ވެރިކަމަށް 8 މަސްވާއިރު، ފްލެޓުތައް ޙަވާލުކޮށް ނުލެވުމުން މި ސަރުކާރުން ރައްޔިތުންނާމެދު އޯގާތެރިކަމެއް ނެތްކަން އެނގިގެންދޭ: ޑރ ޑީޑީ

ވެރިކަމަށް 8 މަސްވާއިރު، ފްލެޓުތައް ޙަވާލުކޮށް ނުލެވުނީމާ މި ސަރުކާރުން ރައްޔިތުންނާމެދު އޯގާތެރިކަމެއް ނެތްކަން އެނގިގެންދާކަމަށް އެމްޑީޕީގެ ކުރީގެ ރައީސް ޑރ.އިބްރާހިމް ދީދީ (ޑރ.ޑީޑީ) ވިދާޅުވެއްޖެއެވެ.

އޭނާ އެފަދައިން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.

ޑރ ޑީޑީ ވިދާޅުވީ، އެމްޑީޕީން ރައްޔިތުންގެ ގާތަށް ގޮސް، ކަންބޮޑުވުންތައް އަޑުއަހައިގެން، ބޯހިޔާވަހިކަމުގެ މައްސަލައަށް ޙައްލު ހޯދުމަށް މަސައްކަތްތަކެއް ކޮށްފައިވާ ކަމަށާއި، މިއަދުގެ ސަރުކާރުގައި ވެރިކަމަށް 8 މަސް ވެގެންދާއިރު، ފްލެޓުތައް އޭގެ ހައްގުވެރިންނަށް ހަވާލުކޮށް ނުދެވުމަކީ ކަންބޮޑުވުމެއް ކަމަށެވެ.

މިދިޔަ ސަރުކާރުން ޤާއިމުކޮށްފައިވާ ފްލެޓުތައް ފުރިހަމަކަމުގެ ވާހަކަ ސީދާ މި ސަރުކާރުގެ ހައުސިންގ މިނިސްޓަރުވެސް ދައްކަވާފައިވާކަން ޑރ ޑީޑީ ފާހަގަ ކުރެއްވިއެވެ.

ޑރ ޑީޑީ ވިދާޅުވާ ގޮތުގައި މިކަންކަމުން އެނގެނީ ރައްޔިތުންނާމެދު މި ސަރުކާރުން އެއްވެސް ކަހަލަ އޯގާތެރިކަމެއް، އެއްވެސް ކަހަލަ އިހުލާސްތެރިކަމެއް ނުގެންގުޅޭކަމެވެ.

ޑރ ޑީޑީ އެހެން ވިދާޅުވެފައިވާއިރު، ގެދޮރުވެރިޔާ ފްލެޓްތަކުގެ ސައިޓަށް ޒިޔާރަތްކުރައްވާ ހައުސިންގ މިނިސްޓަރ ހައިދަރު ދެއްކެވި ވާހަކަފުޅުގައި ވަނީ އެތަން ހުރީ ހިޔާ ފްލެޓަށް ވުރެ ޖާގައިގެ ގޮތުން ތަނަވަސްކޮށް ޑިޒައިންކޮށްފައި ކަމަށް ވިދާޅުވެފައެވެ.

އަދި ކުނި މެނޭޖްކުރުމުގައި ހިޔާ ފްލެޓަކަށް ވުރެ ރަނގަޅު އިންތިޒާމްތަކެއް ހުރިކަަމަށް ވިދާޅުވިއެވެ. ހަމައެހެންމެ ޕްރައިވެސީ ނުވަތަ އަމިއްލަ މިނިވަންކަމަށް ބެލިޔަސް މި ފްލެޓްތައް މާ ރަނގަޅު ކަމަށް ވިދާޅުވިއެވެ.