ރައްޔިތުން ރުޅި ގަދަ ވުމުން ޓެކްސް ބޮޑު ކުރާ ބިލް ކެންޔާގެ ރައީސް އަނބުރާ ގެންދަވައިފި

ރައްޔިތުން ރުޅި ގަދަ ވުމުން ޓެކްސް ބޮޑު ކުރަން ކެންޔާގެ ގާނޫނު ހަދާ މަޖިލިހުން ފާސްކޮށް ތަސްދީގު ކުރަން ފޮނުވި ބިލް ކެންޔާގެ ރައީސް ވިލިއަމް ރޫޓޯ އަނބުރާ ގެންދަވައިފިއެވެ.

"ރައްޔިތުންގެ އަޑު އިއްވައިފި" ބުދަ ދުވަހު ހަވީރު ނޫސްވެރިންނާ ބައްދަލު ކުރައްވާ ރޫޓޯ ވިދާޅުވިއެވެ. "އެކަން ގަބޫލު ކޮށްފިން."

ރައްޔިތުންގެ އަތުން ނަގާ ޓެކްސް ބޮޑު ކުރަން މަޖިލިހުން ފާސް ކުރަން އުޅުމުން މި ދިޔަ 10 ވަރަކަށަ ދުވަހު ކެންޔާގައި އާންމުން މަގުތަކަށް ނުކުމެ މުޒާހަރާ ކޮށްފައި ވެއެވެ. މުޒާހަރާ ހޫނުވީ އަންގާރަ ދުވަހު އެ ބިލުގެ 3 ވަނަ ކިޔުން އިއްވާ ބިލް ފާސްކުރި ހިސާބުންނެވެ. އެއާއެކު މަޖިލިސް ކުރާ ގޭގެ ތެރެއަށް އާންމުން ވަދެގަނެ ބޮޑެތި ހަމަ ނުޖެހުންތަކެއް ވަނީ ހިނގާފައެވެ.

މުޒާހަރާ ކުރި މީހުންނާ ކުރިމަތި ލުމަށް ނުކުތް ސަލާމަތީ ބާރުތަކުން ބަޑިޖެހުމުގެ ސަބަބުން 23 މީހުން މަރުވި ކަމަށް ކެންޔާގެ ހިއުމަން ރައިޓްސް ކޮމިޝަނުން ވަނީ ބުނެފައެވެ.

ހިތްހަމަ ނުޖެހިފައި ތިބި ކެންޔާގެ ރައްޔިތުން ބުނާ ގޮތުގައި ރޫޓޯ ވަނީ އިންތިޚާބުގެ ވައުދުތައް ފުއްދުމުގައި ފެއިލްވެފައެވެ.

ކެންޔާގެ ރައީސް ބިލް އަނބުރާ ގެންދެވި އިރު، ޓެކްސް ބޮޑު ކުރުން ނޫން ގޮތެއް ނެތް ކަމަށް ވިދާޅުވެ އެކަން ދިފާއު ކުރައްވާ އޭނާ ވަނީ އެތައް ވާހަކަފުޅެއް ދައްކަވާފައެވެ.

ރޫޓޯ ވިދާޅުވީ، ގައުމުގެ ދަރަނި ބޮޑުކަމާއެކު ޓެކްސް މައްޗަށް ޖެއްސުން ނޫން ގޮތެއް ނެތް ކަމަށެވެ.

"ޓެކްސް ގެ ގޮތުގައި އެއްކުރާ ކޮންމެ 100 ޝިލިންގ އަކުން 61 ޝިލިންގ ހޭދަ ކުރަނީ ޓެކްސް ދައްކަން." ރޫޓޯ ބިލަށް ފުރަތަމަ ތާއީދު ކުރެއްވި ސަބަބު ބުދަ ދުވަހުގެ ނޫސް ކޮންފަރެންސްގައި ވިދާޅުވިއެވެ.

އެހެން ނަމަވެސް ފާޑު ކިޔާ ފަރާތްތަކުން ބުނަނީ، ދައުލަތުގެ އިސްރާފް ކުޑަކުރުމުން އެކަނިވެސް ދަރަނި ފޫބެއްދޭނެ ކަމަށެވެ.

ކެންޔާގައި ރައީސް ރޫޓޯ އަށް ހަޖޫ ޖެހުމުގެ ގޮތުން ފާޑު ކިޔާ ފަރާތްތަކުން އޭނާ ސިފަ ކުރަނީ "އުދުހޭ ރައީސް" ގެ ގޮތުގައެވެ. ރަސްމީ ދަތުރުފުޅުތައް ގިނަ ކަމުން މީހުންގެ ފާޑު ކިޔުން އިތުރުވުމުން އަމިއްލަ ދިފާއުގައި ރޫޓޯ ވިދާޅުވަނީ، ބޭރު ދަތުރުތައް ކޮށްގެން ނޫނީ ފައިސާގެ ދަތިކަން ފޯރާފައިވާ ކެންޔާ އަށް އިންވެސްޓްމަންޓްތައް ނުގެނެވޭނެ ކަމަށެވެ.

ޓެކްސް ބޮޑު ކުރުމާ ދެކޮޅަށް މުޒާހަރާ އަށް އަންގާރަ ދުވަހު ނުކުތް މީހުން ކޮންޓްރޯލް ނުވެ، ފުލުހުން ބަޑި ޖަހާ ކަރުނަ ގޭސް ޖެހުމުން ވެސް މުޒާހަރާ ކުރާ މީހުން މައިތިރި ނުކުރެވުނު މަންޒަރު ފެނިގެން ދިޔައެވެ.

