ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާ)ގެ ގްރޫޕް ޑީގެ ފަހު މެޗުގައި ބްރެޒިލާ އެއްވަރުކޮށް، ގްރޫޕްގެ އެއް ވަނަ ކޮލަމްބިއާ އިން ހޯދައިފި އެވެ.
މުބާރާތުގެ ގްރޫޕް ސްޓޭޖުގައި ކޮލަމްބިއާ އިން ކުރިން ކުޅުނު ދެ މެޗުން ވެސް ކޮލަމްބިއާ ވަނީ މޮޅުވެފަ އެވެ. ބްރެޒިލް ވަނީ އެއް މެޗުން މޮޅުވެ، އަނެއް މެޗު އެއްވަރުވެފަ އެވެ. އެހެންކަމުން އެއް ވަނައިގައި ކުއާޓާ ފައިނަލަށް ދިޔުމުގެ ފުރުސަތު ބްރެޒިލަށް އޮތީ ކޮލަމްބިއާ ބަލިކޮށްގެންނެވެ. ނަމަވެސް މި ދެ ޓީމު ބައްދަލު ކުރި މެޗު ނިމުނީ 1-1 އިން އެއްވަރުވެގެންނެވެ.
މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ބްރެޒިލް އިންނެވެ. ނަމަވެސް ކޮލަމްބިއާ އިން ވަނީ ލަނޑު ޖަހައިގެން މެޗުގެ ނަތީޖާ ހަމަހަމަ ކޮށްފަ އެވެ.
މެޗު ފަށައިގެން 12 ވަނަ މިނެޓުގައި ބްރެޒިލުން ލަނޑު ޖަހައި ލީޑު ނެގި އެވެ. އެ ޓީމަށް ލީޑު ނަގައިދިނީ ރަފީނިއާ އެވެ. ނަމަވެސް މެޗުގެ ފުރަތަމަ ހާފުގެ ފުރިހަމަ ވަގުތު ހަަމަވެ، އިތުރަށް ދެއްކި ވަގުތުގައި ކޮލަމްބިއާ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. ޖޯން ކޯޑޮބާ ތަނަވަސްކޮށްދިން ފުރުސަތެއްގައި އެ ޓީމަށް ނަތީޖާ ހަމަހަމަ ކޮށްދިނީ ޑެނިއެލް މުނޯޒް އެވެ.
ނަތީޖާ އާއެކު ކޮލަމްބިއާ އަށް ގްރޫޕްގެ އެއް ވަނަ ލިބެނީ ތިން މެޗުން ހަތް ޕޮއިންޓާއެކު އެވެ. މުބާރާތުގެ ކުއާޓާ ފައިނަލްގައި ކޮލަމްބިއާ ނިކުންނާނީ ޕަނަމާއާ ދެކޮޅަށެވެ. ގްރޫޕްގެ ދެ ވަނަ ބްރެޒިލް އަށް ލިބުނުއިރު، ކުއާޓާ ފައިނަލްގައި އެ ޓީމު ނިކުންނާނީ އުރުގުއޭއާ ދެކޮޅަށެވެ.
