އިޝާންގެ ލަނޑުތަކާއެކު މިލަންދޫ އިން މާޅޮސް ހިފަހައްޓައިފި

ދިވެހި ޕްރިމިއާ ލީގުގައި ބަދަލު ކުޅުންތެރިޔެއްގެ ގޮތުގައި ދެވަނަ ހާފްގައި ކުޅެން އެރި އިޝާން އިބްރާހިމް ކާމިޔާބު ކުރި ދެ ލަނޑުން މިލަންދޫ އިން މާޅޮސް ހިފަހައްޓައިފި އެވެ.

ހުކުރު ދުވަހު ހަވީރު ކުޅުނު މެޗު އެއްވަރުވީ 2-2 ގެ ނަތީޖާއަކުންނެވެ.

ގަލޮޅު ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅުނީ މިލަންދޫ އެވެ. އެގޮތުން އެޓީމުން ވަނީ މާޅޮސްގެ ހާފަށް ބާރު ބޮޑުކޮށް ލަނޑު ޖެހުމަށް ފުރުސަތުތަކެއް ތަނަވަސް ކޮށްފައެވެ.

މެޗުގެ 8 ވަނަ މިނެޓުގައި މިލަންދޫގެ ޒަމީރު އަށް ލީޑު ނެގުމަށް ވަނީ ހުސް ފުރުސަތެއް ލިބިފައެވެ. އެހެން ނަމަވެސް އޭނާ ބޯޅަ ކުރިއަށް ފޮނުވާލުން ލަސްވުމުން މާޅޮހުގެ ކީޕަރު ވަނީ ބޯޅަ ދިފާއު ކޮށްފައެވެ. މެޗުގެ 13 ވަނަ މިނެޓުގައި މިލަންދޫގެ އިބްރާހިމް ޝިއާމް އަށް ވެސް ވަނީ ލީޑު ނެގުމަށް ފުރުސަތެއް ލިބިފައެވެ. އެހެން ނަމަވެސް އޭނާ ފޮނުވާލި ބޯޅަ ދިޔައީ ގޯލު ދަނޑިމަތިން ބޭރަށެވެ.

މިލަންދޫ އިން މެޗުގައި ރަނގަޅަށް ކުޅެމުންދަނިކޮށް މާޅޮހުން މެޗުގެ ލީޑު ނެގީ 28 ވަނަ މިނެޓުގައެވެ. މި ލަނޑު އެޓީމަށް ކާމިޔާބު ކޮށްދިނީ މުނޯޒް އެވެ. މި ލަނޑަށް ފަހު މާޅޮހުން ވަނީ މެޗުގެ ކުޅުން ރަނގަޅު ކޮށްފައެވެ. އެގޮތުން 33 ވަނަ މިނެޓުގައި މުނޯޒް އަށް ވަނީ ލީޑު ފުޅާ ކުރުމަށް ފުރުސަތެއް ލިބިފައެވެ. އެހެން ނަމަވެސް މުނޯޒް ފޮނުވާލި ހަމަލާ މިލަންދޫ ކީޕަރު ވަނީ ދިފާއު ކޮށްފައެވެ.

ފުރަތަމަ ހާފް ނިމުނީ 0-1 ގެ ނަތީޖާއިން މިލަންދޫގެ މައްޗަށް މާޅޮސް ކުރީގައި އޮވެގެންނެވެ.

ދެވަނަ ހާފް ފެށިގެން މާޅޮހުން ވަނީ މެޗުގެ ލީޑު ފުޅާ ކޮށްފައެވެ. މި ލަނޑު 68 ވަނަ މިނެޓުގައި އެޓީމަށް ކާމިޔާބު ކޮށްދިނީ ކެޕްޓަން އިބްރާހިމް ނާފިއު އެވެ. މި ލަނޑަށް ފަހު މިލަންދޫ އިން ވަނީ ޑިފެންސް ވަރުގަދަކޮށް ކައުންޓާ އަށް އިސްކަންދީގެން ކުޅެން ފަށާފައެވެ.