މުޒާހަރާ ކުރި މީހުން ގޮވަމުން ދިޔައީ ރައްޔިތުންގެ މަޖިލީހުގެ ހުރިހާ މެމްބަރުން އިސްތިއުފާދީ ގައުމުގެ ރައީސްވެސް އިސްތިއުފާ ދޭން ޖެހޭނެ ކަމަށެވެ.

ޓެކްސް ބިލް ފާސްކުރުމުން ގާނޫނު ހަދާ މަޖިލީހަށް ވަދެގަނެ، އަންގާރަ ދުވަހު އިމާރާތުގައި ހުޅު ވެސް ޖަހިއެވެ.

މަންޒަރުތަކުން އިމާރާތުގައި ރޯވެ ދުން އަރަމުންދާ ތަން ފެނެއެވެ. ފުލުހުންނަށް ކޮންޓްރޯލް ނުވެ އެއްބަޔަކު އިމާރާތުގެ ތެރެއަށް ވަދެގަނެ، ތަކެއްޗަށް ބޮޑެތި ގެއްލުންތަކެއް ވަނީ ދީފައެވެ. މީގެ އިތުރުން ބިލަށް ތާއީދު ކޮށް ވޯޓު ދިން މެމްބަރުންނަށްވެސް މުޒާހަރާ ކުރާ މީހުންވަނީ ހަމަލާ ދީފައެވެ.

މުޒާހަރާގެ ބައިވެރިއަކު ރޮއިޓާސް އާ ވާހަކަ ދައްކަމުން ބުނީ، އެމީހުން ބޭނުންވަނީ މަޖިލިސް ބަންދުކޮށް ހުރިހާ މެމްބަރުން އިސްތިއުފާދީ އައު ސަރުކާރެއް ކެންޔާއަށް ގެންނާށެވެ.

ކެންޔާގެ ވެރިރަށް ނައިރޯބީގެ އިތުރުން އެހެން ސިޓީތަކުގައިވެސް މި ބިލާ ގުޅިގެން ހަމަނުޖެހުން ހިނގި ކަމަށް ޚަބަރުތައް ބުނެއެވެ.

ކެންޔާ ސަރުކާރުން ޓެކްސް ބޮޑު ކުރާތީ އާންމުން ރުޅި ގަދަވެފައިވަނީ ދިރިއުޅުމުގެ އަގުތައް މައްޗަށް ގޮސްފައިވަނިކޮށް އިތުރަށް ޓެކްސް ބޮޑު ކޮށްފިނަމަ އެމީހުންގެ ދިރިއުޅުމުގެ ހާލަތު އިތުރަށް ދަށްވެގެން ދާނެ ކަމަށް ބުނެއެވެ.

ރޫޓޯ ކެންޔާގެ ވެރިކަމަށް ވަޑައިގަތީ ގާތްގަނޑަކަށް މީގެ 2 އަހަރު ކުރިން ފަގީރުންގެ ހާލަތު ރަނގަޅު ކުރައްވާ، ކަރަޕްޝަން ނައްތާލައްވާނެ ކަމަށް ކެމްޕޭންގައި ވިދާޅުވަމުންނެވެ.

ގައުމުގެ އިގްތިސާދީ ހާލަތު ރަނގަޅު ކުރަން އިންޓަރނޭޝަނަލް މަނިޓަރީ ފަންޑު (އައިއެމްއެފް) އިން ކެންޔާ ސަރުކާރަށް މަޖުބޫރު ކުރަމުންދަނީ ޚަރަދުތައް ކުޑަކޮށް އާމްދަނީ އިތުރު ކުރެވޭނެ ގޮތްތައް ހޯދުމަށެވެ.

ކެންޔާ ސަރުކާރުން މަޖިލީހަށް ހުށަހެޅި ބިލުގެ މަގްސަދެއް ކަމަށް ބުނަނީ ދަރަނި ކުޑަކުރުމަށް ޓެކްސް ބޮޑު ކޮށްގެން އިތުރު އާމްދަނީގެ ގޮތުގައި 2.7 ބިލިއަން ޑޮލަރު ހޯދުމެވެ. ދަރަނި ވަރަށް ބޮޑުތަން މައްޗަށް ގޮސްފައިވާ ކެންޔާގެ އާމްދަނީގެ 37 އިން ސައްތަ ހޭދަ ކުރަން ޖެހެނީ ދަރަންޏާ އިންޓަރެސްޓް ދެއްކުމަށް ކަމަށްވެއެވެ.

ޓެކްސް ބޮޑު ކުރުމާމެދު ރައްޔިތުން ރުޅިވެރިކަން ފާޅު ކުރަން ފެށުމުން ސަރުކާރުން ބުނެފައިވަނީ، ޕާނާއި ކުކިންގ އޮއިލް އާއި، ކާރުން ޓެކްސް ބޮޑު ނުކުރާނެ ކަމަށެވެ. އެހެން ނަމަވެސް އެވަރުން ރައްޔިތުން އަދި ހިތްހަމަ ޖެހޭ ގޮތް ވަނީ ނުވެފައެވެ.