މެސީ، ފަރިތަކުރުންތަކުގައި ބައިވެރިވާން ފަށައިފި
އާޖެންޓީނާގެ ފަރިތަކުރުންތަކަށް މެސީ ނިކުންނަން ފަށާފައިވާއިރު، ބައެއް މީޑިއާ ތަކުގައި ބުނެފައިވާ ގޮތުން އެ މެޗުގައި މެސީ ކުޅުމުގެ ފުރުސަތު ބޮޑެވެ.
އާޖެންޓީނާ އިން ކުރިއަށް ގެންދިޔަ ފަރިތަކުރުމުގައި މެސީ ބައިވެރި ވަނީ
އާޖެންޓީނާގެ ފަރިތަކުރުންތަކުގައި ކެޕްޓަން ލިއޮނަލް މެސީ ބައިވެރިވާން ފަށައިފި އެވެ.
އާޖެންޓީނާ ތައްޔާރުވަމުން އަންނަނީ، މިހާރު ކުރިއަށްދާ ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާ)ގެ ކުއާޓާ ފައިނަލް މެޗަށެވެ. ކުއާޓާ ފައިނަލްގައި ހުކުރު ދުވަހު އާޖެންޓީނާ އިން ނިކުންނާނީ އެކުއެޑޯއާ ދެކޮޅަށެވެ. އެ މެޗުގެ ކުރިން އާޖެންޓީނާ އިން ކުރިއަށް ގެންދާ ފަރިތަކުރުންތަކަށް މެސީ ވަނީ ނިކުމެފަ އެވެ.
މުބާރާތުގެ ގްރޫޕް ސްޓޭޖުގެ ފަހު މެޗުގައި އާޖެންޓީނާ އިން ޕެރޫއާ ދެކޮޅަށް ކުޅުނު މެޗުގައި މެސީ ނުކުޅެ އެވެ. އެއީ އޭގެ ކުރިން ގްރޫޕް ސްޓޭޖުގައި ޗިލީއާ ދެކޮޅަށް ކުޅުނު މެޗުގައި މެސީ އަށް ލިބުނު އަނިޔާގެ ސަބަބުންނެވެ. އެ މެޗަށްފަހު، އާޖެންޓީނާގެ ކޯޗު ލިއޮަނަލް ސްކަލޯނީ ވަނީ، މެސީ އަށް ކޮންމެ ވެސް ވަރެއްގެ އަނިޔާއެއް ލިބިފައިވާކަން ވެސް ހާމަކޮށްފަ އެވެ.
އެހެންވެ ޕެރޫއާ ދެކޮޅަށް ކުޅުނު މެޗުގައި މެސީ ނުކުޅެ އެވެ. މެސީ އަށް ލިބިފައިވާ އަނިޔާގެ ސަބަބުން ކުއާޓާ ފައިނަލްގެ މެޗުގައި އޭނާ އަށް ކުޅެވޭނެކަން އަދި ޔަގީނެއް ނޫނެވެ. ނަމަވެސް އާޖެންޓީނާގެ ފަރިތަކުރުންތަކަށް މެސީ ނިކުންނަން ފަށާފައިވާއިރު، ބައެއް މީޑިއާ ތަކުގައި ބުނެފައިވާ ގޮތުން އެ މެޗުގައި މެސީ ކުޅުމުގެ ފުރުސަތު ބޮޑެވެ.
އެންމެ ފަހުގެ ޗެމްޕިއަން އާޖެންޓީނާ އާއެކު ގްރޫޕް ސްޓޭޖުގައި މެސީ ވަނީ ދެ މެޗު ކުޅެފަ އެވެ. އެއީ ކެނެޑާއާ ދެކޮޅަށާއި، ޕެރޫއާ ދެކޮޅަށެވެ. އެންމެ ފަހުން އޮތް ކޮޕާ އެމެރިކާގެ ރަން ބޫޓު އަދި އެންމެ މޮޅު ކުޅުންތެރިޔާގެ މަގާމު ވެސް ހޯދާފައިވާ މެސީ އަށް، މިއަހަރުގެ މުބާރާތުގައި އަދި ލަނޑެއް ނުޖެހެ އެވެ.
