ސައުތުގޭޓް ވަކި ކުރުމުގެ ވިސްނުމެއް އިންގްލެންޑުގެ ނެތް!

އިންގްލެންޑުގެ ޤައުމީ ޓީމުގެ ކޯޗުކަމުން ގަރެތު ސައުތުގޭޓް ވަކި ކުރުމުގެ ވިސްނުމެއް، އިނގިރޭސި ފުޓުބޯޅަ އެސޯސިއޭޝަން (އެފްއޭ) އިން ނުގެންގުޅޭ ކަމަށް މީޑިއާ ރިޕޯޓުތައް ބުނެފި އެވެ.

އިންގްލެންޑުގެ ކޯޗުކަމާ ސައުތުގޭޓް ހަވާލުވީ 2016 ވަނަ އަހަރު އެވެ. އޭގެ ފަހުން ވެސް އިންގްލެންޑުގެ ނަތީޖާ ދަށްވާ ކަމަށް ބުނެ، ސައުތުގޭޓަށް ފާޑު ކިޔުންތައް ވެސް އަމާޒުވެ އެވެ. އަނެއްކޮޅުން މިހާރު ޖަރުމަނުގައި ކުރިއަށްދާ ޔޫރޯ ފުޓުބޯޅަ މުބާރާތުގެ ފައިނަލުން އިންގްލެންޑު ބަލިވެއްޖެ ނަމަ، ކޯޗުކަމުން ސައުތުގޭޓް ވަކި ކުރާނެ ކަމުގެ އަޑުތައް އޮތީ ފެތުރިފަ އެވެ. އިންގްލެންޑަށް ޔޫރޯ ކާމިޔާބުކޮށް ނުދެވިއްޖެ ނަމަ، މަގާމުން ވަކިވާނެ ކަމުގެ އިޝާރާތެއް ވެސް ސައުތުގޭޓް ވަނީ ދީފަ އެވެ.

އެހެން ނަމަވެސް، އިނގިރޭސި މީޑިއާ ތަކުގައި ބުނެފައިވާ ގޮތުން، ކޯޗުކަމުން ސައުތުގޭޓް ވަކި ކުރުމުގެ ވިސްނުމެއް އިނގިރޭސި އެފްއޭ އިން ނުގެންގުޅެ އެވެ. އޭގެ ބަދަލުގައި އިނގިރޭސި އެފްއޭ އިން ބޭނުން ވަނީ ސައުތުގޭޓާ އެކު ކުރިއަށް ދާން ކަމަށް ވެސް މީޑިއާ ރިޕޯޓުތައް ބުނެ އެވެ. އަދި އެކަމާ ގުޅުން ހުރި މަޝްވަރާތައް އެފްއޭގެ އެތެރޭގައި ކުރެވެމުން އަންނަ ކަމަށާއި، އެފްއޭ އިން ބޭނުން ވަނީ 2026 ވަނަ އަހަރުގެ ފީފާ ވޯލްޑް ކަޕާ ހަމައަށް ސައުތުގޭޓް ބަހައްޓަން ކަމަށް ވެސް ރިޕޯޓުތައް ބުނެ އެވެ.

އެގޮތުން އާދިއްތަ ދުވަހުގެ ރޭ ޖަރުމަނުގައި ކުޅޭ ފައިނަލް އިން އިންގްލެންޑު ބަލިވި ނަމަވެސް، ކޯޗުކަމުން ސައުތުގޭޓް ވަކި ނުކުރާނެ ކަމަށް ވެސް ރިޕޯޓުތަކުގައި ވަނީ ބުނެފަ އެވެ. އިނގިރޭސި އެފްއޭ އިން ސަްއުތުގޭޓަށް އިތުބާރު ކުރާ ކަމަށާއި، އޭނާގެ މަސައްކަތާ މެދު ހިތްހަމަ ޖެހޭ ކަމަށް ވެސް ވަނީ ބުނެފަ އެވެ. އަނެއްކޮޅުން، އިނގިރޭސި އެފްއޭ އިން ޤަބޫލު ކުރާ ގޮތުގައި ސައުތުގޭޓާ އެކު އެ ޤައުމަށް ކާމިޔާބު ވެސް ހޯދޭނެ ކަމަށް ރިޕޯޓުތައް ބުނެ އެވެ.

ސައުތުގޭޓް ހަވާލުވީ ފަހުން އިންގްލެންޑުން ވަނީ 2018 ވަނަ އަހަރު ރަޝިޔާގައި އޮތް ފީފާ ވޯލްޑް ކަޕްގެ ސެމީ ފައިނަލްގައި ކުޅެފަ އެވެ. އޭގެ ފަހުން 2021 ވަނަ އަހަރު އަމިއްލަ ޤައުމުގައި އޮތް ޔޫރޯ މުބާރާތުގެ ފައިނަލްގައި ކުޅެފައިވާއިރު، އެންމެ ފަހުން 2022 ވަނަ އަހަރު ޤަތަރުގައި އޮތް ވޯލްޑް ކަޕް ނިންމާލަން ޖެހުނީ ކުއާޓާ ފައިނަލާ ހަމައިންނެވެ. މިއަހަރުގެ ޔޫރޯގެ ފައިނަލް އިން އިންގްލެންޑު ޖާގަ ހޯދިއިރު، މިއީ ޔޫރޯގެ ފައިނަލްގައި ޖެހި ޖެހިގެން އިންގްލެންޑު ކުޅޭނެ ދެ ވަނަ ފަހަރެވެ.