ބޯޑަރު ބަލަހައްޓަން ކަސްޓަމްސްއަށް 2 ޑްރޯން ގެންނަނީ
16 ޖުލައި 2024 | އަންގާރަ 09:19ޑްރޯން ގެންނަނީ އެމެރިކާ އަދި ޗައިނާއިން
ކޮމިޝަނަރ ޖެނަރަލް އޮފް ކަސްޓަމްސް ޔޫސުފް މާނިއު މުހައްމަދު
ރާއްޖޭގެ ބޯޑަރުން އެތެރެވާ އުޅަނދުތައް މޮނިޓަރ ކުރަން 2 ޑްރޯން ލިބިފައިވާ ކަމަށް ކޮމިޝަނަރ ޖެނަރަލް އޮފް ކަސްޓަމްސް ޔޫސުފް މާނިއު މުހައްމަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ ސަލާމަތީ ހިދުމަތްތަކާއި ބެހޭ ކޮމިޓީ (241 ކޮމިޓީ) ގައި ވާހަކަ ދައްކަވަމުން މާނިއު ވިދާޅުވީ ކުރިއަށް އޮތްތަނުގައި ޖަޕާނުން 85 ފޫޓުގެ އުޅަނދެއް ލިބޭނެ ކަމަށާއި، އޭގެ އިތުރުން ޗައިނާ ސަރުކާރާއި މަޝްވަރާކޮށްގެން އަންނަ އަހަރުގެ ތެރޭގައި 2 އުޅަނދެއް ލިބޭނެ ކަމަށެވެ. މީގެ އިތުރުން އެމެރިކާއިން ވެސް އުޅަނދެއް ލިބޭނެ ކަމަށާއި، ޑްރޯންއެއް އެމެރިކާއިން ގެންނަން ނިންމާފައިވާ ކަމަށެވެ. އަދި ޗާއިނާއިން ވެސް ޑްރޯން ގެންނަން ނިންމާފައިވާ ކަމަށާއި، އެއީ ކަސްޓަމްސް އަށް އޭގެ ބޭނުން މުހިންމު ކަމުން ކަމަށެވެ.
މާނިއު ވިދާޅުވީ ބޭރުން އަންނަ އުޅަނދުތައް އެ އުޅަނދެއް އޮންނަތަކަށް ގޮސްގެން ނޫނީ މޮނިޓަރ ކުރެވޭނެ އެއްވެސް ގޮތެއް ކަސްޓަމްސްގައި ނެތް ކަމަށެވެ.
މާނިއު ވިދާޅުވީ އެހާ ރަނގަޅަށް ރާއްޖޭގެ ޖުރިސްޑިކްޝަން ތަކެއް ލޯ އެންފޯސްމަންޓުގައި ތަފްސީލުކޮށްފައި ނުވާ ކަމަށެވެ. ބޯޑަރުން އެތެރެވާ އުޅަނދުތަކުގެ ކޮންޓްރޯލް ހުންނަންޖެހޭނީ ކަސްޓަމްސްގެ ދަށުގައި ކަމަށާއި، އެކަން ގާނޫނުންވެސް ވަރަށް ބޮޑަށް ތަފްސީލުކުރަން ޖެހޭ ކަމަށެވެ.
މާނިއު ވިދާޅުވީ ޑްރޯންގެ މަސައްކަތް ކުރާނީ އެމްއެންޑީއެފްގެ އެއަރކޯއާއި ގުޅިގެން ކަމަށެވެ. އަދި ކަސްޓަމްސްއަށް ޑްރޯން ލިބުނު ނަމަވެސް، އެމްއެންޑީއެފުންވެސް ބޭނުންކުރާ އެއްޗެއް ގޮތަށް ދެބައި މީހުންނަށްވެސް ބޭނުންކުރެވޭ ގޮތަށް އެކަން ކުރާނެ ކަމަށެވެ.
