ކޮޅުވެއްޓީގައި ތިބި މީހުން އިންޑިއާ މަނަވަރުގައި މާލެ ގެންނަނީ
މީހުން ގެންނަނީ އިންޑިއާގެ އަސްކަރީ މަނަވަރު، އައިއެންއެސް ކިރްޗްގައި
މާރިޔާ 3 ކޮޅުވެއްޓީގެ ފޮޓޯއެއް
ހަ މީހުންނާއެކު ގެއްލިގެން ހޯދަމުން ދަނިކޮށް، ރާއްޖެއާ 130 ނޯޓިކަލް މޭލް ބޭރުން ފެނުނު "މާރިޔާ 3" ކޮޅުވެއްޓީގައި ތިބި މީހުން އިންޑިއާގެ މަނަވަރެއްގައި މާލެ ގެނައުމުގެ މަސައްކަތް ފަށައިފިއެވެ.
އެމްއެންޑީއެފްގެ މީޑިއާ އޮފިޝަލް ކެޕްޓަން އިބްރާހިމް އާޒިމް ވިދާޅުވީ، ކޮޅުވެއްޓި އޮތް ހިސާބުގައި މޫސުން ގޯސްވެ، ވައި ގަދަވަމުންދާތީ، ކޮޅުވެއްޓީގައި ތިބި ހަ މީހުން، އެ ކޮޅުވެއްޓި ހޯދުމުގެ އޮޕަރޭޝަންގައި ބައިވެރިވި އިންޑިއާގެ އަސްކަރީ މަނަވަރު، އައިއެންއެސް ކިރްޗްގައި، މާލެއަށް ގެނައުމަށް އެމްއެންޑީއެފުން ނިންމުމާ ގުޅިގެން، އެމީހުން ގޮވައިގެން އައިއެންއެސް ކިރްޗް މިހާރު މާލެއަށް ދަތުރުކުރަމުން އަންނަ ކަމަށެވެ.
އާޒިމް ވިދާޅުވީ، ސެނޮކް ޕވޓ ލޓޑގެ މި ކޮޅުވެއްޓީގައި ސަލާމަތީ ހުރިހާކަމެއް ވެސް ހުރީ ފުރިހަމައަށް ކަމަށާއި، އަދި ކޮޅުވެއްޓީގެ ކުރީގައިވާ ރޭމްޕަށް ލިބިފައިވާ ގެއްލުން ފިޔަވައި އެ އުޅަނދަށް އިތުރު އެއްވެސް ގެއްލުމެއް ލިބިފައި ނުވާކަމަށެވެ.
އެމްއެންޑީއެފާއި ސެނޮކް ޕވޓ ލޓޑ އިން ކުރިން މަސައްކަތް ކުރަމުންދިޔައީ ކޮޅުވެއްޓި ޓަގެއްގައި ކަފުޖަހައިގެން މާލެއަށް ގެނައުމަށެވެ. ނަމަވެސް އާޒިމް ވިދާޅުވި ގޮތުގައި ސެނޮކް ޕވޓ ލޓޑ އިން ވޭތުވެދިޔަ 36 ގަޑިއިރު ކުރި މަސައްކަތް ވެސް ކާމިޔާބު ވެފައި ނުވާ ކަމަށެވެ. އެގޮތުން މި މޫސުމުގައި، ކޮޅުވެއްޓި ބަލައި ފުރުމަށް އެއްވެސް ބަޔަކު އެއްބަސް ނުވި ކަމަށް އާޒިމް ވިދާޅުވިއެވެ. އަދި ކުރިން ކުރެވުނު މަސައްކަތް ނާކާމިޔާބު ވުމުން، މިހާރު މަސައްކަތް ކުރަމުންދަނީ މި މަސައްކަތް ކުރުމަށް ލަންކާގެ އުޅަނދެއް ހޯދުމަށް ކަމަށެވެ.
އެމްއެންޑީއެފުން މައުލޫމާތު ދިން ގޮތުގައި ކޮޅުވެއްޓި މިހާރު އޮތީ މާލޭގެ އިރު ދެކުނުން 215 މޭލަށް ވުރެ ބޭރުގައެވެ.
'މާރިޔާ 3' ގެއްލިގެން ހޯދަން ފަށާފައިވަނީ، މި މޭމަހުގެ 16 ވަނަ ދުވަހުގެ ރެއިން ފެށިގެން އެ އޫލަނދުގެ ޚަބަރެއް ނުވެގެން، މޭ 18 ވަނަ ދުވަހު އެކަން އެމްއެންޑީއެފްއަށް ރިޕޯޓް ކުރި ހިސާބުންނެވެ. އެ ދުވަހުން ފެށިގެން ހޯދަމުން ދަނިކޮށް، އުޅަނދު ފެނިފައިވަނީ މޭ 20 ވަނަ ދުވަހުގެރޭ އިންޑިއާގެ ނޭވީ މަތިންދާ ބޯޓަކަށެވެ.
މި ކޮޅުވެއްޓި ފެނުނު އިރު އޭގައި ތިބި 6 މީހުންގެ ހާލުވެސް ރަނގަޅު ކަމަށާއި އެއްވެސް މީހަކަށް ގެއްލުމެއް ލިބިފައެއް ނެތް ކަމަށް އެމްއެންޑީއެފުން ބުނެއެވެ. މި ކޮޅުވެއްޓީގައި ތިބީ 2 ދިވެހިންނާއި 4 ބިދޭސީނެވެ. ދެ ދިވެހިންނަކީ ކޮޅުވެއްޓީގެ ކެޕްޓަން، ތ.ވިލިފުށީ ފިނިހިޔާގެ އާދަމް ނައީމް އާއި އޭނާގެ އަންހެނުން އެ ރަށު ކޮށިބިއްލޫރިގޭ ޒުލައިޚާ އުސްމާނެވެ.
