ސްކަލޯނީގެ ތައުރީފު ޑި މާރިއާ އަށް: ޤައުމީ ޓީމަށް ވެފައި ވަނީ ބޮޑު ޤުރުބާނީއެއް!

އާޖެންޓީނާގެ ޤައުމީ ޓީމަށް އެންހެލް ޑި މާރިއާ ވެފައި ވަނީ ބޮޑު ޤުރުބާނީއެއް ކަމަށް ބުނެ، އެ ޓީމުގެ ކޯޗު ލިއޮނަލް ސްކަލޯނީ އޭނާ އަށް ވަރަށް ބޮޑަށް ތައުރީފު ކޮށްފި އެވެ.

އުމުރުން 36 އަހަރުގެ ޑި މާރިއާ ވަނީ، މިއަހަރު އެމެރިކާގައި ކުރިއަށް ދިޔަ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާ) އަށް ފަހު އާޖެންޓީނާ ޤައުމީ ޓީމުން ރިޓަޔާ ކުރުމަށް ނިންމައިފަ އެވެ. އެހެންކަމުން، އެ މުބާރާތުގެ ފައިނަލް މެޗަކީ ޤައުމީ ޖާޒީގައި ޑި މާރިއާ ކުޅުނު އެންމެ ފަހު މެޗެވެ.

އެ މެޗަށްފަހު އޮތް ނޫސްވެރިންގެ ބައްދަލުވުމުގައި، ޑި މާރިއާއާ ގުޅޭ ގޮތުން ވާހަކަ ދައްކަމުން ސްކަލޯނީ ބުނީ އާޖެންޓީނާގެ ޤައުމީ ޓީމާއެކު ޑި މާރިއާ ކުޅެފައި ވަނީ ފަޚުރުވެރި އަދި މޮޅެތި މެޗުތަކެއް ކަމަށެވެ. އެހެން ނަމަވެސް، މިއަހަރުގެ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތުގެ ފައިނަލްގައި އާޖެންޓީނާ އިން ކޮލަމްބިއާއާ ދެކޮޅަށް ކުޅުނު މެޗަކީ، ޑި މާރިއާ ޤައުމީ ޓީމުގައި ކުޅުނު އެންމެ މޮޅު އެއް މެޗު ކަމަށް އޭނާ ބުންޏެވެ.

ޤައުމީ ޓީމުން އޭނާ ރިޓަޔާވާން ނިންމައި އެ މެޗުގައި ޑި މާރިއާ ކުޅެފައިވާއިރު، ޑި މާރިއާ ކުޅެމުން ދިޔައީ އުމުރުން 25 އަހަރުގައި އޭނާ ދައްކަމުން އައި ފަދަ ކުޅުމެއްގައި ކަމަށް ވެސް ސްކަލޯނީ ބުންޏެވެ. ޑި މާރިއާ އަކީ އާޖެންޓީނާ އަދި ފުޓުބޯޅައިގެ ލެޖެންޑެއްކަން ފާހަގަކޮށް ސްކަލޯނީ ބުނީ، ޤައުމީ ޓީމުން ރިޓަވާން ނިންމި ނިންމުމަކީ ޑި މާރިއާގެ އަމިއްލަ ނިންމުމެއް ކަމަށެވެ. އަދި އެ ނިންމުމަށް ފުރިހަމަ އަށް އިޙުތިރާމް ކުރަން ޖެހޭނެ ކަމުގައި ވެސް ސްކަލޯނީ ބުންޏެވެ.

ޑި މާރިއާ އަށް އާޖެންޓީނާ ޤައުމީ ޓީމުން ޖާގަ ލިބުނީ 2008 ވަނަ އަހަރު އެވެ. އޭގެ ފަހުން އޭނާ ވަނީ ޤައުމީ ޓީމަށް 145 މެޗު ކުޅެދީ 31 ލަނޑު ޖަހައިފަ އެވެ. އާޖެންޓީނާގެ ސީނިއާ ޓީމާއެކު ޑި މާރިއާ ވަނީ ހަތަރު ތައްޓެއް ވެސް ކާމިޔާބު ކޮށްފަ އެވެ. އެއީ 2021 ވަނަ އަހަރުގެ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތުގެ އިތުރުން، ފައިނަލިސިމާ، 2022 ވަނަ އަހަރުގެ ފީފާ ވޯލްޑް ކަޕް އަދި މިއަހަރުގެ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތެވެ.

މީގެ އިތުރުން އާޖެންޓީނާ ޤައުމީ ޓީމާއެކު ޑި މާރިއާ ވަނީ 20 އަހަރުން ދަށުގެ ފީފާ ވޯލްޑް ކަޕް އަދި އޮލިމްޕިކްސްގެ ރަން މެޑަލް ވެސް ކާމިޔާބު ކޮށްފަ އެވެ. އާޖެންޓީނާ އިން 2008 ވަނަ އަހަރުގެ އޮލިމްޕިކްސްގެ ރަން މެޑަލް، އަދި 2021 ވަނަ އަހަރު އޮތް ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް ކާމިޔާބު ކުރީ ވެސް ޑި މާރިއާ ޖެހި ލަނޑުންނެވެ. 2022 ވަނަ އަހަރުގެ ވޯލްޑް ކަޕްގެ ފައިނަލްގައި ވެސް ޑި މާރިއާ ވަނީ ލަނޑު ޖަހައިފަ އެވެ.