އެގޮތުން މެޗުގެ ފަހު 10 މިނެޓުގައި މިލަންދޫ އިން ވަނީ އެޓީމުގެ އެޓޭކްތައް ވެސް ވަރުގަދަ ކޮށްފައެވެ. މިލަންދޫ އިން ނަތީޖާގެ ފަރަގު ކުޑަކުރީ 85 ވަނަ މިނެޓުގައި އިޝާން ކާމިޔާބުކުރި ލަނޑުންނެވެ. މި ލަނޑު އޭނާ ކާމިޔާބުކުރީ ކީޕަރު ބޯ މަތިން ފޮނުވާލައިގެންނެވެ.

މިލަންދޫ އިން ނަތީޖާ ހަމަހަމަކުރީ މެޗުގެ ފުރިހަމަ ވަގުތު ހަމަވެގެން ބަދަލު ރެފްރީ ދެއްކި ހަތަރު މިނެޓު ތެރޭގައެވެ. މި ލަނޑުވެސް އެޓީމަށް ކާމިޔާބު ކޮށްދިނީ އިޝާން އެވެ.

މެޗަށް ފަހު ވާހަކަ ދައްކަމުން މިލަންދޫގެ ކޯޗު މުހައްމަދު ނާސިރު ބުނީ މިލަންދޫ ޓީމަކީ ވަރަށް ހިތްވަރުކުރާ ޓީމެއް ކަމަށާއި، މެޗުގެ ފަހުވަގުތު ފެނިގެންދިޔައީ އޭގެ ނަތީޖާ ކަމަށެވެ. މީގެ އިތުރުން ނާސިރު ވަނީ ކުޅުންތެރިން އަދި ސަޕޯޓަރުންގެ ހިތްވަރަށް ޝުކުރު އަދާކޮށްފައެވެ.

ނާސިރު ބުނީ އަބަދުވެސް އޭނާކުޅުންތެރިންނަށް ވިސްނައިދެމުންދިޔައީ ބައިކޮޅަށް ލަނޑެއް ވަނުމަކީ ބަލިވުން ނޫން ކަމަށާއި، ދެޓީމުވެސް ކުޅުނީކަމަށެވެ. އޭނާ ބުނީ ލިބޭ ފުރުސަތުތައް ގެއްލޭނަމަ މޯޓިވޭޝަން ދަށްވެގެންދާ ކަމަށާއި، އެހެން ނަމަވެސް އެ ވެއްޓިގެންދާ ވަގުތު އަނބުރާ ނަގާ ކޮޅަށް ޖެހިތަން ފެނިގެންގޮސްފި ކަމަށެވެ.

މެޗަށް ފަހު ވާހަކަ ދައްކަމުން މާޅޮސްގެ ކޯޗު ނިޝްތާރު ބުނީ ފަހުވަގުތު ބައިކޮޅަށް ދެ ލަނޑު ވަނުމަކީ ބަލިވުން ކަމަށް އޭނާ އަށް ސިފަ ކުރެވޭ ކަމަށާއި، އޭގެއިން ދޭހަވަނީ ކުޅުންތެރިންގެ ބުންވަރު ނެތްތަން ކަމަށެވެ. އޭނާ ބުނީ ފުޓުބޯޅައިގައި ލިބޭނީ ޑިޒާވްވާ އެއްޗެއް ކަމަށާއި، އެގޮތުން މިލަންދޫ އަތުން މާޅޮހަށް ޑިޒާވްވީ އެއް ޕޮއިންޓް ކަމަށެވެ.

ލީގުގައި ހުކުރު ދުވަހުގެ ރޭ ބައްދަލު ކުރާނީ ތިނަދޫ އަދި ކްލަބް ގްރީން ސްޓްރީޓެވެ. މި މެޗު ފަށާނީ 21:00 ޖަހާއިރެވެ.