ޔުނިފޯމް އެޅި މުއައްސަސާތަކަކީ ދިވެހިންގެ ގަދަރާއި ހައިބަތު ލިބެން ޖެހޭ ބައެކެވެ. އެއީ އާއްމުންގެ ލޮތްބާއި އިޚުތިރާމް ލިބެންވާނެ ބައެކެވެ. ހިތާމައާއި އެކު ފާހަގަކުރަން ޖެހޭ ކަމަކީ މިއަދުގެ ހަގީގަތް އޮތީ އެއާއި މާބޮޑަށް ވެސް ދުރުގައި ކަމެވެ. އެހެން ވާންޖެހޭ ސަބަބުތަކެއް ވެސް އެބަހުއްޓެވެ. މުއައްސަސާތަކުގެ ހިންގުން ސިޔާސީ ކުރުމާއި، ޔުނިފޯމް އެޅި މީހުންގެ ހުންނަންވާ އަދަބާއިސަދަބާއި ނެތުމާއި، ވާހަކަދެއްކުމުގައި އިޚުތިރާމްކުޑަ ވައްޓަފާޅި އެއް ގެންގުޅުން ފަދަ އެތައް ސަބަބެކެވެ. އެ ވާހަކަ މާ ދިގުކުރާކަށް ނެތީމެވެ. ހަގީގަތަކީ އާއްމުންނަށް ބަރޯސާ ވެވޭ އާއްމުންނާއި ގާތް ބަޔަކަށް ވުރެ ބޮޑަށް އާއްމުންނަށް މި މުއައްސަސާތައް ސިފަ ވަނީ އެބަޔަކަށް އިތުބާރު ނުކުރެވޭ އެބަޔަކާއި ވީހާވެސް ދުރުން އުޅުން ރަނގަޅު ބައެއްގެ ގޮތުގައެވެ.
މިހެން މިކަން ދިމާވަނީ މަދު ބައެއްގެ ނޭއްގާނީ އަމަލުތަކުގެ ސަބަބުންނެވެ. އެންމެ މީހަކު ކުރާ ކަމަކުން ވެސް މުޅި މުއައްސަސާގެ އަގު ވެއްޔާއި މޮޑެލަން އެބަ މަގުފަހިވެގެންދެއެވެ. މިހާރު ދިމާވެގެން މި އުޅެނީ ވެސް މި ޒާތުގެ ކަމެކެވެ. މީހުން ބުނާތީ އަޑު އަހަމެވެ. ކެޔޮކޭވަރު އެނގޭނީ ބިތުފަންގި ނެގީމައެވެ. އެހެން ބުނެ އުޅެނީ ސިއްރުން ކޮށްފަ ހުންނަ ކަންކަން އެނގޭނީ ހޯދާ ބެލީމައޭ ބުނުމުގެ ގޮތުންނެވެ. ޖަލުގެ ނުދައްކާ، އަނދިރި ފަރާތުގެ ވާހަކަ ފެނުނީ ވެސް މި ބީދައިން ހޯދާ ބެލީމައެވެ. ޤައުމުގެ ދާހިލީ ވުޒާރާގެ، ވަޒީރު އަލީ އިހުސާން ނޫސްވެރިންނާއި މުޚާތަބުކޮށް ދެއްވި މައުލޫމާތުތަކަކީ ބިރުވެރި ވާހަކަތަކެކެވެ.
އިހުސާން ފާހަގަކުރެއްވި ފަދައިން ޖަލުން ތަކުރާރުކޮށް ފޯނާއި މަސްތުވާތަކެތި ފެންނަމުންދާ މައްސަލަ އަބަދުވެސް ފެންމަތިވެއެވެ. މިއީ އިއްޔެ އަކު މިއަދަކު ހިނގާކަމެއް ނޫނެވެ. މިއީ ތެދުތެދަށް ދަންނަވާ ނަމަ އެންމެންނަށް އެނގޭ ބޮޑު ސިއްރެވެ. އެކަމެއް ހިނގާކަން ވެސް އެނގޭ އެކަމަކު އޭގެ މުގުލަށް ވާސިލް ނުވެވި އޮތް ކަމެއްގެ ވާހަކައެވެ. ކޮންމެއަކަސް މީގެ ތިން މަސް ކުރިން ޖަލުގެ އޮފިސަރުންގެ ބައިވެރިވުމާއި އެކު އެފަދަ ކަންކަން ހިނގާކަން ގައުމުގެ ހޯމް މިނިސްޓަރގެ ސަމާލުކަމަށް ގެނައެވެ. އެތައް ދުވަހެއް ވަންދެން ކުރަމުން އައި ވައްކަން މި އެނގުނީ "ބިތު ފަންގި" ނެގީމައެވެ. މިލިއަނުން މިލިއަނުން އޮފިސަރުންނަށް ފައިސާ ދީގެން، ޖަލަށް ވަގަށް ފޯނާއި މަސްތުވާތަކެތި ވައްދާ ނުރައްކާތެރި ނެޓްވޯކެއްގެ މަލަމަތި އެއޮތީ ހާމައަށް ފެންނާށެވެ.
