ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާާ)ގެ ގްރޫޕް ސްޓޭޖުގައި ކުޅުނު ފުރަތަމަ މެޗުން މޮޅުވެ، ކޮލަމްބިއާ އިން ރަނގަޅު ފެށުމެއް ހޯދައިފި އެވެ.

މުބާރާތުގެ ގްރޫޕް ޑީ ގައި، އަންގާރަ ދުވަހުގެ ފަތިހު ޕެރަގުއޭއާ ދެކޮޅަށް ކުޅުނު މެޗު ކޮލަމްބިއާ އިން ކާމިޔާބު ކުރީ 2-1 އިންނެވެ. މެޗުގެ ފުރަތަމަ ހާފުގައި ކޮލަމްބިއާ އިން ވަނީ ދެ ލަނޑު ޖަަހައިފަ އެވެ. ޕެރަގުއޭގެ ހަމައެކަނި ލަނޑު އެ ޓީމުން ޖެހީ ފަހު ހާފުގަ އެވެ.

މެޗުގެ ފުރަތަމަ ހާފުގެ 32 ވަނަ މިނެޓުގައި ކޮލަމްބިއާ އިން ވަނީ ލަނޑު ޖަހައި ލީޑު ނަގައިފަ އެވެ. ހަމޭސް ރޮޑްރިގޭޒް ތަނަވަސްކޮށްދިން ފުރުސަތެއްގައި ކޮލަމްބިއާ އަށް ލީޑު ނަގައިދިނީ ޑެނިއެލް މުނޯޒް އެވެ. އޭގެ ދިހަ މިނެޓު ފަހުން، މެޗުގެ 42 ވަނަ މިނެޓުގައި ކޮލަމްބިއާގެ ދެ ވަނަ ލަނޑު ޖެހީ ޖެފާސަން ލާމާ އެވެ. އެ ލަނޑު ޖަހަން ވެސް ފުރުސަތު ތަނަވަސްކޮށްދިނީ ރޮޑްރިގޭޒް އެވެ.

މެޗުގައި ޕެރަގުއޭ އިން ލަނޑު ޖެހުމަށް ކުރި މަސައްކަތް އެ ޓީމަށް ކާމިޔާބު ކުރެވުނީ ދެ ވަނަ ހާފުގަ އެވެ. މެޗުގެ 69 ވަނަ މިނެޓުގައި އެ ޓީމަށް ލަނޑު ޖަހައިދިނީ ހޫލިއޯ އެނިސްކޯ އެވެ. އޭނާ އެ ލަނޑު ޖެހީ، ރަމޮން ސޮސާ ތަނަވަސްކޮށްދިން ފުރުސަތެއްގަ އެވެ.

މެޗުން ލިބުނު ތިން ޕޮއިންޓާއެކު ކޮލަމްބިއާ އޮތީ ގްރޫޕް ޑީގެ އެއް ވަނައިގަ އެވެ. މި ގްރޫޕުގައި އެ ޓީމުގެ ދެ ވަނަ މެޗުގައި ނިކުންނާނީ ކޮސްޓަ ރިކާއާ ދެކޮޅަށެވެ.