ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާ)ގެ މޮޅު ކުޅުންތެރިޔާގެ މަގާމު ކޮލަމްބިއާގެ ކެޕްޓަން ހަމޭސް ރޮޑްރިގޭޒް ހޯދައިފި އެވެ.

ކޮލަމްބިއާ އިން ވަނީ އެމެރިކާގައި ކުރިއަށް ދިޔަ މުބާރާތުގެ ފައިނަލްގައި ކުޅެފަ އެވެ. ފައިނަލްގައި ކޮލަމްބިއާ އިން ވަނީ އެންމެ ފަހުގެ ޗެމްޕިއަން އާޖެންޓީނާއާ ވާދަކޮށް، ބަލިވެފަ އެވެ. އެ މެޗާ ކުރިމަތިލީއިރު، ކޮލަމްބިއާ އެންމެ ފަހުން ކުޅުނު 28 މެޗުން ވެސް އެ ޓީމު ބަލިވެފައެއް ނުވެ އެވެ.

އުމުރުން 33 އަހަރުގެ ރޮޑްރިގޭޒް ވަނީ މިއަހަރުގެ މުބާރާތުގައި ރޮޑްރިގޭޒް ވަނީ ކޮލަމްބިއާ އަށް ކުޅެދިން، ހަ މެޗުގައި އެއް ލަނޑު ޖަހައިފަ އެވެ. މީގެ އިތުރުން އޭނާ ވަނީ ހަ ލަނޑު ޖެހުމަށް އެހީތެރިވެދީފަ އެވެ. މިއަހަރުގެ މުބާރާތުގައި ރޮޑްރިގޭޒް މޮޅު ކުޅުމެއް ދައްކާފައިވާއިރު، އޭނާ އަކީ ދެކުނު އެމެރިކާ ސަރަހައްދުގެ މުބާރާތެއްގައި އެންމެ ގިނަ ލަނޑު ޖަހަން ފުރުސަތު ތަނަވަސްކޮށްދިން ކުޅުންތެރިޔާ އެވެ.

މިއަހަރުގެ މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާ އަށް ދޭ ރަން ބޫޓު ހޯދާފައި ވަނީ އާޖެންޓީނާގެ ލައުޓާރޯ މާޓިނޭޒް އެވެ. މާޓިނޭޒް ވަނީ އާޖެންޓީނާ އަށް މިއަހަރުގެ މުބާރާތުގައި ހަ މެޗު ކުޅެދީ ފަސް ލަނޑު ޖަހައިފަ އެވެ. އާޖެންޓީނާ އިން 16 ވަނަ ފަހަރަށް ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް ކާމިޔާބު ކުރީ ވެސް ފައިނަލްގައި މާޓިނޭޒް ޖެހި ލަނޑުންނެވެ.