1.9 މިލިއަން ރުފިޔާގެ ސްކޭމްގެ މައްސަލައެއް، އެ ފައިސާ 50 އެކައުންޓަށް ޖަމާކޮށްފައިވޭ: ފުލުހުން
ވިކްޓިމްގެ އަމިއްލަ އެކައުންޓުން 25000 ރުފިޔާ ފޭރިގަނެފައިވޭ
އިންޓަނެޓް ބޭންކިންގެ ޚިދުމަތް ހޯދަނީ
1.9 މިލިއަން ރުފިޔާގެ ސްކޭމްގެ މައްސަލައާ ގުޅިގެން އެކަކު ހައްޔަރުކޮށްފައިވާ ކަމަށާއި، އެ ފައިސާ 50 އެކައުންޓަކަށް ޖަމާކޮށްފައިވާ ކަމަށް ފުލުހުން ބުނެފިއެވެ.
ބުރާސްފަތި ދުވަހު އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމުގައި އެންޓި ސްކޭމްގެ ހެޑް އިންސްޕެކްޓަރ އޮފް ޕޮލިސް މަރިޔަމް ރަޝީދާ ވިދާޅުވީ 1.9 މިލިއަން ރުފިޔާގެ ސްކޭމްގެ މައްސަލައެއް ފުލުހުން ތަހުގީގު ކުރަމުންދާ ކަމަށެވެ.
މިމައްސަލައަކީ 18 ޖޫން 2024 ވަނަ ދުވަހު ވިޔަފާރި ކުންފުންޏެއްގެ ހިއްސާދާރަކަށް ކާކުކަން ނޭނގޭ ފަރާތަކުން ގުޅައި ވައިބަރ އަދި ވަޓްސްއަޕް މެދުވެރިކޮށް ޕްރޮޖެކްޓަކަށް މުދާ ސަޕްލައި ކުރަން ބޭނުން ކަމަށް ބުނެ އެ މުއާމަލާތުގެ ތެރޭގައި އޮޅުވާލައިގެން ވެންޑާ ރަޖިސްޓްރީ ކުރުމަށް އީމެއިލް އެޑްރެސްގެ މައުލޫމާތު ހޯދައި އީމެއިލް ކޮންޕްރޮމައިޒްކޮށް އިންޓަނެޓް ބޭންކިންގެ އެކްސެސް މެދުވެރިކޮށް ވިކްޓިމްގެ އެކައުންޓަށް އެކްސަސްވެ އެކައުންޓުން ގާތްގަނޑަކަށް 25000 ރުފިޔާ އަދި ވިޔަފާރީގެ އެކައުންޓުން އެއްމިލިއަން އަށްލައްކަ ނުވަދިހަ ހަތްހާސް ސޯޅަ ރުފިޔާ ނަގާފައިވާ މައްސަލައެއް ކަމަށް އޭނާ ވިދާޅުވިއެވެ.
ރަޝީދާ ވިދާޅުވީ މިފައިސާގެ ތެރެއިން ޖުމްލަ ފަސްލައްކަ ސާޅިސްއަށްހާސް އަށްސަތޭކަ ފަސްދޮޅަސް ފަސް ރުފިޔާ ރިކަވަރ ކޮށްދެވިފައިވާ ކަމަށެވެ. މިފައިސާ ގެއްލުންވި ފަރާތަށް ރައްދު ކުރުމުގެ މަސައްކަތް ކުރިއަށް ގެންދާއިރު، މައްސަލައާ ގުޅިގެން އެކަކު ހައްޔަރުކޮށްފައިވާ ކަމަށް އޭނާ ވިދާޅުވިއެވެ.
މިމައްސަލައާ ގުޅިގެން އިތުރު ތަފްސީލު ދެއްވަމުން އިންސްޕެކްޓަރ އޮފް ޕޮލިސް އާދަމް ނަވީން ވިދާޅުވީ މިފައިސާ ކުންފުނީގެ އެކައުންޓުން ބޭރުކުރުމަށް ޖުމްލަ 56 ޓްރާންސެކްޝަނެއް ހަދާފައިވާ ކަމަށާއި، ފައިސާ 50 އެކައުންޓަކަށް ޖަމާކޮށްފައިވާ ކަމަށެވެ.
މިމައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ. މިމައްސަލައާ ފައިސާ ފޭރިގަނެފައިވާ ކުންފުނީގެ މައުލޫމާތު ފުލުހުން ހާމަކޮށްފައިނުވެއެވެެ.
