ޖަރުމަނުގައި މިހާރު ކުރިއަށްދާ ޔޫރޯ ފުޓުބޯޅަ މުބާރާތުގެ ގަދަ 16 ވަނަ ބުރުގައި އޮސްޓްރިއާގެ މައްޗަށް ކުރި ހޯދައި، ތުރުކީން މުބާރާތުގެ ކުއާޓާ ފައިނަލް އިން ޖާގަ ހޯދައިފި އެވެ.

އަންގާރަ ދުވަހުގެ ރޭ ދަންވަރު، އޮސްޓްރިއާއާ ދެކޮޅަށް ކުޅުނު މެޗު ތުރުކީން ކާމިޔާބު ކުރީ 2-1 އިންނެވެ. މެޗުގެ ފުރަތަމަ ހާފުގައި ތުރުކީން ލަނޑު ޖަހައި ލީޑު ނެގިއިރު، ދެ ވަނަ ހާާފުގައި ވަނީ ލީޑު ފުޅާ ކޮށްފަ އެވެ. އޮސްޓްރިއާ އިން ވެސް ވަނީ ދެ ވަނަ ހާފުގައި ލަނޑެއް ޖަހައިފަ އެވެ.

މެޗުގެ ފުރަތަމަ މިނެޓުގައި ތުރުކީން ވަނީ ލަނޑު ޖަހައި ލީޑު ނަގައިފަ އެވެ. އޮސްޓްރިއާގެ ޑިފެންޑަރަކަށް ހެދުނު ގޯހެއްގައި ލިބުނު ބޯޅަ ގޯލަށް ފޮނުވާލައިގެން މެރީހް ޑެމިރާލް ޖެހި ލަނޑަކީ، ޔޫރޯގެ ނޮކް އައުޓް ބުރުގެ މެޗެއްގައި ޖެހި އެންމެ އަވަސް ލަނޑެވެ.

ދެ ވަނަ ހާފު ފަށައިގެން ކުރީ ކޮޅު ތުރުކީން ވަނީ ދެ ވަނަ ލަނޑެއް ވެސް ޖަހައިފަ އެވެ. މެޗުގެ 59 ވަނަ މިނެޓުގައި ތުރުކީގެ އާޑާ ގުލާ ތަނަވަސްކޮށްދިން ފުރުސަތެއްގައި ދެ ވަނަ ލަނޑު ޖެހީ ވެސް، ޑެމިރާލް އެވެ. އޭގެ ފަހުން 66 ވަނަ މިނެޓުގައި އޮސްޓްރިއާ އިން ލަނޑެއް ޖަހައި އުންމީދެއް ހޯދި އެވެ. އެ ލަނޑު އެ ޓީމަށް ޖަހައިދިނީ މައިކަލް ގްރެގޮރިޓްޒް އެވެ. އޭނާ އެ ލަނޑު ޖެހީ ސްޓެފަން ޕޮޝް ތަނަވަސްކޮށްދިން ފުރުސަތެއްގަ އެވެ.

އޮސްޓްރިއާ އިން މެޗުގެ ނަތީޖާ ހަމަހަމަ ކުރުމަށް މަސައްކަތް ކުރި ނަމަވެސް، އެ ޓީމަށް އިތުރު ލަނޑެއް ޖެހޭ ގޮތެއް ނުވި އެވެ.

ތުރުކީން މުބާރާތުގެ ކުއާޓާ ފައިނަލްގައި ނިކުންނާނީ ނެދަލެންޑްސްއާ ދެކޮޅަށެވެ. އެންމެ ފަހުން ތުރުކީން މުބާރާތުގެ ކުއާޓާ ފައިނަލްގައި ކުޅުނީ 2008 ވަނަ އަހަރު އެވެ. އެ އަހަރު ތުރުކީން ވަނީ ކުއާޓާ ފައިނަލް މެޗު ކާމިޔާބުކޮށް، ސެމީ ފައިނަލަށް ވެސް ދަތުރު ކޮށްފަ އެވެ. ނަަމަވެސް ސެމީ ފައިނަލުން ބަލިވެ ވަނީ ކަޓައިފަ އެވެ.