ބޮލީވިއާ ބަލިކޮށް، ޕަނަމާ ކުއާޓާ ފައިނަލަށް

ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާ)ގެ ގްރޫޕް ސްޓޭޖުގެ ފަހު މެޗުގައި ބޮލީވިއާ ބަލިކޮށް، ޕަނަމާ އިން މުބާރާތުގެ ކުއާޓާ ފައިނަލްގެ ޖާގަ ހޯދައިފި އެވެ.

އެ މެޗަށް ނިކުތްއިރު، ބޮލީވިއާ އޮތީ ކުރިން ކުޅުނު ދެ މެޗުން ވެސް ބަލިވެފަ އެވެ. ޕަނަމާ ވަނީ އެއް މެޗުން މޮޅުވެ، އަނެއް މެޗުން ބަލިވެފަ އެވެ. ބޮލީވިއާއާ ދެކޮޅަށް ކުޅުނު މެޗު ޕަނަމާ އިން ކާމިޔާބު ކުރީ 3-1 އިންނެވެ.

މެޗުގެ ފުރަތަމަ ހާފުގެ 22 ވަނަ މިނެޓުގައި ޕަނަމާ އިން ވަނީ ލަނޑު ޖަހައި ލީޑު ނަގައިފަ އެވެ. އެ ޓީމަށް ލީޑު ނަގައިދިނީ ހޯސޭ ފަޖާޑޯ އެވެ. ދެ ވަނަ ހާފު ގައި ބޮލީވިއާ އިން ވަނީ ލަނޑެއް ޖަހައި ނަތީޖާ ހަމަހަމަ ވެސް ކޮށްފަ އެވެ. މެޗުގެ 69 ވަނަ މިނެޓުގައި އެ ޓީމަށް ނަތީޖާ ހަމަހަމަ ކޮށްދިނީ ބްރޫނޯ މިރަންޑާ އެވެ.

ނަމަވެސް ފަހުން ޕަނަމާ އިން ވަނީ އިތުރު ދެ ލަނޑު ޖަހައިގެން މެޗު ކާމިޔާބު ކޮށްފަ އެވެ. މެޗުގެ 79 ވަނަ މިނެޓުގައި ދެ ވަނަ ފަހަރަށް އެ ޓީމަށް ކުރި ހޯދައިދިނީ އެޑުއާޑޯ ގުރެއިރޯ އެވެ. މެޗުގައި ޕަނަމާގެ ތިން ވަނަ ލަނޑު، ސެސާ ޔަނިސް ޖެހީ މެޗުގެ ފުރިހަމަ ވަގުތު ހަަމަވެ އިތުރަށް ދެއްކި ވަގުތުގަ އެވެ.

މޮޅާއެކު ޕަނަމާ އިން ވަނީ ގްރޫޕް ސީގެ ދެ ވަނަ ހޯދައިފަ އެވެ. އެއީ ގްރޫޕް ސްޓޭޖުގައި ކުޅުނު ތިން މެޗުން ހަ ޕޮއިންޓު ހޯދައިގެންނެވެ. ބޮލީވިއާ ވަނީ ތިން މެޗުން ވެސް ބަލިވެ، ގްރޫޕްގެ ފުލަށް ވެއްްޓިފަ އެވެ.