ފްރާންސް ޤައުމީ ޓީމުގެ ކުޅުންތެރިންނާ ދިމާކޮށްލި މައްސަލައިގައި އާޖެންޓީނާގެ މިޑްފީލްޑަރު އެންޒޯ ފެނާންޑޭޒް ހޫނު ފެނަށް ވެއްޓި އެ މައްސަލަ ބޮޑުވެފައި ވަނިކޮށް، އޭނާ މައާފަށް އެދިއްޖެ އެވެ.
ފްރާންސްގެ ކުޅުންތެރިންނާ އެންޒޯ ދިމާކޮށްލީ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާ) އާޖެންޓީނާ އިން ކާމިޔާބު ކުރުމަށްފަހު، އުފާ ފާޅު ކުރުމުގެ ތެރޭގައި ކިޔާފައިވާ ލަވައެއްގަ އެވެ. އޭރު އެންޒޯ ހިމެނޭހެން އާޖެންޓީނާގެ ކުޅުންތެރިން ދިޔައީ ބަހުގައި ދަތުރު ކުރަމުންނެވެ. އެ ލަވައިގައި އެންޒޯ ވަނީ ފްރާންސްގެ ކުޅުންތެރިންގެ މައިންބަފައިން ނިސްބަތް ވަނީ އެފްރިކާ ޤައުމުތަކަށް ކަމަށް ބުނެ ކިޔައިފަ އެވެ.
އެ ވީޑިއޯގެ މައްސަލަ ހޫނުވެފައިވާއިރު، ފްރާންސްގެ ފުޓުބޯޅަ ފެޑެރޭޝަނުން ވަނީ އެ މައްސަލަ ދުނިޔޭގެ ފުޓުބޯޅައިގެ މައި އިދާރާ (ފީފާ) އަށް ހުށަހަޅަން ނިންމައިފަ އެވެ. އެ ވީޑިއޯއާ ގުޅިގެން އެންޒޯ ކުޅެމުން އަންނަ ޗެލްސީގެ ބައެއް ކުޅުންތެރިން ވެސް ވަނީ އެންޒޯއާ ދެކޮޅަށް ނިކުމެފަ އެވެ. އެންޒޯގެ އެ މައްސަލަ ޗެލްސީން ވެސް ގެންދަނީ ތަޙުގީގު ކުރަމުންނެވެ.
މައްސަލަ ހޫނުވެ އެތައް ބައެއްގެ ނުރުހުން އަމާޒުވެފައި ވަނިކޮށް، އެންޒޯގެ ސޯޝަލް މީޑިއާ މެދުވެރިކޮށް އޭނާ ވަނީ މައާފަށް އެދިފަ އެވެ. އެންޒޯ ބުނީ، އެ ވީޑިއޯއާ ގުޅިގެން މައާފަށް އެދެން ބޭނުންވާ ކަމަށެވެ. އެ ލަވައިގައި ހުތުރު ބަސްތަކެއް ބޭނުންކުރެވިފައިވާ ކަމަށާއި، އެ ބަސްތަކާ މެދު އޭނާ އަށް ދެއްކޭނެ އެއްވެސް ބަހަނާއެއް ނެތް ކަމަށް ވެސް އެންޒޯ ބުންޏެވެ. އަދި އޭނާ އަކީ ނަސްލީ ތަފާތު ކުރުންތަކާ އަބަދު ވެސް ދެކޮޅު މީހެއް ކަމަށާއި، އެކަން ކުރެވުނީ މުބާރާތް ކާމިޔާބު ކުރުމުން ލިބިފައިވާ ފޯރީގެ ތެރޭގައި ކަމަށް ވެސް އެންޒޯ ބުނެފައިވެ އެވެ.
