ބާރަށު ދާއިރާގެ މައިކުން ކިޔަނީ 82،500 ރުފިޔާ އަދިވެސް ކުޑައޭ

ރާއްޖޭގެ މާލީ ހާލަތު ގޯސްވެ ބަނގުރޫޓޫވެދާނެކަމަށް ސަރުކާރުން އަންނަނީ ވަކާލާތުކުރަމުންނެވެ. ހުރިހާކަމެއްވެސް އަޅުވަނީ ކުރީ ސަރުކާރުގެ ބޮލުގައެވެ. ނަމަވެސް ކަން އޮތީ އެހެންނެއްވެސް ނޫނެވެ. ގައުމު ބަނގުރޫޓުވާ ކަމެއް ސަރުކާރުގެ އިސްވެރިންގެ ބަހާއި އަމަލުން ނޭނގެއެވެ. އަދިވެސް ދައްކަނީ ލިބޭ އެތިކޮޅު މަދު ވާހަކައެވެ. އުސޫލެއްނެތ،ި ތަރުތީބެއްނެތި މި ސަރުކާރުން އަމަލުކުރަމުން ގެންދާ ގޮތުގެ ސަބަބުން ދައުލަތް މެނޭޖުނުކުރެވި ބޮޑު ތަނުން ސަރުކާރު ދަރައިގެން، ރައްޔިތުން ދަރައިގެން ގޮސްފިއެވެ. ނަމަވެސް އަދިވެސް ހަރުދަނާ ފިޔަވަޅެއް ނޭޅެއެވެ.

މި ރާއްޖެއަށް މިހާތަނަށް ދިމާވި އެންމެ ދަތިކަމަށްވީ ކޮވިޑް-19 އާއި ގުޅިގެން ދިމާވި ކަންތަކެވެ. އެއިރު ސަރުކާރުން އެޅި އަވަސް ފިޔަވަޅުތަކާއެކު މިއަދު ރާއްޖޭގެ އިގްތިސާދު ދަނީ ބާރަށް ކުރިއަށެވެ. މާލީ އިދާރާތަކުން އައީ އެކަމަށް ތައުރީފް ކުރަމުންނެވެ. ސަރުކާރުން ފުރަތަމަވެސް ނިންމީ ނިކަމެތި ރައްޔިތު މީހާއަށް ތަކުލީފެއް އުފުލަން ނުޖެހޭނެހެން މުސާރަތައް ކުޑަކުރުމަށެވެ. އާންމު ރައްޔިތުންގެ މުސާރައާއި ނުކުޅެ ރައީސުލްޖުމްހޫރިއްޔާއިން ފެށިގެން ސިޔާސީ އެކިއެކި މަގާމުތަކާއި މަޖިލިސް މެންބަރުންގެ މުސާރަވެސް ކުޑަކުރިއެވެ. އެއީ އެ ސަރުކާރުގެ ރޭވުންތެރިކަމާއި ގައުމު ހިންގަން އެނގޭކަމުގެ ހެއްކެކެވެ.

ނަމަވެސް މި ސަރުކާރު އަދި މާތަފާތެވެ. މާލީ ހާލަތު ދަށްކަމަށް ބުނެ އެންމެ އާދާއިގެ މީހާއަށް އޭގެ އަސަރުކުރަމުން އަންނަ އިރު ސަރުކާރުގެ ބޮޑުން އަދިވެސް އުޅެނީ މުސާރަ ކުޑަވެގެންނެވެ. ސަރުކާރުގެ ސިޔާސީ މަގާމުތައް ހާހުން މައްޗެވެ. މުސާރައަށް އެތައްސަތޭކަ މިލިއަން ރުފިޔާ ކޮންމެ މަހަކު އެބަ ހަރަދުކުރެއެވެ. ދެން ސިޔާސީ މީހެއް ނުނަގާނެކަމަށް ބުނެ އަރިސް ކޮންމެވެސް ބޭފުޅެއްގެ ބަފައިބެ، މައިދައިތަ ނޫނީ ކޮންމެވެސް އާއިލީ މީހަކަށް މިދެނީ 25، 30 ހާހުން މުސާރަ ލިބޭ މަގާމުތަކެވެ.

މި ސަރުކާރު ވެރިކަމަށް ގެންނަން އެންމެ ބާރަށް އަޑު އުފުލީ ބާރަށު ދާއިރާގެ މެންބަރު އިބްރާހިމް ސުޖާއުއެވެ. މަޖިލީހަށް ވަޑައިގަންނަވަން އަދި އެއަށްވުރެ ބާރަށް ވާހަކަ ދެއްކެވިއެވެ. އެއިރު ވިދާޅުވީ މަޖިލިސް މެންބަރުންގެ މުސާރަ ބޮޑުކަމަށެވެ. ކުޑަކުރަން ޖެހޭ ކަމަށެވެ. މި ވާހަކައަށް ހެއްލި ބާރަށު ދާއިރާގެ ރައްޔިތުން އޭނާ ބާރަށު ދާއިރާގެ ގޮނޑީގައި ބައިންދާ މައިކް ދިނެވެ. އެއިރު ދެއްކި ވާހަކައަށް ވަކާލާތު ކުރުމަށެވެ.

