މެލޭޝިޔާގެ ބޮޑުވަޒީރުގެ ދެކަނބަލުންނަށް ރަސްމީކޮަށް މަރުހަބާ ދަންނަވައިފި
މިއީ ދެ ދުވަހުގެ މުއްދަތަށް ކުރައްވާ ދަތުރުފުޅެއް
މެލޭޝިޔާގެ ބޮޑުވަޒީރުގެ ދެކަނބަލުން ރަސްމީ މަރުހަބާ ދެންނެވި ހަފްލާ
ރަސްމީ ދުތުރުފުޅެއްގައި ރާއްޖެ ވަޑައިގެން އުޅުއްވާ މެލޭޝިޔާގެ ބޮޑުވަޒީރު ނަޖީބު ރައްޒާގާއި އަނބިކަނބަލުން ރޮސްމާ މަންސޫރަށް ރައީސް އަބްދުﷲ ޔާމީނާއި އަނބިކަނބަލުން ފާތިމަތު އިބްރާހިމް ރަސްމީކޮށް މަރުހަބާ ދަންނަވައިފި އެވެ.
އަންގަރާ ދުވަހު ހަވީރު ރާއްޖެ ވަޑައިގެންނެވި މެލޭޝިއާގެ ބޮޑުވަޒީރުގެ ދެކަނބަލުންނަށް ރަސްމީކޮށް މަރުހަބާ ދެންނެވުން އޮތީ ބުދަ ދުވަހުގެ ހެނދުނު ޖުމްހޫރީ މައިދާނުގަ އެވެ. އެ ދެ ބޭފުޅުންނަށް މަރުހަބާ ދެންނެވުމުގެ ރަސްމިއްޔާތުގައި ޘަޤާފީ އައިޓަމެއް ސްކޫލުކުދިން ހުށަހަޅައި ހަތް ބަޑީގެ ސަލާމެއް އެރުވި އެވެ. އަދި މޯލްޑިވްސް ނޭޝަނަލް ޑިފެންސް ފޯސްގެ ގާޑް އޮފް އޮނަރެއް އެމަނިކުފާނު ވަނީ އިންސްޕެކްޓް ކޮށްދެއްވާފަ އެވެ.
މި ރަސްމިއްޔާތުގައި ދިވެހި ދައުލަތުގެ ވަޒީރުންނާއި ސަރުކާރުގެ އިސް ބައެއް ބޭފުޅުން މެލޭޝިޔާގެ ބޮޑުވަޒީރަށް ތައާރަފްކޮށް އެރުވި އެވެ.
ނަޖީބު ރައްޒާރު ރާއްޖެ ވަޑައިގެންނެވި މިއީ ފުރަތަމަ ފަހަރެވެ. ދެ ދުވަހުގެ މި ދަތުރުފުޅުގައި ރާއްޖެއާއި މެލޭޝިޔާއާދެމެދު ރަސްމީ ވާހަކަތައް ބޭއްވުމަށް ވަނީ ހަމަޖެހިފަ އެވެ. އަދި ދެ ގައުމުގެ ގުޅުން އިތުރަށް ބަދަހި ކުރުމަށްޓަކައި ބައެއް އެއްބަސްވުންތަކުގައި ސޮއިކުރުމަށް ވަނީ ހަމަޖެހިފަ އެވެ.
