ގަވަރުނަރު ވަކި ކުރުމަކީ ރަނގަޅު ނިންމުމެއް ނޫންކަން ބޭރު ޤައުމުތަކާއި މާލީ އިދާރާތަކުންވެސް ޤަބޫލު ކުރާނެ: އެމްޑީޕީ
ގަވަރުނަރު ވަކިކުރީ ކޮން ޙާލަތެއް މެދުވެރިވެގެންތޯ ސުވާލު އުފެދޭކަމަށްވެސް ނާޒިލް ވިދާޅުވި
ބުދަ ދުވަހު ބޭއްވި ނޫސްވެރިންގެ ބައްދަލުވުމުގެ ތެރެއިން
މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރުގެ މަޤާމުން ވަކި ކުރެއްވި އަލީ ހާޝިމްއަކީ އެމްއެމްއޭގެ ޤާނޫނުގެ ދަށުން ފުރިހަމައަށް ޒިންމާ އަދާކުރެއްވި ފަރާތެއްކަމަށް އެމްޑީޕީން ބުނެފިއެވެ.
އެމްޑީޕީން އެހެން ބުނެފައިވަނީ އެ ޕާޓީން ބޭއްވި ނޫސްވެރިންގެ ބައްދަލުވުމެއްގައެވެ.
އަލީ ހާޝިމް މަގާމުން އެ މަޤާމުން ވަކި ކުރުމަށް ރައީސުލްޖުމްހޫރިއްޔާއަށް މަޝްވަރާ ދިނުމަށް ރައްޔިތުންގެ މަޖިލީހުން ފާސްކޮށްފައިވަނީ މިހިނގާ ޖުލައި މަހުއެވެ.
އަދި ކުރީގެ ފިނޭންސް މިނިސްޓަރު އަހުމަދު މުނައްވަރު އެ މަޤާމަށް އައްޔަނު ކުރެއްވުމަށް ރައީސް ވަނީ ނިންމަވާފައެވެ.
ބުދަ ދުވަހު ރައްޔިތުން މަޖިލީހުގައި ބޭއްވި ނޫސްވެރިންގެ ބައްދަލުވުމެއްގައި އެމްޑީޕީގެ ޕާލިމެންޓަރީ ގްރޫޕްގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވީ، މިވަގުތު އެމްއެމްއޭގެ ގަވަރުނަރު ވަކި ކުރުމަކީ ސަރުކާރުން ރަނގަޅަށް ނިންމި ނިންމުމެއް ނޫން ކަމަށާއި، ދުނިޔޭގެ ޤައުމުތަކުންވެސް އެކަން ޤަބޫލު ކުރާނެ ކަމަށެވެ.
ގަވަރުނަރު ވަކިކުރީ ކޮން ޙާލަތެއް މެދުވެރިވެގެންތޯ ސުވާލު އުފެދޭކަމަށްވެސް ނާޒިލް ވިދާޅުވިއެވެ.
ނާޒިލް ވިދާޅުވީ، އަލީ ހާޝިމްއަކީ ކާކުކަން ދުނިޔޭގެ އެތައް ޤައުމެއްގެ ގަވަރުނަރުންނަށް އެނގިލައްވާނެ ކަމަށާއި، ނިމިދިޔަ 5 އަހަރު ތެރޭގައި ގަވަރުނަރުގެ ހައިސިއްޔަތުން ކުރައްވަން ޖެހޭ މަސައްކަތްތައް އޭނާ ފުރިހަމަ ކަމާއެކު ކުރައްވާފައިވާ ކަމަށެވެ.
މޯލްޑިވްސް މަނިޓަރީ އޮތޮރިޓީގެ ޤާނޫނުގެ ތެރެއިން ސަރުކާރަށް ދޭންޖެހޭ ފުރިހަމަ އެއްބާރުލުން ހާޝިމް ދެއްވާފައިވާކަންވެސް ނާޒިލް ފާހަގަ ކުރެއްވިއެވެ. ނާޒިލް ވިދާޅުވާ ގޮތުގައި އިޤްތިސާދީ ގޮތުން ވިޔަސް ކަމެއް ދިމާވާ އިރަށް ގަވަރުނަރު ބަދަލު ކުރުމަކީ އަދި ހައްލެއް ނޫނެވެ.
އަލީ ހާޝިމް ވަކި ކުރެއްވުމާ ގުޅޭ ކޮމެޓީގެ ރިޕޯޓުގައި ބުނެފައިވަނީ އެމްއެމްއޭގެ ގާނޫނުގައި ބަޔާންކޮށްފައިވާ އެ އޮތޯރިޓީގެ މަގުސަދުތަކާއި މަސައްކަތްތައް އަދާކުރުމުގެ ގާބިލުކަން ގަވަރުނަރު ހާޝިމްގެ ކިބައިގައި ނެތް ކަމަށް މާލިއްޔަތު ކޮމިޓީއަށް ސާބިތުވާ ކަމަށެވެ.
ގަވަރުނަރު ހާޝިމް މަގާމުން ވަކި ކުރުމަށް ރައީސަށް ލަފާ ދިނުމަށް މެމްބަރުން ނިންމާފައިވަނީ އެމްއެމްއޭގެ އެންމެ އިސްވެރިޔާގެ ހައިސިއްޔަތުން މަސްއޫލިއްޔަތުތައް އެންމެ ފުރިހަމަ އަށް އަލީ ހާޝިމް އަދާނުކުރައްވާ ކަމަށް ވިދާޅުވެއެވެ.
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި އެމްއެމްއޭގެ ގަވަރުނަރުގެ މަގާމަށް އަލީ ހާޝިމް އައްޔަނުކުރީ 8 ސެޕްޓެމްބަރު 2019 ގައެވެ.
