ޖަރުމަނުގައި މިހާރު ކުރިއަށްދާ ޔޫރޯ ފުޓުބޯޅަ މުބާރާތުގެ ކުއާޓާ ފައިނަލުން ތުރުކީ އަށް ޖާގަ ލިބުމަކީ، ބަޔާން ކުރަން ވެސް އުނދަގޫ އުފަލެއް ލިބުނު ކަމެއް ކަމަށް އެ ޓީމުގެ ކޯޗު ވިންޗެންޒޯ މޮންޓެލާ ބުނެފި އެވެ.

އޭނާ މިހެން ބުނީ، ޔޫރޯ ފުޓުބޯޅަ މުބާރާތުގެ ގަދަ 16 ވަނަ ބުރުގައި ތުރުކީން އޮސްޓްރިއާ ދެކޮޅަށް ކުޅުނު މެޗަށްފަހު ނޫސްވެރިންނާ ވާހަކަ ދައްކަމުންނެވެ. އޮސްޓްރިއާ ދެކޮޅަށް ކުޅުނު މެޗު 2-1 އިން ކާމިޔާބުކޮށް، ތުރުކީން ވަނީ މުބާރާތުގެ ކުއާޓާ ފައިނަލުން ޖާގަ ހޯދައިފަ އެވެ.

އެ މެޗަށްފަހު ނޫސްވެރިންނާ ވާހަކަ ދައްކަމުން މޮންޓެލާ ބުނީ، ތުރުކީގެ ކުޅުންތެރިން ދަނޑު މަތީގައި ދެއްކީ އޭނާ ފަޚުރުވެރިވާ ފަދަ ކުޅުމެއް ކަމަށެވެ. އެފަދަ ކުޅުމެއް ކުޅުންތެރިން ދައްކަމުން އައި މަންޒަރު ބަލަން ހުރުމަކީ، ކޯޗަކަށް ހުންނަ މީހަކަށް ލިބޭނެ ވަރަށް ބޮޑު ޝަރަފެއް ކަމަށް ވެސް މޮންޓެލާ ބުންޏެވެ. ކުޅުންތެރިން ކުރި މަސައްކަތް ފެނިފައި ވެސް، ތުރުކީ އަށް ކާމިޔާބު ބޭނުންވާ މިންވަރު އިޙުސާސް ކުރެވުނު ކަމަށް ވެސް މޮންޓެލާ ވަނީ ބުނެފަ އެވެ.

މެޗުގެ އެންމެ ފަހު ވަގުތު ތުރުކީގެ ގޯލު ކީޕަރު ކުރި މުހިންމު ސޭވް އަށް ވެސް މޮންޓެލާ ވަނީ ތައުރީފު ކޮށްފަ އެވެ. އޭނާ ބުނީ މާޓް ގުނޮކް އަކީ މޮޅު ކީޕަރެއް ކަމަށާއި، ފަހު ވަގުތު އޭނާ އެ ދައްކައިދިނީ އޭނާގެ ހުށިޔާރުކަން ކަމަށް ވެސް މޮންޓެލާ ބުންޏެވެ. އެކަން ފާހަގަކޮށް އޭނާ ބުނީ، ތުރުކީ ޓީމުގައި ތިބި ކޮންމެ ކުޅުންތެރިޔަކާ މެދު ވެސް އޭނާ އުފާވާ ކަމަށާއި، ފަޚުރުވެރިވާ ކަމަށެވެ.

މީގެ އިތުރުން މޮންޓެލާ ބުނީ، މިއީ އޭނާގެ ކޯޗިން ކެރިއަރުގައި ވެސް ލިބުނު ކާމިޔާބެއްގެ ގޮތުގައި ދެކެން ބޭނުންވާ ކަމަށެވެ. ޚާއްސަކޮށް އަބަދު ވެސް މަސައްކަތް ކުރަމުން އައީ، އެއް ދުވަހުން އަނެއް ދުވަހަށް ނަތީޖާ ރަނގަޅު ކުރުމަށް ކަމަށް ވެސް އޭނާ ބުންޏެވެ. މުބާރާތުގައި މިފަހަރު ތުރުކީން ކުޅުނު ހަތަރު މެޗަށް ބަލާއިރު، ޝައުޤުވެރިވާ ކަހަލަ ކަންތައްތަކެއް ފެނުނު ކަމަށް އޭނާ ވަނީ ބުނެފަ އެވެ. ތުރުކީގެ ކޯޗަކަށް މޮންޓެލާ ހަމަޖެއްސީ މިދިޔަ އަހަރުގެ ސެޕްޓެމްބަރު މަހުގެ ތެރޭގަ އެވެ.

ތުރުކީން މުބާރާތުގެ ކުއާޓާ ފައިނަލްގައި ނިކުންނާނީ ނެދަލެންޑްސްއާ ދެކޮޅަށެވެ. އެންމެ ފަހުން ތުރުކީން މުބާރާތުގެ ކުއާޓާ ފައިނަލްގައި ކުޅުނީ 2008 ވަނަ އަހަރު އެވެ. އެ އަހަރު ތުރުކީން ވަނީ ކުއާޓާ ފައިނަލް މެޗު ކާމިޔާބުކޮށް، ސެމީ ފައިނަލަށް ވެސް ދަތުރު ކޮށްފަ އެވެ. ނަަމަވެސް ސެމީ ފައިނަލުން ބަލިވެ ވަނީ ކަޓައިފަ އެވެ.