އިނގިރޭސި އައު ކޯޗަކަށްވާނީ ކާކު؟

ޖެހިޖެހިގެން ދެ ފަހަރު މަތިން ޔޫރޯ ފައިނަލް ކުޅެ ބަލިވުމުން އިނގިރޭސި ގައުމީ ކޯޗުކަމުން އަށް އަހަރަށް ފަހު ގެރެތް ސައުތުގޭޓް އަންގާރަ ދުވަހު ވަނީ އިސްތިއުފާދީފަ އެވެ. މިއާއެކު އައު ކޯޗަކު ހޯދުމަށް އިނގިރޭސި ފުޓްބޯޅަ އެސޯސިއޭޝަނުން ވަނީ އަވަސްވެގެންފަ އެވެ. މިކަމަށް މާގިނަ މުއްދަތެއް ވެސް ނެތެވެ. ވޯލްޑްކަޕާއި ޔޫރޯ ކޮލިފައިން އާއި ނޭޝަންސް ލީގު ވެސް އެބައޮތެވެ.

ތައްޓަކާ ހިސާބަށް ނުދިޔަސް ސައުތު ގޭޓަކީ ކާމިޔާބު ކޯޗެވެ. 1966ގެ ފަހުން އިނގިރޭސިން ދެ ފައިނަލަށް ގެންގޮސްދީ ވޯލްޑްކަޕްގެ ސެމީ ފައިނަލަށް ގެންގޮސްދިން ހަމައެކަނި ކޯޗަކީ އޭނާ އެވެ. ނަމަވެސް އެގްރީމަންޓް އައުކުރުމުގެ ބަދަލުގައި އޭނާ ބުނީ މިއީ ބަދަލެއް ގެންނަންވީ ވަގުތު ކަމަށެވެ.

1966ގެ ފަހުން ތައްޓެއް ހޯދުމަށް އިނގިރޭސިން ކުރާ މަސައްކަތުގައި އެފްއޭއިން ބޭނުންވަނީ އެހެން ހުރިހާ ފަހަރުތަކަށްވުރެ ރަނގަޅު ކޯޗަކު އިހްތިޔާރުކުރާށެވެ. މިހެންވެ މިކަމަށް ދުވަސްކޮޅެއް މިކަމަށް ހޭދަވި ނަމަވެސް ވަރަށް ހިމުން ފުރޭންޏަކުން ފުރާނާލުމަށްފަހު ކޯޗަކު އިހްތިޔާރު ކުރުމަށް އެމީހުން ދަނީ ތައްޔާރުވަމުންނެވެ. އިނގިރޭސި މީޑިއާތަކުން ބުނާ ގޮތުގައި މިވަގުތު ހަތަރު ކޯޗަކު ޝޯޓް ލިސްޓުންގެ ތެރޭގައި އެބަތިއްބެވެ.

އާޖެންޓީނާގެ 52 އަހަރުގެ ކޯޗު މައުރީސިއޯ ޕޮޗެޓީނޯ އަކީ އިނގިރޭސި ކުޅުންތެރިން އެނގޭ ކޯޗެކެވެ. އޭނާ އެންމެ ފަހުން މަސައްކަތް ކުރީ ނިމިދިޔަ ސީޒަނުގައި ޗެލްސީގަ އެވެ. އޭގެ ކުރިން ފަސް އަހަރު ވަންދެން ޓޮޓެންހަމުގެ ކޯޗުކަން އަދާކުރި އެވެ. ޗެމްޕިއަންސް ލީގާއި ލީގު ކަޕެއްގެ ފައިނަލަށް އެ ޓީމު ގެންގޮސްދިނެވެ. ކުޅުންތެރިން އެނގުމާއި ހާއްސަކޮށް ކެޕްޓަން ހެރީކޭން ފަދަ ކުޅުންތެރިންނާ ގާތް ގުޅުމެއް އޮތުމަކީ އޭނާ އަށް އޮތް އެޑްވާންޓޭޖެކެވެ. މިފަހަރުގެ ޓީމުގައި ހިމެނުނު ކޯލް ޕަލްމާ އާއި ގަލެގާ އަކީ ވެސް އޭނާގެ ކުޅުންތެރިންނެވެ.