ފުލުހުންގެ މައުލޫމާތުތަކުން އެނގުނުކަމަކީ ކަރެކްޝަންގެ 18 މުވައްޒަފެއްގެ އެކައުންޓަށް އާދަޔާއި ޚިލާފަށް ގިނައިން ފައިސާ ޖަމާވެފައި ހުރިކަމެވެ. ބައެއް މުވައްޒަފުންގެ އެކައުންޓަށް ގާތްގަނޑަކަށް 24 މިލިއަން ރުފިޔާ ޖަމާވެފަ އެބަ ހުއްޓެވެ. 18 މުވައްޒަފުންގެ އެކައުންޓަށް އެކި ފަހަރު މަތިން ގާތްގަނޑަކަށް 73 މިލިއަން ރުފިޔާ އެ މުވައްޒަފުންގެ އެކައުންޓަށް ޖަމާކޮށްފައި އެބަ ހުއްޓެވެ.
އެ ހިސާބުން މި މުވައްޒަފުން ހައްޔަރު ކުރި ވާހަކަ އާއި މި ކަމާއި މެދު އާއްމުންގެ ޚިޔާލުތަކުން މުޅި މީސްމީޑިއާ ފުރާލައިފިއެވެ. އެކަމަކު މިއީ ހަމައެކަނި އާދައިގެ އޮފިސަރުންނާއި ހިސާބުން ނިމޭނެ ކަމެއްތޯ އަޅުގަނޑުގެ ހިތުގައި ސުވާލު އުފެދެއެވެ. ޖަލާއި ޖަލުން ބެރުގައި ތިބި ކުށް ކުރ، ކުށުގެ ވެށީގައި އުޅޭ މީހުން މި ނެޓްވޯކްގައި ބައިވެރިވާ އިރު އެކަން ކަމާއި ގުޅުން ހުރި އިދާރާތަކަށް ހަމަ ރޭކާ ނުލަނީބާއެވެ؟ އަަހަރެއްހާ ދުވަހުގެ ތެރޭގައި މުސާރަ އާއި ނުބައްދަލު، ބޮޑެތި އަދަދުތައް އޮފިސަރުންގެ އެކައުންޓަށް ޖަމާވާ އިރު މާލީކަންކަން މަލާ ދިރާސާ ކުރާ މީހުންގެ ނަޒަރުން އެކަން ގެއްލިދާނެ ކަމަށް ޤަބޫލުކުރަން ދައްޗެވެ. އަދި އެންމެ އާދައިގެ ކުށްވެރިންނާއި، އާދައިގެ އޮފިސަރުންނާއި ހިސާބުގައި އެކަނި ހިނގާ މުއާމަލާތުތަކަކަށް މިކަން ވެދާނެކަމާއި މެދު ވެސް ސުވާލު އުފެދެއެވެ.
އެނގޭ ކަމަކީ ޖަލުން ބޭރުގައި ތިބި ފައިސާވެރި ބަޔަކު މި ކަމުގައި ބައިވެރިވާކަމެވެ. މިއީ އަޑި ނޭނގޭ ފުން ނެޓްވޯކެއްގެ މަލަމަތި ނޫންބާ އޭ ހިތަށް އަރައެވެ. އާދައިގެ އޮފިސަރަކަށް މިލިއަނުން ފައިސާ ހުށަހަޅަންޏާ، އަދި އިސް މަޤާމުތަކުގައި ތިބި މީހުންނަށް އެއަށް ވުރެ ބޮޑެތި އަދަދުތަކުން ފައިސާ ހުށަ ނާޅާނެކަމަށް ބަލާނީ ކޮން ހަމައަކުންތޯއެވެ؟ މިކަން އޮއްބާލުމުގައި ކިތައް ފަޑީގައި ތިބި ކިތައް މީހުންގެ އަތް ވާނެބާއެވެ؟ ނުފޫޒު ގަދަ ކިތައް މީހުންގެ މަސްލަހަތު މީގައި ހިމެނޭނެތޯއެވެ؟ މި މައްސަލައިގެ މުގުލުގައި ތިބި މީހުން ހޯދާ، ޖަވާބުދާރީ ކުރެވިދާނެތޯ މިއީ އުފެދޭ ސުވާލެކެވެ.
