ޖަމީލު ނިޔާވި މައްސަލައިގައި ފުލުހުންގެ ގާނޫނާއި ފުށުއަރާ ބައިވަރު ކަންތައްތަކެއް ހިނގާފައި އެބަހުރި - ނާޒިލް
ޖަމީލުގެ މަރުގެ މައްސަލައަކީ އީވާން ނަސީމު އާއި ހަސަން ސޮލާހުގެ މަރުގެ މައްސަލަތަކާއި ނުވަތަ އެކޭސްތަކާއި ވަރަށް ގުޅޭ މައްސަލައެއް
އެމްޑީޕީ ޕާލަމެންޓްރީ ގްރޫޕުގެ ލީޑަރު ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް
ޖަމީލު ނިޔާވި މައްސަލައިގައި ފުލުހުންގެ ގާނޫނަށް ގެނެވުނު އިސްލާހުތަކާއި އެ ޤާނޫނާއި ގުޅިގެން ހެދިފައި ހުރި ގަވައިދު ތަކާއި ފުށުއަރާ ބައިވަރު ކަންތައްތަކެއް ހިނގާފައި އެބަހުރި ކަމަށް އެމްޑީޕީ ޕާލަމެންޓްރީ ގްރޫޕުގެ ލީޑަރު ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވެއްޖެއެވެ.
ޖަލުގައި އަނިޔާ ލިބެމުންދިޔަ މުހައްމަދު ޖަމީނު ނިޔާވި މައްސަލައާއި ގުޅިގެން އެމްޑީޕީން ބޭއްވި ނޫސްވެރިންގެ ބައްދަލުވުމުގައި ނާޒިލް ވިދާޅުވީ 28 ޖޫންގައި ހިނގައިދިޔަ ކަންތައްތައް ވަރަށް ބޮޑަށް ރައްޔިތުންނަށް އެކި ގޮތްގޮތަށް އޮޅޭގޮތަށް ސަރުކާރުން ކަންތައް ކުރަމުންދަ ކަމަށެވެ. މިކަމުގައި ޝައްކު ކުރެވޭ ބައިވަރު ކަންތައްތަކެއް އެބަހުރި ކަމަށާއި، އީވާން ނަސީމު އާއި ހަސަން ސޮލާހުގެ މަރުގެ މައްސަލަތަކާއި ނުވަތަ އެކޭސްތަކާއި ވަރަށް ގުޅޭ މައްސަލައެއް ކަމަށެވެ.
ނާޒިލް ވިދާޅުވީ 19 ވަނަ މަޖިލީހުގައި ފުލުހުންގެ ގާނޫނަށް ގެނައި އިސްލާހުތަކާއި، އެ ގާނޫނާއި ގުޅިގެން ހެދިފައިހުރި ގަވައިދުތަކާއި ފުށުއަރާ ކަންތައްތަކެއް ޖަމީލުގެ މަރުވި ހާދިސާގެ ތެރޭގައި ހިނގާފައި އެބަހުރި ކަމަށެވެ. ނާޒިލް ވިދާޅުވީ ޖަމީލުގެ މަރުގެ މައްސަލައިގައި ގާނޫނާއި ގަވައިދުގެ ބޭރުން ވަރަށް ބައިވަރު ކަންތައްތަކެއް ހިނގާފައިވާ ކަމަށެވެ. މިއީ ރައްޔިތުންނަށް އެނގެންޖެހޭ އަދި ރައްޔިތުންނާއި ހަމައަށް އެ މައުލޫމާތު ފޯރުކޮށްދޭންޖެހޭ މައްސަލައެއް ކަމަށެވެ.
ރައީސް އޮފީހުގެ ކުރީގެ ލީގަލް އެފެއަރސްގެ އަންޑަރ ސެކްރެޓަރީ އަހުމަދު މައުރޫފް ވިދާޅުވީ ޖިސްމާނީ ހާނިކަތެއްގެ ނިޝާންތަކާއެކު ނިޔާވެފައި އޮއްވާ ފެނުނު ޖަމީލުގެ މަރުގެ މައްސަލައިގެ އިތުރުން މި ދުވަސްވަރު ގޮތްނޭނގޭ އާދަޔާ ހިލާފު މަރުތައް އިތުރުވަމުންދާ ކަމަށާއި އެކަމާއި އެމްޑީޕީން ކަންބޮޑުވާ ކަމަށެވެ.
އެމްޑީޕީން އެދެނީ އެކަން ހިނގައިދިޔަ ކަންތައް ބަލާ ތަހުގީގުކޮށް، އެފަދަ ބާވަތުގެ ކަމެއް ތަކުރާރުވިޔަ ނުދިނުމަށް އަޅަންޖެހޭ މިހިނދުން މިހިނދަށް އެޅުމަށް ކަމަށް މައުރޫފް ވިދާޅުވިއެވެ.
އަދި އެފަދަ ކަމެއް ތަކުރާރު ނުވާނެކަމުގެ ޔަގީންކަން ސަރުކާރުން ދޭންޖެހޭ ކަމަށް ވެސް މައުރޫފް ވިދާޅުވިއެވެ.