ކެމްޕޭންގައި ބޭއްވި ބަހުސެއްގައި ސުޖާއު ވިދާޅުވީ ބާރަށު ދާއިރާގެ މައިކަކީ މަޖިލީހުގެ މެންބަރުން އެއްދައުރު ކުރީމަ މާލީ އިނާޔާތްތައް ކެނޑެންޖެހޭނެކަމަށް ވަކާލާތުކުރާނެ މައިކެއް ކަމަށެވެ. ރަނގަޅު ވާހަކައެކެވެ. ދެން ވިދާޅުވީ މަޖިލިސް މެންބަރުކަން ދޫކޮށްލުމުން ލިބޭ އިންޝިއުރެންސަކީ އެއީ އޮވެގެންވާނެ އިންޝިއުރެންސެއްކަމަށް ގަބޫލު ނުކުރައްވާ ކަމަށެވެ. ބާރަށު ދާއިރާގެ މައިކުން އެވާހަކަވެސް ދައްކައިފިއެވެ.

ނަމަވެސް ދެން ވިދާޅުވީ ބޭނުންފުޅުވެގެން ދެއްކި ވާހަކައެއްނޫނެވެ. ބަހުސްގައި ވިދާޅުވީ ބާރަށު ދާއިރާގެ މައިކުން ވިދާޅުވާނީ މަޖިލީހުގެ މެންބަރުންގެ މުސާރަ ކުޑަކުރާނެކަމުގެ ވާހަކައެވެ. ނަމަވެސް އެހެނެއް ނުވިއެވެ. އެ ދެއްކި ވާހަކަ އެ މިސްރާބުން ނުގޮސް 82،500 ރުފިޔާގެ މުސާރަ ކުޑަކަމަށް ސުޖާއު ވަކާލާތު ކުރައްވަން ފަށައިފިއެވެ. ބާރަށު ދާއިރާގެ މައިކުން މިހާރު ކިޔަނީ މުސާރަ ކުޑައެވެ. ބޮޑުކުރަންޖެހެއެވެ.

ޝުޖާއު ވިދާޅުވީ ރައްޔިތުންގެ މަޖިލީހަށް އައުމަށްޓަކައި މަސައްކަތްކުރާ ގިނަ މީހުން ރައްޔިތުންގެ މަޖިލީހުގެ މެންބަރުންގެ މުސާރައާ ގުޅޭގޮތުން ޝަކުވާ ކުރައްވާނެ ކަމަށެވެ.

މަޖިލީހުގެ މެންބަރުންގެ މުސާރަ ކުޑަކަމަށް ވިދާޅުވެ މެންބަރު ސުޖާއު ވިދާޅުވީ މަޖިލީހުގެ މެންބަރުންނަށް ލިބެނީ 42500 ރުފިޔާ ކަމަށާއި، ސިޓީ ކައުންސިލަރަކަށް ލިބޭ 30000 ރުފިޔާ ކަމަށެވެ. މީގެ އިތުރުން މުސާރައިގެ އިތުރުން އެލަވަންސެއްގެ ގޮތުގައި ލިބެނީ 20000 ރުފިޔާ ކަމަށާއި، އެއީ ދުނިޔޭގެ ކޮންމެ ގައުމެއްގެ ވެސް ސެކަންޑް ހޯމް އެލަވަންސްގެ ގޮތުގައި ލިބިވަޑައިގަންނަވާ އެލަވަންސް ކަމަށް ސުޖާއު ވިދާޅުވިއެވެ.

ޝުޖާއު ވިދާޅުވީ މެންބަރުންނަށް ލިބިވަޑައިގަންނަވާ 42،500 ރުފިޔާއާއި 20،000 ރުފިޔާގެ ލިވިންގ އެލަވަންސް އަދި ކޮމިޓީ އެލަވަންސްގެ ގޮތުގައި ލިބޭ 20،000 ރުފިޔާއާއެކު މެންބަރަކަށް ލިބިވަޑައިގަންނަވާ 82،500 ރުފިޔާ ކުޑަ ކަމަށެވެ.

ރައްޔިތުންގެ މަޖިލީހުގެ މެންބަރަކަށް އަސާސީ މުސާރައިގެ ގޮތުގައި 42،500 ރުފިޔާއާއި 20،000 ރުފިޔާގެ ލިވިންގ އެލަވަންސް އަދި ކޮމިޓީ އެލަވަންސްގެ ގޮތުގައި ލިބޭ 20،000 ރުފިޔާއާއެކު މެންބަރަކަށް 82،500 ރުފިޔާ ލިބިވަޑައިގަންނަވައެވެ.

މަޖިލީހުގެ މެންބަރުންގެ މުސާރަ ބޮޑު ކަމަށާއި، ކުޑަކުރަންޖެހޭ ކަމަށް ކެމްޕޭނުގައި އަޑަށް ބާރުލާ އެންމެ ގިނައިން އެ ވާހަކަ ދެއްކެވި ރައްޔިތުންގެ މަޖިލީހުގެ ބާރަށު ދާއިރާގެ ޕީއެންސީގެ މެންބަރު އިބްރާހިމް ޝުޖާއު މިވަނީ މުސާރައިގެ ޝަކުވާ ކޮށްފައެވެ. 82،500 ރުފިޔާ މަދުކަމަށެވެ. ބާރަށު ދާއިރާގެ މައިކުން އެ އަޑު ނުކެނޑެއެވެ.