ސަރުކާރުގެ އޮފީސް ތަކާ ބައްދަލު ކުރަން ދަތުރު ހަދައިގެން މާލެ ނައުމަށް ކައުންސިލްތަކަށް އަންގައިފި

ރާއްޖޭގެ ދަރަނި ބޮޑުވެގެން ކަމަށް ބުނެ، ކައުންސިލްތަކުން ކުރާ ޚަރަދުތައް ކުޑަކުރުމަށް ލޯކަލް ގަވަރމަންޓް މިނިސްޓްރީން ބުދަ ދުވަހު ކައުންސިލްތަކަށް އަންގައިފިއެވެ.

ލޯކަލް ގަވަމަންޓް މިނިސްޓަރު އާދަމް ޝަރީފް ބުދަ ދުވަހު ކައުންސިލްތަކަށް ފޮނުއްވި ސާކިއުލަރ ގައި ބުނެފައިވަނީ ރާއްޖޭގެ ދައުލަތުގެ ދަރަނި ބޮޑުވުމުގެ ސަބަބުން އިގުތިސޯދަށް ކުރިމަތިވެފައިވާ ގޮންޖެހުންތަކުން އަރައިގަތުމުގެ ގޮތުން ސަރުކާރުގެ އިދާރާތަކާއި ބައްދަލުކުރަން ކައުންސިލް ތަކުން މާލެ އައުމުގެ ބަދަލުގައި އޮންލައިންކޮށް ބައްދަލުވުންތައް ބޭއްވުމަށް ޚާއްސަ ސަމާލު ކަމެއް ދިނުމަށެވެ. އަދި އެއްވެސް ހަފްލާ އެއް އަދި ކުޅިވަރު މުބާރާތެއް ވެސް މި ވަގުތު ނުބޭއްވުމަށް އަންގާފައި ވެއެވެ.

ކައުންސިލްތަކުގެ ހިންގުމުގެ ހަރަދުތައް ކުޑަކުރުމަށް ހާއްސަ އިސްކަމެއް ދިނުމަށް އެ ސަރކިއުލަރގައި ބުނެފައިވާއިރު، ދައުލަތުގެ ހަރަދުތައް ކުޑަކުރުމަށް ސަރުކާރުން މުހިންމު ފިޔަވަޅުތަކެއް އަޅަން ފަށާފައިވާ ކަމަށް ވެސް ސަރކިއުލަރ ގައި ބަޔާން ކޮށްފައިވެއެވެ. އެހެން ނަމަވެސް މިހާތަނަށް އެޅި ފިޔަވަޅެއްގެ މައުލޫމާތެއް ފާހަގަ ކޮށްފައެއް ނުވެއެވެ.

މި ވަގުތު ކޮންމެހެން ކުރަން ޖެހޭ ހަރަދެއް ނޫނީ ނުކުރަން ކައުންސިލްތަކަށް އެ ސަރކިއުލަރ އިން އެންގުމުގެ އިތުރުން ހުސްވި މަހު ފަހުކޮޅު ޗައިނާގެ ޝަންހާއީ އަށް ރަސްމީ ދަތުރުފުޅެއް ކުރެއްވި، އާދަމް ޝާރީފް ފޮނުއްވި ސަރކިއުލަރ ގައި ކައުންސިލު ތަކުން ރާއްޖެއިން ބޭރަށް ކޮންމެހެން ކުރަން ޖެހޭ ދަތުރެއް ނޫނީ ނުކުރުމަށް ވެސް ވަނީ އަންގަވާފައެވެ.

ޚަރަދު ކުޑަކުރުމުގެ ގޮތުން ކަމަށް ބުނެ ކައުންސިލްތަކުން ކުރާ މުހިންމު އެތައް މަސައްކަތެއް މެދުކަނޑާލާން ސަރުކާރުން އެންގި އިރު، ސިޔާސީ މަގާމުތަކަށް މި ހަފްތާގައިވެސް އަލަށް މީހުންނަށް ވަޒީފާދީފައިވާ ކަން ވަނީ ހާމަވެފައެވެ. އޭގެ އިތުރުން ސިޔާސީ ގޮތުން ނުފޫޒް ގަދަ ފަރާތްތަކުގެ އެދުމަށް ކުންފުނިތަކުން ވެސް ވަޒީފާތަކަށް އަލަށް ހިނގަމުންދާ ހަފްތާގައި މީހުން ނަގާފައެވެ.

އަނެއްކޮޅުން، އެއްވެސް މަސައްކަތެއްނެތި ގޭގައި ބައިތިއްބައިގެން ބައެއް މީހުންނަށް މުސާރަ ދިނުމަށް ދައުލަތުން އެތައް ލައްކަ ރުފިޔާއެއް ޚަރަދު ކޮށްފައިވާކަންވެސް ވަނީ ހާމަވެފައެވެ.

ލާމަރުކަޒީ ގާނޫނުގެ ދަށުން ކައުންސިލްތައް ނިސްބަތްވާ ދާއިރާތައް ހިންގުމުގެ މިނިވަންކަން ކައުންސިލަށް ދީފައި ވީ ނަމަވެސް ޑރ. މުއިއްޒުގެ ސަރުކާރުން އަލަށް އުފެއްދި ލޯކަލް ގަވަރމަންޓް މިނިސްޓްރީ އިން ކައުންސިލްތައް ހިންގުންވަރަށް ބޮޑަށް ކޮންޓްރޯލް ކުރަމުންދާ ކަމަށް ބައެއް ކައުންސިލްތަކުން ވަނީ ބުނެފައެވެ. އަނެއްކޮޅުން ކައުންސިލްތައް ރެގިއުލޭޓް ކުރުމުގެ ގާނޫނީ ޒިންމާ އުފުލުމަށް ލޯކަލް ގަވަމަންޓް އޮތޯރިޓީގެ ނަމުގައި ވަކި އޮފީހެއް އުފައްދާފައި ވުމާއެކު، މަސްއޫލިއްޔަތުތައް ފުށުއަރާ، ދެ މުއައްސާސާ އަކުން އެއް މަސައްކަތެއް ކުރާތީވެސް ކައުންސިލްތައް ހިންގުމުގައި ދަތިތައް ކުރިމަތިވާ ކަން ކައުންސިލްތަކުން އަންނަނީ ފާހަގަ ކުރަމުންނެވެ.

ބައެއް ފަރާތްތަކުން ދެކޭ ގޮތުގައި އެއް މަސައްކަތެއް ކުރުމަށް ދެ އޮފީސް އުފައްދާފައި ހުރުމަކީ ވެސް ދައުލަތުގެ ވަސީލަތްތައް އިސްރާފު ވެގެންދާ ކަމެކެވެ.