ބޮޑުވަޒީރުގެ ސަބަބުން އިނގިރޭސިންނަށް ތަށި ނުލިބިދާނެތަ؟
13 ޖުލައި 2024 | ހޮނިހިރު 03:24މެޗު ބައްލަވަން ޖަރުމަނަށް ވަޑައިގަންނަވާނެތޯ ދެންނެވި ސުވާލުގެ ޖަވާބުގައި އޭނާ ވިދާޅުވީ އެންމެ ފަހުގެ ޔޫރޯ ފައިނަލް މެޗު ބައްލަވަން ދަނޑުގައި އިންނެވި ކަމަށާއި އެފަދަ ބަދުނަސީބެއް ތަކުރާރުވާން ބޭނުންފުޅު ނުވާ ކަމަށެވެ.
އިނގިރޭސި ބޮޑުވަޒީރު ކިއާ ސްޓާމާ
ޔޫރޯ ފުޓްބޯޅަ މުބާރާތުގެ ފައިނަލްގައި އިނގިރޭސިވިލާތާއި ސްޕޭން މާދަމާ ކުޅޭ ފައިނަލް މެޗު ބައްލަވަން އިނގިރޭސި އައު ބޮޑު ވަޒީރު ސާ ކިއާ ސްޓާމާ ވަޑައިގަންނަވާނެ ކަމާމެދު ސުވާލު އުފެދިއްޖެ އެވެ.
މެޗު ބައްލަވަން ޖަރުމަނަށް ވަޑައިގަންނަވާނެތޯ ދެންނެވި ސުވާލުގެ ޖަވާބުގައި އޭނާ ވިދާޅުވީ އެންމެ ފަހުގެ ޔޫރޯ ފައިނަލް މެޗު ބައްލަވަން ދަނޑުގައި އިންނެވި ކަމަށާއި އެފަދަ ބަދުނަސީބެއް ތަކުރާރުވާން ބޭނުންފުޅު ނުވާ ކަމަށެވެ.
ސްޓާމާ އިޝާރާތް އެ ކުރެއްވީ 2021 ވަނަ އަހަރުގެ މުބާރާތުގެ ފައިނަލްގައި ލަންޑަނުގެ ވެމްބްލީގައި އިޓަލީ އަތުން ޕެނަލްޓީ ޖަހައިގެން އިނގިރޭސިން ބަލިވުމުން އެ ނަތީޖާ އަށެވެ.
ހުސްވި ހަފުތާގެ ހުކުރު ދުވަހު ބޮޑުވަޒީރުކަން ލިބިވަޑައިގެންނެވި ސްޓާމާ ވިދާޅުވީ ކޯޗު ގެރެތު ސައުތު ގޭޓަށް ބުނަން ބޭނުންފުޅުވާ ހަމައެކަނި ވާހަކައަކީ "މޮޅުވުން" ކަމަށެވެ.
އިނގިރޭސި އިދިކޮޅު ޕާޓީ އާއި ސަރުކާރުގެ ގިނަ އިދާރާތަކުން ވަނީ ތަށި ލިބިއްޖެނަމަ އުފާފާޅު ކުރުމުގެ ގޮތުން ބޭންކް ބަންދު ދުވަހެއްގެ ގޮތުގައި އިތުރު އެއްދުވަސް ސަރުކާރު ބަންދުކޮށްދިނުމަށް އޭނާގެ ކިބައިން އެދިވަޑައިގެންފަ އެވެ. ނަމަވެސް ބޮޑުވަޒީރުކަން ލިބިވަޑައިގަތުމުގެ ކުރިން މިކަމަށް ތާއީދު ކުރެއްވި ނަމަވެސް ސްޓާމާގެ މިހާރުގެ ވިސްނުންފުޅަކީ ބޭންކްތައް ބަންދުވާ ގޮަތަށް ސަރުކާރު ބަންދު ދުވަހެއް ހަމަނުޖެއްސުމެވެ. ނަމަވެސް ތަށި ލިބިއްޖެނަމަ މުޅި ގައުމުގައި ހަފުތާއެއް ވަންދެން އުފާފާޅު ކުރުމުގެ ހަރަކާތްތައް ބޭއްވުމަށް އޭނާ ތާއީދު ކުރައްވަ އެވެ.
ސްޓާމާ ވިދާޅުވީ މާދަމާ ރޭގެ ފައިނަލް މެޗުގައި ޕެނަލްޓީ ޖަހަންވެއްޖެނަމަ އިނގިރޭސިން މޮޅުވާނެ ކަމުގެ ޔަގީންކަން އެބައޮތް ކަމަށެވެ.
ފައިނަލް މެޗު ބައްލަވަން އިނގިރޭސި ރަސްގެފާނު ޗާލްސް ވަޑައިނުގަންނަވާނެ އެވެ. ނަމަވެސް އޭނާގެ ދޮށީ ދަރިލަކުން، އަދި އިނގިރޭސި ފުޓްބޯޅަ އެސޯސިއޭޝަނުގެ ރައީސް ޕްރިންސް ވިލިއަމް ބާލިންގެ އޮލިމްޕިއާ ސްޓޭޑިއަމަށް ވަޑައިގަންނަވާނެ އެވެ. އަދި ސްޕޭނުގެ ރަސްގެފާނާއި ބޮޑު ވަޒީރާއި ސަރުކާރުގެ އިސް ވަފުދެއް ޖަރުމަނަށް ވަޑައިގަންނަވާނެ އެވެ.
