ދަރިވަރުން ކަންބޮޑުވެފައި، ހަދާނެ ގޮތެއް ނޭނގެ، މިނިސްޓްރީ އަކީ ޖަވާބުދޭ ތަނެއް ނޫން
ރާއްޖެއިން ބޭރުގައި ސަރުކާރުގެ ސްކޮލަރޝިޕް ތަކުގައި ކިޔަވަން ތިބޭ ދަރިވަރުންނަށް ސަރުކާރުން ފޮނުވަން ޖެހޭ ފައިސާ ގަވާއިދުން އެކުދިންނަށް ނުލިބޭ ކަމަށާއި، ފައިސާ ހޯދަން ސަރުކާރާ މުއާމަލާތް ކުރުމަކީވެސް އެހާ އުނދަގޫ ކަމެއް ކަމަށް ދަރިވަރުން ބުނެއެވެ. އަނެއްކޮޅުން، ސަރުކާރުން ބުނަނީ ދަރިވަރުންގެ ކަންކަން ހުންނާނީ ބަރާބަރަށް ހަމަޖެހިފައި ކަމަށެވެ.
ދަރިވަރުން ބުނާ ގޮތުގައި އެއްވެސް އިރަކު އެ ބުނާ ދުވަހަށް ފައިސާ ނުލިބޭތާ، ލިބުނަސް ލިބެނީ އެތައް މަސައްކަތެއް ކޮށްގެން
ސަރުކާރުގެ ސްކޮލަރޝިފްގައި ކިޔަވަމުންދާ ދަރިވަރުން ތިބީ ހަދާނެ ގޮތެއް ނޭގި، ވާނުވާ އެއް ނޭގިފައެވެ.
ސަރުކާރުގެ ސްކޮލަރޝިޕްގައި ރާއްޖޭން ބޭރުގައި ކިޔަވަން ތިބި ބައެއް ދަރިވަރުން މިކަމުގައި އުފުލާ ތަކުލީފު މި ނޫހާ ވަނީ ހިއްސާ ކޮށްފައެވެ.
މައުލޫމާތު ދިން ކުދިންގެ ތެރެއިން އެއްވެސް ކުއްޖަކު، އިތުރަށް މި ކަމުގައި ދަތިވެދާނެ ކަމަށް ބުނެ، ނަން ޖަހާކަށް ބޭނުމެއް ނުވެއެވެ.
މި ނޫހާ ވާހަކަ ދެއްކި ދަރިވަރުންގެ މައިގަނޑު ކަންބޮޑުވުމަކީ، ސްކޮލަރޝިޕް އެގްރީމެންޓުގައި އޮންނަ ގޮތައް ސަރުކާރުން އަމަލު ކުރަމުން ނުދިއުމެވެ.
ދަރިވަރުން ބުނާ ގޮތުގައި ސްކޮލަރޝިޕް އެއްބަސްވުމުގައި އޮންނަނީ ކޮންމެ އަހަރެއްގެ ޖެނުއަރީ މަހާއި ޖުލައި މަހު އެއިން ކޮންމެ މަހެއްގެ ފުރަތަމަ ދުވަހުގެ ކުރިން ސަރުކާރުން ފައިސާ ޖަމާ ކޮށްދޭން ޖެހޭ ގޮތަށެވެ. އެހެން ނަމަވެސް އެކަން އެ ގޮތައް ސާރުކާރުން ކުރަމުން ނުދާ ކަމަށް ދަރިވަރުން ބުނެއެވެ. އެކުދިން ބުނާ ގޮތުގައި އެއްވެސް އިރަކު އެ ބުނާ ދުވަހަށް ފައިސާ ނުލިބޭތާ، ލިބުނަސް ލިބެނީ އެތައް މަސައްކަތެއް ކޮށްގެން ކަމުގައެވެ.
ސްކޮލަރޝިޕް ގައި ތިބޭ ދަރިވަރުންނަށް ފައިސާ ލިބުމުގައި ހުރި ދަތިތައް ކިޔައިދެމުން ބުނީ، ކިޔަވަމުން ފައިސާގެ ކަންކަމަށް ފިކުރު ހިންގާ އެކަމާ ބޯހާސްވާން ޖެހުމަކީ ބުނެދޭން ނޭނގޭ އުނދަގޫ އިހްސާސެއް ކުރެވޭ ކަމެއް ކަމުގައެވެ. އެކުދިން ބުނާ ގޮތުން ފުރަތަމަ އީމޭލް އަށް ޖަވާބު ނުލިބުމުން އަނެއްކާ އަނެއް އީމޭލް ފޮނުވަނީ ކަމަށެވެ. އެކަމަކު ހަޔަރ އެޑިއުކޭޝަން މިނިސްޓްރީ އަކީ އީމޭލަށް ޖަވާބު ދޭ ތަނެއް ނޫން ކަމަށް ދަރިވަރުން ބުނެއެވެ.
ރާއްޖޭން ބޭރުގައި ކިޔަވަން ހުންނަ މިހާރު މާލޭގައި ޗުއްޓީ އަށް އައިސް ހުރި ދަރިވަރަކުވެސް ބުނީ އީމޭލް ކޮށްގެން ޖަވާބު ނުދީގެން ހަޔަރ އެޑިއުކޭޝަން އަށް ގުޅުމުން ދެން ބުނަނީ ފައިސާ ޓްރާންސްފަރ ކުރަން ފިނޭންސަށް ފޮނުވައިފި ކަމަށެވެ.
އޭނާ ބުނި ގޮތުގައި ފިނޭންސަށް ގުޅުމުން ބުނަނީ ޑޮކިއުމެންޓް ނަމްބަރެއް ނުވަތަ ޕީވީ ނަންބަރެއް ނެތި ވަކި އެއްޗެއް ބުނަން ނޭގޭނެ ކަމަށެވެ.
ދަރިވަރުންނަށް ސްޓައިޕެންޑަށް ލިބޭ މިންވަރު ސަރުކާރުން ދަށް ކުރުމަކީވެސް ކިޔަވާ ކުދިންނަށް އިތުރު ތަކުލީފެއް އުފުލަން ޖެހޭ ކަމައް ކަމަށް ދަރިވަރުން ބުނެއެވެ.
ދަރިވަރުން މިހެން ބުނާއިރު ސަރުކާރުން ބުނަނީ ސްކޮލަރޝިޕްގައި ކިޔަވަން ތިބި ކުދިންގެ ކަންކަން ބަރާބަރަށް ސަރުކާރުން ދަނީ ބަލަހައްޓަމުން ކަމަށެވެ.
