ފްރާންސްގެ އެންމެ މޮޅު ކުޅުންތެރިޔާގެ މަގާމު ކަންޓޭ ހޯދައިފި

ކުޅިވަރު މަޖައްލާއެއް ކަމަށްވާ 'ފްރާންސް ފުޓްބޯލް' އިން ހޮވި ފްރާންސްގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމު ޗެލްސީގެ މިޑްފީލްޑަރު އެންގޯލޯ ކަންޓޭ ހޯދައިފިއެވެ.

އޭނާއަށް މި އެވޯޑު ލިބިފައިވާއިރު އޭނާ ވަނީ މިދިޔަ ސީޒަނުގައި ޗެލްސީއިން ޕްރިމިއާ ލީގު ހޯދިއިރު އެ ޓީމުގައި މުހިންމު ދައުރެއް އަދާކޮށްފައެވެ. ހަމައެހެންމެ އޭނާވަނީ ފްރާންސްގެ ގައުމީ ޓީމުގައި ވެސް މޮޅު ކުޅުމެއް ދައްކާފައެވެ. އޭނާއަށް މި އެވޯޑު ލިބިފައިވަނީ ނޫސްވެރިންނާއި ކޯޗުންގެ މެދުގައި ނެގުނު ވޯޓަކުންނެވެ. ކަންޓޭއަށް މި އެވޯޑު ލިބިފައިވަނީ 99 ޕޮއިންޓާއެކުއެވެ. މިދިޔަ މަހުގެ ތެރޭގައި އެ މަޖައްލާއިން ހޮވި ދުނިޔޭގެ އެންމެ މޮޅު ފުޓްބޯޅަ ކުޅުންތެރިންގެ ލިސްޓުން ކަންޓޭއަށް ލިބިފައިވަނީ އަށްވަނައެވެ.

އޭނާގެ ފަހަތުން މި އެވޯޑުގެ ދެވަނަ ލިބިފައި ވަނީ ޕީއެސްޖީއަށް ކުޅެމުން އަންނަ ޒުވާން ފޯވާޑް ކިލިއަން އެމްބާޕޭއަށެވެ. އެމްބާޕޭއަށް ދެވަނަ މަގާމު ލިބިފައިވަނީ މިދިޔަ ސީޒަނުގެ ޗެމްޕިއަންސް ލީގުގައި އޭނާ ކުޅުނު ކްލަބް ކަމަށްވާ މޮނާކޯއަށް ދެއްކި މޮޅު ކުޅުމުގެ ސަބަބުންނެވެ. މިކަމުގެ ސަބަބުން މިދިޔަ ހޫނު މޫސުމުގެ ޓްރާންސްފާގައި އެ ކްލަބުގެ ވާދަވެރި ޕީއެސްޖީއިން ވަނީ 180 މިލިއަން ޔޫރޯގެ ލޯނު އެއްބަސްވުމެއްގެ ދަށުން އޭނާ އެ ޓީމަށް ގެންގޮސްފައެވެ.

ފްރާންސްގެ ތިންވަނައަށް އެންމެ މޮޅު ކުޅުންތެރިޔަކަށް ހޮވިފައިވަނީ ރެއާލް މެޑްރިޑަށް ކުޅެމުން އަންނަ ފޯވާޑް ކަރިމް ބެންޒެމާއެވެ. މިދިޔަ ސީޒަނުގައި ރެއާލް މެޑްރިޑްއިން ޔުއެފާ ޗެމްޕިއަންސް ލީގާއި ސްޕެނިޝް ލަލީގާ ކާމިޔާބުކުރި އިރު އޭނާ ވަނީ އެ ޓީމުގައި މުހިންމު ދައުރެއް އަދާކޮށްފައެވެ. މިދިޔަ އަހަރު މި އެވޯޑު ހޯދި އެޓްލެޓިކޯ މެޑްރިޑްގެ ފޯވާޑް އެންޓޮއިން ގްރީޒްމަންއަށް މިފަހަރު ލިބިފައިވަނީ ހަތަރު ވަނައެވެ.

ކަންޓޭއަކީ ވަރަށް މަސައްކަތް ކުރާ ކުޅުންތެރިޔެއްގެ ގޮތުގައި ގިނަ ބަޔަކު ފާހަގަކުރާ ކުޅުންތެރިޔެކެވެ. އޭނާ ދަނޑުމަތީގައި ހުންނަ ވަގުތުތަކުގައި ޓީމުގެ ޑިފެންސުން ކުރަންޖެހޭ މަސައްކަތް ވަރަށް ބޮޑަށް ދަށްވާ ކަމަށް އޭނާ ކުޅުނު ޓީމުތަކުގެ ޑިފެންސަށް ކުޅުނު ކުޅުންތެރިން ބުނެފައިވެއެވެ.

ކަންޓޭ މިދިޔަ ސީޒަނުގައި ދެއްކި މޮޅު ކުޅުމުގެ ސަބަބުން 'ޕްލޭޔާސް ފުޓްބޯލް އެސޯސިއޭޝަން' (ޕީއެފްއޭ) އިން ހޮވި އެންމެ މޮޅު ކުޅުންތެރިޔާގެ މަގާމު ލިބިފައިވެއެވެ. އަދި މިދިޔަ ސީޒަނުގައި ހޮވި ޗެލްސީގެ އެންމެ މޮޅު ކުޅުންތެރިޔާގެ މަގާމު ވެސް ލިބިފައިވަނީ އޭނާއަށެވެ. މި ސީޒަނުގައި ކަންޓޭ ވަނީ މިހާތަނަށް ޗެލްސީއަށް 17 މެޗު ކުޅެދީފައެވެ. އޭނާގޭ ޓީމު މިވަގުތު އޮތީ ޕްރިމިއާ ލީގުގެ ތާވަލުގެ ތިންވަނައިގައެވެ.

ފްރާންސްގެ ސިއެންއިން މަޝްހޫރުކަން ހޯދި ކަންޓޭ ވިދާލީ އިނގިރޭސިވިލާތުގެ ލެސްޓާ ސިޓީގައެވެ. އޭނާ އެ ޓީމަށް ކުޅުނު ހަމައެކަނި ސީޒަނުގައި އެ ޓީމަށް އިނގިރޭސި ޕްރިމިއާ ލީގު ހޯދައިދިނުމުގައި މުހިންމު ދައުރެއް އަދާކުރިއެވެ. މިދިޔަ ސީޒަނުގައި އޭނާ ޗެލްސީއަށް ބަދަލުވީ 32 މިލިއަން ޕައުންޑްގެ ފީއަކަށެވެ. އޭނާ އަންނަނީ އެ ޓީމުގެ މެދުތެރޭގައި މުހިންމު ދައުރެއް އަދާކުރަމުންނެވެ.