އުމުރުން 49 އަހަރުގެ ގްރެހަމް ޕޮޓާ އެންމެ ފަހުން ކޯޗެއްގެ ވަޒީފާ އަދާކުރީ މީގެ އަހަރެއްހާ ދުވަސް ކުރިން ޗެލްސީގަ އެވެ. އޭނާ އަކީ ކާމިޔާބު ކޯޗަކަށްނުވިޔަސް ރީތި ފުޓްބޯޅައެއް ކުޅުވަން މަސައްކަތް ކުރާ މީހެކެވެ. ކުޅުންތެރިއެއްގެ ގޮތުގައި އާދައިގެ ޓީމުތަކަށް ކުޅުނު ޕޮޓާގެ ހައިޕޮރޮފައިލް ހަމައެކަނި ވަޒީފާ އަކީ ވެސް ޗެލްސީގައި ހޭދަކުރި އަހަރެއްހާ ދުވަހެވެ. ކުރީގެ ފޯވަޑް މައިކަލް އޮވެން ފަދަ މީހުން ބުނާ ގޮތުގައި ގައުމީ ކޯޗުކަން ދިނުން އެންމެ ގާތް އެކަކީ އޭނާ އެވެ. މިގޮތަށް ވާހަކަ ދެކެވެނީ ޔޫރޯ ތެރޭގައި އިނގިރޭސި އެފްއޭއިން އޭނާއަށް ގުޅައި މިކަމުގެ މަޝްވަރާކޮށްފައިވާ ކަމަށް ވާހަކަ ދެކެވޭތީ އެވެ.

އުމުރުން 46 އަހަރުގެ އެޑީ ހޮވޭ އަކީ މިވަގުތު ނިއުކާސަލް ޔުނައިޓެޑްގެ ކޯޗެވެ. ކުރިން ބޯނެމައުތާއި ބާންލޭ އަށް ވެސް ކޯޗުކޮށްދިން ހޮވޭގެ ކޯޗުކަމުގައި ނިއުކާސަލް ވަނީ ހުސްވި ސީޒަނުގައި ވެސް ރަނގަޅު ނަތީޖާތަކެއް ހޯދައިފަ އެވެ. އިނގިރޭސިއަކަށް ވެސް ވުމާއެކު އޭނާ އަށް ގައުމީ ޓީމުގެ ދޮރު ހުޅުވުނަސް ހޮވޭ މިވަގުތު ހުރީ ކުލަބުގައި ވަރަށް ހިތްހަމަޖެހިގެންނެވެ. ނަމަވެސް ގައުމީ ކޯޗުކަން ރަސްމީކޮށް ހުށަހަޅައިފިނަމަ އޭނާ ނިއުކާސަލް ދޫކޮށްލާނެ ގިނަ ބަޔަކު އުއްމީދުކުރެ އެވެ.

އުމުރުން 50 އަހަރުގެ ލީ ކާސްލޭ އަކީ އިނގިރޭސި 21 އަހަރުން ދަށުގެ ގައުމީ ކޯޗެވެ. އޭނާ އަކީ ރީތި ފުޓްބޯޅައެއް ކުޅުވާ ކޯޗެކެވެ. ގައުމީ ކޯޗުގެ ޝޯޓް ލިސްޓުގައި ހިމެނުނު އެންމެ ހައިރާންކުރުވަނިވި ނަމަކީ ވެސް އޭނާގެ ނަމެވެ. ކުޅުންތެރިއެއްގެ ގޮތުގަ އާއި ކޯޗިންނައި މާ ފުންނާބު އުސްނޫނަސް އޭނާއަށް ސީނިއާ ޓީމުގެ ކޯޗުކަން ދީފާނެ ސަބަބުތަކެއްވެ އެވެ. އެއީ އުމުރުފުރާތަކުގަ ގައުމީ ޓީމުގައި ރަނގަޅު ނަތީޖާތަކެއް ހޯދާފައިވުމެވެ.

އިނގިރޭސި އެފްއޭއިން މި ފަހަރު ބިދޭސީ ކޯޗަކު އައްޔަން ކުރުން ވެސް އެކަށީގެންވެ އެވެ. ސަބަބަކީ އެ ގައުމުގެ އަންހެން ޓީމު ބިދޭސީ ކޯޗަކާއެކު ވޯލްޑްކަޕް ފައިނަލް ކުޅެ، ޔޫރޯ 2022 ކާމިޔާބުކޮށްފައިވުމެވެ. އިނގިރޭސި ގައުމީ ކޯޗުކަމަށް ޝައުގުވެރިވާ ބިދޭސީ ކޯޗުންގެ ތެރޭގައި ޕޮޗެޓީނޯއާއެކު ހިމެނެނީ ޗެލްސީ އާއި ބަޔާން މިއުނިކް އަދި ޕީއެސްޖީގައި މަސައްކަތް ކުރި ޖަރުމަނުގެ ކޯޗު ތޯމަސް ޓުކެލް އެވެ. މީގެ އިތުރުން އިނގިރޭސި ކުރީގެ މިޑްފީލްޑަރު ފްރޭންކް ލަމްޕާޑާއި ސައޫދީ ލީގުގައި ކޯޗުކޮށްދެމުން އަންނަ ކުރީގެ ގައުމީ ކެޕްޓަން ސްޓީވަން ޖެރާޑަކީ ވެސް އެފްއޭގެ ވިސްނުމަށް އަތުވެދާނެ ނަންތަކެވެ.