ސަރުކާރުން ފޮޅާ ސާފު ކުރުމުގެ ވިޔަފާރީގެ ތެރެއަށް ވަންނަނީ
މި ޚިދުމަތުގައި ތިބި ކުދި ވިޔަފާރިތަކަށް ބޮޑު ގެއްލުމެއް ވާނެ ކަމެއް ކަމަށް ބައެއް ފަރާތްތަކުން ވަނީ ބުނެފައި
ފޮޅާ ސާފު ކުރުމުގެ ޚިދުމަތް ރަސްމީ ކޮށް ލޯންޗް ކުރުމުގެ ތައްޔާރުތައް ވެމްކޯ އިން އަންނަނީ ވަމުން
އިމާރާތް ފޮޅާ ސާފު ކުރުމުގެ ވިޔަފާރީގެ ތެރެއަށް ސައްތައިން ސައްތަ ސަރުކާރުގެ ހިއްސާ އޮންނަ ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ވަންނަން ނިންމާފައިވާ ކަމަށް އެ ކުންފުނިން ހާމަ ކޮށްފިއެވެ.
ކުދި ވިޔަފާރި ކުންފުނި ތަކުން މިހާތަނަށް މާލޭގައި ދެމުން އަންނަ މި ޚިދުމަތުގެ ތެރެއަށް ވެމްކޯ އިން ވަންނަން ނިންމި ސަބަބާ ބެހޭ ގޮތުން، ދައުލަތުގެ މީޑިއާ، ޕީއެސްއެމްގެ "ރާއްޖެ މިއަދު" ޕްރޮގްރާމް ގައި ވާހަކަ ދައްކަވަމުން ކުންފުނީގެ ޑެޕިއުޓީ މެނޭޖިންގ ޑިރެކްޓަރ (ޑީއެމްޑީ) މުހައްމަދު އަބްދުލް ކަރީމް ވިދާޅުވީ، އެއީ ވެމްކޯ އަކީ ފައިދާވާ ކުންފުންޏަކަށް ހެދުމުގެ ގޮތުން ކަމުގައެވެ.
"ކުންފުންޏަކީ ފައިދާ ހުރި ކުންފުންޏަކީ ދެކޮޅު ޖެހޭ ކުންފުންޏަކަށް ހެދުމުގެ މަގްސަދުގައި އަޅުގަނޑުމެން އިންޓްރޮޑިއުސް ކުރި ސާވިސް އެއް،" މުހައްމަދު އަބްދުލް ކަރީމް ވިދާޅުވިއެވެ.
ފޮޅާ ސާފު ކުރުމުގެ ޚިދުމަތް ރަސްމީ ކޮށް ލޯންޗް ކުރުމުގެ ތައްޔާރުތައް ވެމްކޯ އިން ވަމުންދާއިރު، މުހައްމަދު އަބްދުލް ކަރީމް ވިދާޅުވީ ފުރަތަމަ ޚިދުމަތް ދޭން ފަށާނީ ސަރުކާރުގެ އޮފީސް ތަކަށް ކަމަށެވެ.
ޚިދުމަތް ދޭން ފެށުމަށް ބޭނުންވާ ތަމްރީން ތަކާއި، މުވައްޒަފުންގެ ޔުނިފޯމް ތައްޔާރު ކުރުން ފަދަ އެންމެ ފަހުގެ ތައްޔާރީ ތަކާއި މަޝްވަރާތައް މިހާރުވެސް ކުރިއަށް ދާ ކަމަށް އޭނާ ވިދާޅުވިއެވެ.
އޭނާ ވިދާޅުވީ، ޚިދުމަތް ފަށާއިރު ވެމްކޯ އަކީ ސަރުކާރު ހިއްސާވާ ކުންފުންޏަކަށް ވާތީ ބިޑް ކުރާކަށް ނުޖެހޭނެ ކަމަށެވެ.
ވެމްކޯ އިން ފޮޅާ ސާފު ކުރުމުގެ މަސައްކަތް ފެށުމުން ދެން ޚިދުމަތް ދޭނީ ފޮޅާ ސާފު ކުރުމުގެ ޚިދުމަތާއި ކުނި އެކުމުގެ ޚިދުމަތް އެއްކޮށް ދޭ ޚިދުމަތެއްގެ ގޮތުގައި ކަމަށްވެސް ވެމްކޯގެ ޑީއެމްޑީ ވިދާޅުވިއެވެ.
ސަރުކާރުން މިފަދަ ކުދި ވިޔަފާރިތަކުގެ ތެރެއަށް ވަންނަން ނިންމުމުން ބައެއް ފަރާތްތަކުން ވަނީ ސޯޝަލް މީޑިއާ ގައި އެކަމުގެ ކަންބޮޑުވުން ފާޅު ކޮށްފައެވެ.
ސަރުކާރުގެ ކުންފުނިތަކުން މިފަދަ ވިޔަފާރީގެ ތެރެއަށް ވަނުމުން މި ކަމުން އުފެދޭ ވާދަވެރި ކަމުގައި ކުދި އަދި މެދު ފަންތީގެ ވިޔަފާރިތަކަށް ހިފަހައްޓާ ނުލެވި، ބޮޑެތި ގެއްލުންވެ، އާޚިރުގައި މަސައްކަތް ހުއްޓާލަން ޖެހޭނެ ކަމަށް ބައެއް ފަރާތްތަކުން ވަނީ ބުނެފައެވެ.
މިއީ މި ޚިދުމަތުގައި މަސައްކަތްކުރާ ކުދި ކުންފުނިތައް އިނދަޖެހިގެން ދާނެ ކަމެއްގެ ގޮތުގައި ބައެއް ފަރާތްތަކުން ވަނީ ސިފަ ކޮށްފައެވެ.
