ސްކޮލަރޝިޕާއި ލޯނު ލިބޭ ދަރިވަރުންނަށް އަމާޒުކޮށް އޮޅުވާލައިގެން ފައިސާ ހޯދުމަށް ސްކޭމް ކޯލުތަކެއް ކުރަނީ
ކޯލުތައް ލިބެމުންދާތާ ވަނީ ހަފްތާއެއް ވެފައި
ދިވެހިރާއްޖޭގެ ގައުމީ ޔުނިވަރސިޓީގެ ގްރެޖުއޭޝަނެއްގެ ތެރެއިން
ސަރުކާރުގެ ސްކޮލަރޝިޕާއި ލޯނު ލިބޭ ދަރިވަރުންނަށް އަމާޒުކޮށް އޮޅުވާލައިގެން ފައިސާ ހޯދުމަށް ސްކޭމް ކޯލުތަކެއް ކުރަމުންދާތީ ސަމާލުވުމަށް ހަޔަރ އެޑިޔުކޭޝަން މިނިސްޓްރީން އިލްތިމާސްކޮށްފިއެވެ.
ހަޔަރ އެޑިޔުކޭޝަން މިނިސްޓްރީން ބުނީ ލޯނާއި ސްކޮލަރޝިޕަށް ހޮވިފައިވާ ދަރިވަރުންނަށް އެއްވެސް ކަމަކަށް ފައިސާ ދެއްކުމަށް އެދި މިނިސްޓްރީން ނުގުޅާނެ ކަމަށެވެ.
މިފަދަ ފޯނު ކޯލެއް އަތުވެއްޖެނަމަ އެއީ ސްކޭމް ކޯލެއް ކަމަށް މިނިސްޓްރީން ބުނެއެވެ.
އެ މިނިސްޓްރީން ބުނީ މިފަދަ ކޯލު ނުވަތަ މެސެޖުތަކަަށް ސަމާލުވެ އެއްވެސް ދަރިވަރަކު ފައިސާއާ ގުޅޭ ނުވަތަ އެނޫން މައުލޫމާތެއް ހިއްސާ ނުކުރުމަށް ވަނީ އެދިފައެވެ.
ރާއްޖެއެމްވީއަށް މައުލޫމާތު ދިން ދަރިވަރަކު ބުނީ ކޯލުތައް ލިބެމުންދާތާ ހަފްތާއެއް ވެފައިވާ ކަމަށާއި، ފައިސާ ހޯދުމަށް މަސައްކަތް ކުރަނީ ވިސާގެ މުއްދަތު އިތުރު ކުރުމާއި، ޓިކެޓް ގަތުމަށް ކަމަށެވެ. އަދި ސަރުކާރުން ދަރިވަރުންނަށް ދޫކުރަންޖެހޭ ފައިސާ ދޫކުރުމުގައި އަވަސް ކުރެވޭނީ ދަރިވަރުންގެ ފަރާތުން އެއްބާރުލުން ލިބުމުން ކަމަށް ބުނަމުންދާ ކަމަށެވެ.
ސްކޮލަރޝިޕާއި ލޯނު ލިބޭ ދަރިވަރުންނަށް އަމާޒުކޮށް ސްކޭމްތަކެއް ހިންގަމުންދާތީ ސަމާލުވުމަށް ހަޔަރ އެޑިޔުކޭޝަން މިނިސްޓްރީން އަންގާފައި މިވަނީ ސަރުކާރުގެ ޚަރަދުގައި ދީފައިވާ ސްކޮލަރޝިޕް ތަކާއި ސްޓޫޑެންޓު ލޯނުގެ އެހީގައި ބޭރުގައި ކިޔަވާ ދިވެހި ދަރިވަރުންނަށް ފޯރުކޮށްދޭން ޖެހޭ ފައިސާ ނުދޭ މައްސަލަ ބޮޑުވެފައިވާ ދަނޑިވަޅެއްގައެވެ.
