ދާޚިލީ ވަޒީރުގެ މައިގަނޑު ފޯކަސް 3 ދާއިރާއަކަށް: ޑްރަގް، ގޭންގް، ބިދޭސީން
17 ޖުލައި 2024 | ބުދަ 04:37ސެކިއުރިޓީއާ ގުޅުންހުރި ދާއިރާއަކީ އަބަދުވެސް މަސައްކަތް ކުރައްވަން ބޭނުންފުޅުވާ ދާއިރާއެއް
ހޯމް މިނިސްޓަރ އަލީ އިޙްސާން
މައިގަނޑު 3 ދާއިރާއަކަށް އަމާޒުކޮށްގެން ޚާއްސަ މަސައްކަތްތަކެއް ކުރައްވަމުން ގެންދަވާކަމަށް ދާޚިލީ ވަޒީރު އަލީ އިޙްސާން ވިދާޅުވެއްޖެއެވެ.
ބުދަ ދުވަހު ރާއްޖެޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން މިނިސްޓަރ ވިދާޅުވީ، އެންމެ ފުރަތަމަ ރައީސް ޑރ މުޙައްމަދު މުއިއްޒާއެކު ސިޔާސީ ދާއިރާއާ ގުޅުންހުރި މަސައްކަތްތަކެއް ކުރެވުނީ މޭޔަރުކަމަށް މުއިއްޒު ވާދަ ކުރެއްވި އިންތިޚާބުގެ ތެރޭގައި ކަމަށެވެ.
ދާޚިލީ ވަޒީރުކަމުގެ މަޤާމަކީ މި ސަރުކާރު އައުމުން ޑރ މުއިއްޒު ދެއްވި ފުރުސަތެއް ކަމަށާއި، ސެކިއުރިޓީއާ ގުޅުންހުރި ދާއިރާއަކީ އަބަދުވެސް މަސައްކަތް ކުރައްވަން ބޭނުންފުޅުވާ ދާއިރާއެއްކަމަށް އިޙްސާން ވިދާޅުވިއެވެ.
އިޙްސާން ވިދާޅުވީ، ދާޚިލީ ވުޒާރާއާ ޙަވާލުވެވަޑައިގެންނެވިއިރު، އެންމެ ބޮޑު ޒިންމާއެއް ޙަވާލު ކުރެވިފައި އޮތީ ރާއްޖޭގައި އޮތް ޑްރަގްގެ މައްސަލައާއި، ގޭންގުތަކުގެ މައްސަލައިގެ އިތުރުން، ބިދޭސީންގެ މައްސަލަ ޙައްލު ކުރުމަށް ކަމަށެވެ.
އޭގެ ތެރެއިން ބިދޭސީންގެ މައްސަލައަށް އަލިއަޅުވާލައްވާ އިޙްސާން ވިދާޅުވީ، ރާއްޖޭގައި ބިދޭސީން ގެންގުޅުމުގެ ނިޒާމު އޮތީ އެންމެ އެކަށީގެންވާ ގޮތެއްގައެއް ނޫން ކަމަށާއި، މިއީ ޙައްލު އަންނަންޖެހޭ މައްސަލައެއް ކަމަށެވެ.
މިވަގުތު ކުރަމުންދަނީ އެއް އަހަރު ދުވަހުގެ ތެރޭގައި ރާއްޖޭގައި މިހާރު ތިބި ބިދޭސީން ދެނެގަނެ، ބައޯމެޓްރިކް ނިޒާމެއްގެ ތެރެއަށް ވެއްދުމުގެ މަސައްކަތްކަންވެސް އިޙްސާން ފާހަގަ ކުރެއްވިއެވެ.
މި މުޅި މައްސަލައަށް 3 އަހަރު ދުވަހުގެ ތެރޭގައި ޙައްލު އަންނާނެކަމަށް އުއްމީދު ކުރެވޭކަމަށްވެސް އިޙްސާން ވިދާޅުވިއެވެ.
އިޙްސާން ވިދާޅުވީ، ޚާއްސަކޮށް ޑޮލަރުގެ ވަގު ވިޔަފާރި ކުރާ ބިދޭސީންނަށް އަމާޒުކޮށްވެސް އޮޕަރޭޝަންތައް ހިންގަމުންދާ ކަމަށެވެ.
