެސް ކަރަންޓުގެ މައްސަލަ އަށް ދާއިމީ ހައްލެއް ލިބޭނެ އިރެއް ބުނަން ނޭނގޭ ކަމަށް އޭނާ ވަނީ ބުނެފައެެވެ.
އޭނާ ބުނީ އެ ރަށުގައި ކަރަންޓުގެ ޚިދުމަތް ދެމުން އައީ 500 ކިލޯވޯޓާއި، 450 ކިލޯވޯޓް އަދި 600 ކިލޯވޯޓްގެ ޖަނަރޭޓަރތަކެއް ބޭނުންކޮށްގެން ކަމަށެވެ.
އޭގެ ތެރެއިން 600 ކިލޯވޯޓްގެ ޖަނަރޭޓަރ ނޫން ދެން ހުރި ޖަނަރޭޓަރތައް ހުރީ މީގެ ކުރިން ވެސް ހަލާކުވެފައި ކަމަށް އޭނާ ވަނީ ބުނެފައެވެ.
އެހެންނަމަވެސް އިއްޔެ 600 ކިލޯވޯޓްގެ ޖަނަރޭޓަރގައި ވެސް މައްސަލަ ޖެހިފައިވާ ކަމަށާއި އެ ޖަނަރޭޓަރގައި މައްސަލަ ޖެހުނީ އޭގެ ރޭޑިއޭޓަރ ސާފުނުކުރެވިގެން ކަމަށް ރާއްޖެ އެމްވީ އާއި ވާހަކަދެއްކި އާއްމު މީހާ ވަނީ ބުނެފައެވެ.
އެ ރަށުގައި ރެޖިސްޓަރކޮށްފައިވާ މީހުންގެ އާބާދީއަކީ ގާތްގަނޑަކަށް 1100 މީހުންނެވެ. ނަމަވެސް ރަށުގެ ދިރިއުޅޭ އާބާދީ 1800އަށް އަރައެވެ.
އެ ރަށުގެ ކަރަންޓުގެ މައްސަލަ ހައްލު ކުރެވޭނެ ވަގުތެއް ސާފުކުރުމަށް އެ ރަށުގެ ފެނަކަ އިންޖީނުގޭގެ މެނޭޖަރަށް ގުޅުމުން ޖަވާބު ނުދެއްވާތީ އެ މައުލޫމާތު ވަނީ ސާފުވާގޮތް ނުވެފައެވެ.
