ރައްޔިތުން މަޖިލީހުގެ ރައީސް އަބްދުއްރަހީމް އަބްދުﷲ މ. މުރައިދޫގެ އަށް ދރިއުޅުއްވުން ބަދަލުކުރައްވަން އުޅުއްވާ ކަމަށާއި އޭގެ ކުރިން އެތަން މަރާމާތުކުރާ ކަމަށް އަޑު ފެތުރެން ފަށައިފިއެވެ.
މީސްމީޑިއާގައި އެފަދަ ވާހަކަތަކެއް ފެތުރެމުންދާތީ އެކަމާއި ގުޅޭ ގޮތުން މަޖިލީހުގެ އިދާރާ އާއި ރާއްޖެ އެމްވީއިން ސުވާލުކުރުމުން ވިދާޅުވީ އެ މައުލޫމާތު ސާފުކުރުމަށް ފަހު ޖަވާބުދޭނެ ކަމަށެވެ. މަޖިލިސް ރައީސް މުރައިދޫގެއަށް ބަދަލުވާން އުޅުއްވާކަން ނުވަތަ ނޫންކަން ސާފުކޮށެއް ނުދެއްވައެވެ.
އަޑު ފެތުރިފައިވާގޮތުން މިހާރު އެތަނުގައި ކުރިއަށް ދާ މަރާމާތުތަކަށް ފަހު މަޖިލީހުގެ ރައީސް މުރައިދޫ ގެއަށް ބަދަލުވެވަޑައިގަންނަވާނެއެވެ. ރާއްޖެ އެމްވީގެ ޓީމުން މުރައިދޫގެ ސަރަހައްދަށް ދިޔަ އިރު އެ ސަރަހައްދުގައި ޕޭވްމެންޓާއި، ކަރަންޓު ވަޔަރިން ފަދަ މަސައްކަތްތައް ކުރާ މަންޒަރު ފެނިފައިވެއެވެ. ނަމަވެސް އެއީ ސީދާ މުރައިދޫގެ އާއި ގުޅުން ހުރި މަސައްކަތްތަކެއް ކަން ވަނީ ސާފުވާ ގޮތް ނުވެފައެވެ. މުރައިދޫގެ މަރާމާތުކުރުމުގެ މަސައްކަތް ސިފްކޯ އާއި ހަވާލުކޮށްފައިވާ ކަމަށް ވެސް ވަނީ އަޑު ފެތުރިފައެވެ.
އެހެންނަމަވެސް އެކަމާއި ގުޅޭ ގޮތުން ސުވާލުކުރުމުން އެމްއެންޑީއެފުން ބުނީ އެމްއެންޑީއެފުން އެ ގޭގެ ސެކިއުރިޓީ ބެލެހެއްޓި ނަމަވެސް މަރާމާތާއި ގުޅުން ހުރި މައުލޫމާތުތައް ދޭނީ މަޖިލީހުގެ އިދާރާއިން ކަަމަށެވެ. ސިފްކޯ އާއި އެފަދަ މަސައްކަތެއް ހަވާލުކޮށްފައިވޭތޯ ކުރި ސުވާލަށް ވެސް މަޖިލީހުގެ އިދާސާއިން ޖަވާބު ހޯދުމަށް އެމްއެންޑީއެފުން ވަނީ އެދިފައެވެ.
ނިމިދިޔަ އެމްޑީޕީ ވެރިކަމުގެ ފުރަތަމަ ކޮޅު އެ ގެ ވަނީ ހުސްކޮށްފައެވެ. ރައްޔިތުންގެ މަޖިލީހުގެ ކުރީގެ ރައީސް މުހައްމަދު ނަޝީދު ވަނީ 6 މެއި 2021 ގައި އެ މަނިކުފާނަށް އަމާޒުކޮށްދިން ބޮމުގެ ހަމަލާ އަށް ފަހު މުރައިދޫގޭގައި ދިރިއުޅުއްވާފައެވެ.
ހިތަދޫ އުތުރު ދާއިރާގެ މެންބަރު މުހައްމަދު އަސްލަމު މަޖިލީހުގެ ރައީސްކަމުގައި ހުރި އިރު މުރައިދޫގެ ކޮންމެވެސް ވަރަކަށް މަރާމާތުކުރިއެވެ. ނަމަވެސް އަސްލަމް އެގޭގައި ދިރިއުޅުއްވާފައެއް ނުވެއެވެ.
