ސައްހަ ނޫން ލިޔެކިއުންތައް ބޭނުންކޮށްގެން ރާއްޖެއަށް އެތެރެވާން މަސައްކަތް ކޮށްފައިވާ 1664 މީހުން ހުއްޓުވައިފި
ޓޫރިސްޓް ވިސާގައި ރާއްޖެ އެތެރެވުމަށް ދަނީ މަސައްކަތް ކުރަމުން
ބުދަ ދުވަހު ބޭއްވި ނޫސްވެރިންގެ ބައްދަލުވުމުގެ ތެރެއިން
ފާއިތުވި 8 މަސް ދުވަހުގެ ތެރޭގައި ސައްހަ ނޫން ލިޔެކިއުންތައް ބޭނުންކޮށްގެން ރާއްޖެއަށް އެތެރެވާން މަސައްކަތްކޮށްފައިވާ 1664 މީހުން އެއާޕޯޓު ބޯޑަރުން ހުއްޓުވާފައިވާ ކަމަށް މޯލްޑިވްސް އިމިގްރޭޝަނުން ބުނެފިއެވެ.
ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ކޮންޓްރޯލަރ ޖެނެރަލް އޮފް އިމިގްރޭޝަން މުހައްމަދު ޝަމްއާން ވަހީދު ވިދާޅުވީ 17 ނޮވެންބަރުން ފެށިގެން މިއަދާ ހަމައަށް ބަލާއިރު ގަވާއިދާ ހިލާފަށް ރާއްޖޭގައި އުޅެމުންދިޔަ 2069 ބިދޭސީން ފުރުވާލެވިފައިވާ ކަމަށެވެ. މިއަދާ ހަމައަށް 153 ރެއިޑް އޮޕަރޭޝަނެއް ހިންގާފައިވާއިރު، އަދިވެސް އޮޕަރޭޝަންތައް ކުރިއަށް ގެންދާ ކަމަށް އޭނާ ވިދާޅުވިއެވެ.
ޝަމްއާން ވިދާޅުވީ ސައްހަ ނޫން ލިޔެކިއުންތައް ބޭނުންކޮށްގެން ރާއްޖެއަށް އެތެރެވާން މަސައްކަތްކޮށްފައިވާ 1664 މީހުން އެއާޕޯޓު ބޯޑަރުން އައިޑެންޓިފައި ކުރެވި ރާއްޖެއަށް އެތެރެވިޔަ ނުދީ ފުރުވާލެވިފައިވާ ކަމަށެވެ.
ގަވާއިދާ ހިލާފަށް ބިދޭސީން ރާއްޖެ އެތެރެވުން ހުއްޓުވުމަށް ކުރެވުނު މަސައްކަތްތަކަށް އިޝާރާތް ކުރައްވައި ޑެޕިއުޓީ އިމިގްރޭޝަން އޮފިސަރ މުހައްމަދު ޝިފާން ވިދާޅުވީ ސައްހަ ނޫން ލިޔެކިއުންތައް ބޭނުންކޮށްގެން 1664 މީހުން ރާއްޖެއަށް އެތެރެވާން މަސައްކަތްކޮށް ހުއްޓުވިފައިވާއިރު، މީގެ ތެރޭގައި ޓޫރިސްޓް ވިސާގައި ރާއްޖެ އެތެރެވާން އުޅުނު 85 ގައުމެއްގެ 1289 މީހުން ހުއްޓުވާފައިވާ ކަމަށެވެ. ސައްހަ ނޫން ވޯކް ޕާމިޓް ވިސާގައި ރާއްޖެ އެތެރެވާން އުޅުނު 22 ގައުމެއްގެ 341 މީހުން ހުއްޓުވާފައިވާ ކަމަށް ޝިފާން ވިދާޅުވިއެވެ. އަދި ވިދާޅުވީ ނަކަލުކޮށްފައިވާ ލިޔެކިއުން ބޭނުންކޮށްގެން ރާއްޖެ އެތެރެވާން އުޅުނު 33 މީހުން އަދި ޝަހުސު އޮޅުވާލައިގެން ރާއްޖެ އެތެރެވާން އުޅުނު އެކަކު ހުއްޓުވާފައިވާ ކަމަށެވެ.
ޓޫރިސްޓް ވިސާގައި ރާއްޖެ އެތެރެވުމަށް މަސައްކަތްކުރާކަން ފާހަގަކުރައްވައި ޝިފާން ވިދާޅުވީ 1664 މީހުންގެ ތެރެއިން 1289 މީހުން ޓޫރިސްޓް ވިސާގައި ވަންނަން އުޅެނިކޮށް ހުއްޓުވިފައިވާއިރު، މީގެ ތެރޭގައި ހިމެނޭ ބަންގްލަދޭޝް 356 މީހުން، ސްރީލަންކާގެ 195 މީހުން، އިންޑިއާގެ 162 މީހުން، ނައިޖީރިއާގެ 42 މީހުން، ވިއެޓްނާމްގެ 35 މީހުން، އަދި އެހެނިހެން ގައުމުތަކަށް ނިސްބަތްވާ 499 މީހުން ދެނެގަނެވިފައިވާ ކަމަށް ޝިފާން ވިދާޅުވިއެވެ.
މީގެ އިތުރުން ޝިފާން ވިދާޅުވީ ވޯކް ވިސާ ފޯޖުކޮށްގެން ރާއްޖެ އެތެރެވާން މީހުން މަސައްކަތް ކޮށްފައިވާ ކަމަށެވެ. އެގޮތުން 22 ގައުމަކަށް ނިސްބަތްވާ 341 މީހުން ހުއްޓުވާފައިވާ ކަމަށް އޭނާ ވިދާޅުވިއެވެ.
އިމިގްރޭޝަނުން ބުނީ ސައްހަ ނޫން ލިޔެކިޔުންތައް ބޭނުން ކޮށްގެން އެހެނިހެން ގައުމުތަކަށް އެތެރެވުމަށް ރާއްޖެ ޓްރާންސިޓް ގައުމެއްގެ ގޮތުގައި ވެސް ބައެއް މީހުން ބޭނުންކުރަމުންދާ ކަމަށެވެ. އެގޮތަށް ތުހުމަތުކުރެވޭ ބައެއް ކޭސްތައް އަތުލައިގަނެވިފައިވާ ކަމަށް އިމިގްރޭޝަނުން ބުނެއެވެ.
