ސްވިޒަލެންޑުގެ ޤައުމީ ޓީމަށް ކުޅެމުން އައި ޒެރްޑަން ޝަކީރީ، ޤައުމީ ޓީމުން ރިޓަޔާ ކުރަން ނިންމައިފި އެވެ.

ޤައުމީ ޓީމުން ރިޓަޔާ ކުރަން ޝަކީރީ ނިންމާފައިވާއިރު، އޭނާގެ އުމުރުން 32 އަހަރެވެ. ސްވިޒަލެންޑު ޤައުމީ ޓީމާއެކު އެންމެ ފަހުން ޝަކީރީ ކުޅެފައި ވަނީ މި މަހު ޖަރުމަނުގައި ނިމުނު ޔޫރޯ ފުޓުބޯޅަ މުބާރާތެވެ. އެ މުބާރާތުން ސްވިޒަލެންޑު ކަޓައިފައި ވަނީ ކުއާޓާ ފައިނަލާ ހަމައިންނެވެ. ކުއާޓާ ފައިނަލްގައި އިންގްލެންޑު އަތުން ބަލިވީ ޕެނަލްޓީ ޖަހައިގެންނެވެ.

މުބާރާތުގެ ގްރޫޕް ސްޓޭޖުގައި ސްވިޒަލެންޑުން ސްކޮޓްލެންޑާ ދެކޮޅަށް ކުޅުނު މެޗުގައި ޝަކީރީ ވަނީ ލަނޑު ވެސް ޖަހައިފަ އެވެ. އޭނާ އަކީ އެންމެ ފަހުން އޮތް ފީފާ ވޯލްޑް ކަޕްގެ ތިން މުބާރާތުގައި ވެސް، އަދި އެންމެ ފަހުން އޮތް ޔޫރޯ ފުޓުބޯޅަ މުބާރާތުގެ ތިން މުބާރާތުގައި ވެސް ލަނޑު ޖެހި ހަމައެކަނި ކުޅުންތެރިޔާ އެވެ.

ޝަކީރީ އަށް ސްވިޒަލެންޑުގެ ސީނިއަރ ޤައުމީ ޓީމުން ޖާގަ ލިބުނީ 2010 ވަނަ އަހަރު އެވެ. ޤައުމީ ޓީމާއެކު ހޭދަކޮށްފައިވާ 14 އަހަރުގެ ތެރޭގައި ޝަކީރީ ވަނީ ޤައުމީ ޓީމަށް 125 މެޗު ކުޅެދީ، 32 ލަނޑު ޖަހައިފަ އެވެ. މީގެ އިތުރުން ޝަކީރީ ވަނީ ސްވިޒަލެންޑާ އެކު ބައިނަލްއަޤުވާމީ ހަތް މުބާރާތެއްގައި ވާދަކޮށްފަ އެވެ.

ޖަރުމަނުގެ ބަޔާން މިއުނިކް، އިޓަލީގެ އިންޓަ މިލާން އަދި އިނގިރޭސި ލިވަޕޫލަށް ކުޅެފައިވާ ޝަކީރީ މިވަގުތު ކުޅެމުން އަންނަނީ އެމެރިކާ ލީގުގަ އެވެ. އެމެރިކާ ލީގުގެ ޝިކާގޯ ފަޔާ އަށް ކުޅެމުން އަންނަ ޝަކީރީ އަކީ ސްވިޒަލެންޑުގައި މޮޅު ކުޅުމެއް ދައްކާފައިވާ ކުޅުންތެރިޔެކެވެ. ޤައުމީ ޓީމުން ރިޓަޔާވާން ޝަކީރީ ނިންމި ނަމަވެސް، ކުލަބު ކެރިއަރުން ރިޓަޔާވާން ނުނިންމަ އެވެ.