ސިއްރިއްޔާތުގައި މިނިސްޓަރު އިހުސާން މައުލޫމާތުތަކެއް ދެއްވަން ޖެހޭތީ 241 ކޮމިޓީ ސިއްރު
ކޮމިޓީއަށް ހާޒިރުކޮށްފައިވަނީ ފުލުހުންގެ ތެރޭގައި ހުރި މައްސަލަތަކާއި ގުޅިގެން އެކަމުގެ މައުލޫމާތު ސާފުކުރުމަށް
ސަލާމަތީ ހިދުމަތްތަކާއި ބެހޭ ކޮމިޓީގެ 6 ވަނަ ބައްދަލުވުން
ރައްޔިތުންގެ މަޖިލީހުގެ ސަލާމަތީ ހިދުމަތްތަކާއި ބެހޭ ކޮމިޓީ (241 ކޮމިޓީ) ގައި ހޯމް މިނިސްޓަރު އަލީ އިހުސާން ސިއްރު މައުލޫމާތުތަކެއް ދެއްވަން ހުރިކަމަށް ވިދާޅުވެ ކޮމިޓީ ސިއްރުކޮށްފިއެވެ.
241 ކޮމިޓީއަށް ހޯމް މިނިސްޓަރު އަލީ އިހުސާންގެ އިތުރުން ފުލުހުންގެ އިސްވެރިން ވަނީ ހާޒިރުކޮށްފައެވެ.
ކޮމިޓީގެ މުގައްރިރު އޭދަފުށީ ދާއިރާގެ މެންބަރު އަހުމަދު ސަލީމް ވިދާޅުވީ، ކުރިން ދުވަހުގެ ކޮމިޓީއަށް ހޯމް މިނިސްޓަރު އަލީ އިހުސާން ހާޒިރުވެވަޑައިގެން "ތަންކޮޅެއް ސިއްރިއްޔާތު" ގައި އިތުރު މައުލޫމާތުތަކެއް ދެއްވާނެކަމަށް ވިދާޅުވެފައިވާ ކަމަށެވެ. އަދި ހުށަހަޅުއްވާ ޕްރެޒެންޓޭޝަން ދެއްވަން ހަމަޖެހިފައިވާ ކަމަށާއި، ކުރިން ދުވަހުގެ ކޮމިޓީގައި މެންބަރުން އެއްބަސްވި ގޮތަށް ސިއްރު ކުރުމަށް މެންބަރުންނަށް ފެންނަ ގޮތެއް ހުށަހެޅުމަށް މެންބަރު ސަލީމު ހުޅުވާލިއެވެ.
އެގޮތުން ކޮމިޓީ ސިއްރުކުރަން ހުށަހެޅުއްވީ ކެލާ ދާއިރާގެ މެންބަރު އަބްދުﷲ ޝަރީފުއެވެ. ހުޅުދޫ ދާއިރާގެ މެންބަރު މުހައްމަދު ޝާހިދު ތާއީދު ކުރެއްވި މި ހުށަހެޅުން ފާސްވީ ކޮމިޓީގައި އެވަގުތު ތިއްބެވި މެންބަރުންގެ އިއްތިފާގުންނެވެ.
ހޯމް މިނިސްޓަރު އަލީ އިހުސާނާއި ފުލުހުންގެ އިސްވެރިން ކޮމިޓީއަށް ހާޒިރުކޮށްފައިވަނީ ފުލުހުންގެ ތެރޭގައި ހުރި މައްސަލަތަކާއި ގުޅިގެން އެކަމުގެ މައުލޫމާތު ސާފުކުރުމަށެވެ. އެގޮތުން މަސްތުވާތަކެތީގެ މައްސަލަތަކާއި، މާރާމާރީއާއި ގޭންގު ކުށްތަކާއި، ގެވެށި އަނިޔާ އަދި މުޖްތަމައުގައި ކުރި ކުށްތަކުގެ މައުލޫމާތު ސާފުކުރުމަށެވެ. އެގޮތުން ޕްރެޒެންޓޭޝަންގެ ޒަރިއްޔާއިން ކޮމިޓީއަށް އެ މައުލޫމާތުތައް ވަނީ ހިއްސާކޮށްފައެވެ.
ކޮމިޓީއަށް ހޯމް މިނިސްޓަރު އަލީ އިހުސާނާއި ފުލުހުންގެ އިސް ފަރާތްތައް ހާޒިރުކޮށްފައިވަނި އެންމެ ފަހުން ބޭއްވި މި ކޮމިޓީގެ ބައްދަލުވުމުގައި ކޮމިޓީގެ މެންޑޭޓްގެ ތެރޭގައި ހިމެނޭ އިދާރާތަކާ ބައްދަލުކުރެއްވުމަށް ކޮމިޓީން ނިންމާފައިވަނިކޮށެވެ.
